މިސަރުކާރުން ވެރިކަން ދަމަހައްޓަން ގެންދަނީ ވޯޓަކަށް 30،000 ރުފިޔާގެ މަގުން ފައިސާ ދެމުން ކަމަށާއި، މިއީ ކަމާއި ބެހޭ ފަރާތްތަކުން ސަމާލުވެ ފިޔަވަޅު އަޅަންޖެހޭ ކަމެކަމަށް ޖުމްހޫރީ ޕާޓީީގެ ރިޔާސީ ކެންޑިޑޭޓް ޤާސިމް އިބްރާހިމް ވިދާޅުވެއްޖެއެވެ.

ރިޔާސީ ކެމްޕޭންގައި މިރޭ ހއ. އިހަވަންދު އަށް ވަޑައިގެން އެ ރަށުގައި ބޭއްވި ޖަލްސާގައި ގާސިމް ވިދާޅުވީ މިސަރުކާރުން ދަނީ ވޯޓު ގަތުމަށް ބޮޑެތި އަދަދުތަކުން ފައިސާ ހުށަހަޅަމުން ކަމަށެވެ. ކޮންމެ ވޯޓަކަށް، 20،000 ރުފިޔާއާއި 30،000 ރުފިޔާގެ ދޭތެރޭ އަދަދަކަށް ވޯޓު ގަންނަން ފައިސާ ހުށަހަޅަމުންދާކަމަށް ޤާސިމް ވިދާޅުވިއެވެ.

ގާސިމް ވިދާޅުވި ގޮތުގައި ރައީސް ސޯލިހް، މި ހިނގަމުންދާ ދައުރު ނިންމަވާފައި ގެއަށް ވަޑައިގަތަސް، ހަތަރު ލައްކައެއްހާ ރުފިޔާ ކޮންމެ މަހަކު އިނާޔަތުގެ ގޮތުގައި ލިބިވަޑައިގަންނަވާނެއެވެ. އެއީ ބޭސްފަރުވާ އާއި ސެކިއުރިޓީ ނުލައި ކަމަށް ވެސް ގާސިމް ވިދާޅުވިއެވެ.

"މަދުތޯ އެ ވަރު؟ ކޮން ކަމެއްތޯ ކުރީ. ފަނާ ކުރުން ފިޔަވައި. ދައުލަތުގެ ލާރި ދިނުމާއި އަނެއްކޮޅުން ގާނޫނުއަސާސީއާ ހިލާފަށް ކަންތައް ކުރީ. މިހާރު އެ ހުރީ ކަނޑައެޅިގެން ކުށްވެރިވެފައި އޭނަ. އޭނާގެ މައްޗަށް ހުކުމް ކުރަން ޖެހޭނެ މިއަދު.

– ގާސިމް ވިދާޅުވިއެވެ.

ގާސިމް ވިދާޅުވީ މި ސަރުކާރާ އެކީގައި ޖުމްހޫރީ ޕާޓީން ކޯލިޝަން ހަދައިގެން މަސައްކަތް ކުރެއްވި ނަމަވެސް، ކަންކަން ކުރެއްވުމުގައި މަޝްވަރާ ކުރައްވާފައި ނުވާ ކަމަށެވެ. އެހެންވީމަ، މިވަރުގެ ޣައްދާރު ކަންކަން ކުރެއްވީމަ ރައީސް ސޯލިހަށް ތާއީދު ކުރެއްވެން ނެތް ކަމަށް ގާސިމް ވިދާޅުވިއެވެ. ގާސިމް ވިދާޅުވީ ރިޔާސީ ރޭހަށް ނުކުންނެވީ ގައުމު އަޅުވެތިކަމުގެ ތެރެއަށްދާތީ "ލަގޮނޑިއަށް" ކެތް ނުވެގެން ކަމަށެވެ. އަދި މި ރިޔާސީ އިންތިހާބުގައި އެމްޑީޕީ އާއި ޕީޕީއެމާއި ދަ ޑިމޮކްރެޓްސް އަށް ވެސް ވޯޓުލާން ހެޔޮ ނުވާނެ ކަމަށް ގާސިމް ވިދާޅުވިއެވެ.

އެއީ ހަމަ އެކައްޗެއް. ބައްލަވާ. އަހިވަކާ ޖެހި އަހިވަކެއް ފާވާނެ އޭ ބުނާހެން. އިބްރާހިމް މުހައްމަދު ސޯލިހް އެ ހުންނެވީ ރައްޔިތުންގެ މަޖިލިހުގައި ތަޅު އަޅުވައިގެން. ގާނޫނުއަސާސީއާ ހިލާފަށް ކަނޑުގެ އެއްބައި ދޫކޮށްލައިފި. ގާނޫނުއަސާސީއާ ހިލާފަށް ބޭރުގެ ސިފައިން ގެނެސްފި. ދައުލަތުން އިންތިހާ ދަރަޖައިގެ ކޮރަޕްޝަން ފައިބައިގެންދާ ތަން ތިޔަބޭފުޅުންނަށް ފެނިވަޑައިގަންނަވާނެ. ކޮން ތަނަކުން ހޯދާ ފައިސާއެއްތޯ ވޯޓަކަށް 20،000ރ. އަޅާލަނީ؟

– ގާސިމް ވިދާޅުވިއެވެ.

ގާސިމް ވިދާޅުވި ގޮތުގައި އެއްޗެއްގައި ހިފިޔަސް ހިފަން ވާނީ ރަނގަޅު ގޮތުގައެވެ. އެމީހެއްގެ އެއްޗެއްގައި އެމީހަކު ހިފުމަކީ މައްސަލައެއް ނޫން ކަމަށާއި އެމީހުން އެ ބަހަނީ ރައްޔިތުންގެ ފައިސާ ނަމަ، އޭގައި ހިފުމަކީ މައްސަލައެއް ނޫން ކަމަށް ވެސް ގާސިމް ވިދާޅުވިއެވެ.