މާލޭ ރައްޔިތުންގެ ހުރި ކަންބޮޑުވުންތައް އޮޅުން ފިލުވައި ރައްޔިތުންގެ އިހުސާސްތައް އަޑު އަހާލުމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު މާލޭގައި ޑޯޓުޑޯ ހަރަކާތެއް ކުރިއެއް ގެންގޮސްފިއެވެ.
މިއަދު ހަވީރު މާލޭގެ ބައެއް ޢާންމު ރައްޔިތުން ހަދާފައިވާ ޖަގަހަތަށް ހުޅުވައި ދެއްވުމަށްފަހު މުއިއްޒުވަނީ އެސަރަހައްދު ތަކުގައި ހުރި ބައެއް ގޭގެއަށް ވަޑައިގެން ރައްޔިތުންނާއި ބައްދަލުކޮށްފައެވެ. މުއިއްޒު ވަޑައިގެންނެވި ގޭގެއިންނާއި މަގުމަތިން ދިމާވި މީހުން ވަނީ މުއިއްޒު ހޮވުމަށް ތައްޔާރަށް ތިބިކަމަށް ބުނެ ޝުޢޫރު ފާޅުކޮށްފައެވެ.
މުއިއްޒަކީ އެންމެ ފަހުން ބޭއްވު މާލެ ސިޓީ ކައުންސިލް އިންތިޚާބުގައި އެމްޑީޕީގެ މައްޗަށް ބޮޑު ތަފާތަކުން ކުރި ހޯއްދަވައި މާލޭގެ މޭޔަރުކަން ކާމިޔާބު ކުރެއްވި ބޭފުޅާއެވެ. މާލޭގެ ރައްޔިތުންގެ އެތާއީދާއިއެކު އަދި އެއަށްވުރެއް ބޮޑު ތާއީދަކާއިއެކު މިފަހަރުގެ ރިޔާސީ އިންތިޚާބުގައި މާލޭގެ ސާފ މެޖޯރިޓީ ނެގުމަކީ ޑރ.މުއިއްޒުގެ އަމާޒެވެ.
މުއިއްވަނީ އެމަނިކުފާނުގެ މެނިފެސްޓޯގައި މާލޭގެ ރައްޔިތުންނަށް މުހިންމު ގިނަ ވައުދުތަކެއް ހުށަހަޅުއްވާފައެވެ. މާލޭގެ ރައްޔިތުންނަށް ދިމާވެފައިވާ ބޯހިޔާ ވަހިކަމުގެ މައްސަލައަށް ދާއިމީ ހައްލު ގެންނާނެކަމުގެ ޔަގީންކަން މުއިއްޒު ވަނީ ދެއްވާފައެވެ. މުޢިއްޒުގެ މެނިފެސްޓޯގައި ވަނީ، ކުރިއަށް އޮތް 20 އަހަރަށް ޢަމާޒުކޮށް 65000 ގެދޮރު ޔަގީންކޮށްދެއްވާނެކަމަށް ވިދާޅުވެފައެވެ. އެގޮތުން ޤާނޫނުން ލިބިދޭ ބޯހިޔާވަހިކަމުގެ ޙައްގުގެދަށުން، އަމިއްލަ ބޯހިޔާވަހިކަން ނެތް އެއްވެސް ރައްޔިތެއް ނެތްކަން ކަށަވަރުކުރައްވާނެކަމަށް މުއިއްޒު ވަނީ ވިދާޅުވެފައެވެ.
PPM PNC ge Riyaasee Candidate Dr Mohamed Muizzu ge Male’ City ge miadhuge D2D ge therein @MMuizzu #Vote4Muizzu#DrMuizzuSembe2023#DhiveheengeRaajje#FreePresidentYameen pic.twitter.com/pEFrYsWXyF
— Progressive Party of Maldives (@ProgressPartyMV) September 6, 2023
މުޢިއްޒު ވިދާޅުވެފައިވަނީ "ފުށިދިއްގަރު" ފަޅު ހިއްކާ އެމަޝްރޫޢުވެސް ކުރިއަށްގެންދަވާނެކަމަށެވެ. އެގޮތުން އެފަޅުން 1280 ހެކްޓަރު ހިއްކާ 11000ގޯއްޗާއި، 26000އަށްވުރެ ގިނަ ފްލެޓް ދޫކުރައްވާނެކަމަށެވެ. އަދި މިސަރަޙައްދު ބްރިޖުންނާއި، ހައި ސްޕީޓް ފެރީން ގުޅާލައްވާނެކަމަށެވެ.
މީގެއިތުރުން މާލޭގައި ހުންނަ ސިނަމާލެ، މާލެހިޔާ ފްލެޓްތައް އަދި ވިލިމާލޭގައި ހުރި ސިނަމާލެ ފްލެޓްތައް ތަޅާލާ، އާފްލެޓްތަކެއް އަޅާދެއްވުމަށް މުއިއްޒު ވަޢުދުވެވަޑައިގެންނެވިއެވެ. އަދި ވިލިމާލޭގައި އިމާރާތްކުރެވޭ އުސްމިން 10 ބުރިއަށް ބަދަލުކުރެއްވުމަށްވެސް މެނިފެސްޓޯގައި ހިމަނުއްވާފައިވެއެވެ. މީގެއިތުރުން މާލޭގެ ބޭނުން ނުހިފާ ހުރި ބިންތައް ހުސްކޮށް، 2000 ހައުސިން ޔުނިޓް ޤާއިމުކުރެއްވުމަށާއި، އަތޮޅުތަކުގައި ހަައުސިން މަޝްރޫޢުތައް ހިންގެވުމަށްވެސް މެނިފެސްޓޯގައި ހިމަނުއްވާފައިވެއެވެ.
މުޢިއްޒު ވިދާޅުވެފައިވަނީ ހުޅުމާލެ އެޗްޑީސީގެދަށުން މިނިވަންކޮށް، ޤާނޫނުގައި ބުނާގޮތަށް މާލެ ސިޓީ ކައުންސިލްގެ ދަށަށް ބަދަލުކުރައްވާނެ ކަމަށެވެ.
