ބީސީސީއިން ހިންގަމުންދާ އެސްއެމްއީ ހަބުގެ ދެވަނަ ފަންގިފިލާ ހުޅުވައިފި

ބީސީސީއިން ހިންގަމުންދާ އެސްއެމްއީ ހަބުގެ ދެވަނަ ފަންގިފިލާ ހުޅުވައިފިއެވެ.

ރާއްޖޭގެ ކުދި އަދި މެދުފަންތީގެ ވިޔަފާރިތަކަށް ބާޒާރު ހޯދައި ދިނުމަށް ބިޒްނަސް ސެންޓަރ ކޯޕަރޭޝަނުން ކުރަމުންދާ މަސައްކަތްތަކުގެ ތެރެއިން 2022 ވަނަ އަހަރުގެ ޑިސެންބަރު މަހުގެ ތެރޭގައި ހުޅުވި އެސްއެމްއީ ހަބަކީ ވަރަށް ކާމިޔާބުކަމާއެކު ހިދުމަތް ފޯރުކޮށްދެވެމުންދާ ތަނެކެވެ. މިފަދަ ހަބެއް ހުޅުވުމުގެ މަޤްސަދަކަށްވީ ގޭތެރޭގައި މަސައްކަތްކުރަމުން އައި ކުދި ވިޔަފާރިތަކަށް، ބޮޑު ޚަރަދެއް ކުރަން ނުޖެހި، ކުޑަ ވިޔަފާރިއެއް ހިނގުމުގެ ތަޖުރިބާ ކޮށްލުމަށް މަގުފަހި ކޮށްދިނުމެވެ. މީގެ އިތުރުން، ހަބްގައި ވިޔަފާރިކުރައްވާ ފަރާތްތަކަށް ބޭނުންވާ ފަންނީ އެހީތެރިކަން ފޯރުކޮށްދީ، އެ ވިޔަފާރިތައް އިތުރު ހަރުފަތަކަށް ގެންދިއުމަށް އެހީތެރިވެދިނުމެވެ.

އެސްއެމްއީ ހަބުގެ ގްރައުންޑް އަދި ފުރަތަމަ ފަންގިފިލާއިން ޖުމްލަ 90 އަށް ވުރެ ގިނަ ކުދި ވިޔަފާރިތަކަށް ފުރުސަތު ދީފައިވާއިރު އެސްއެމްއީ ހަބު މިހާރު ވެފައިވަނީ އާންމުންގެ މެދުގައި މަގްބޫލު ތަނަކަށެވެ. މިވަގުތު އެސްއެމްއީ ހަބުގައި ހިންގަމުން އަންނަނީ ފޮތް ވިއްކާ ފަރާތްތަކާއި، ގަސް ވިއްކާ ފަރާތެއްގެ އިތުރުން ކާބޯތަކެތި ވިއްކާ ވިޔަފާރިތަކެވެ. އެސްއެމްއީ ހަބް ވެގެން ގޮސްފައި މިވަނީ ކުދި ވިޔަފާރިތަކަށް ލިބުނު ރަނުގެ ފުރުސަތަކަށެވެ.

އެސްއެމްއީ ހަބުގެ ޚިދުމަތް ފުޅާކޮށް، އިތުރު ސިނާއަތްތައް ހިމެނޭހެން ގިނަ ކުދި ވިޔަވާރިތަކަކަށް ފުރުސަތު ދިނުމަށް، އެސްއެމްއީ ހަބުގެ 2 ވަނަ ފަންގިފިލާ މިރޭ ވަނީ ހުޅުވާފައެވެ. އެސްއެމްއީ ހަބުގެ ދެވަނަ ފަންގިފިލާ ހުޅުއްވައިދެއްވީ އިގްތިސާދާ ބެހޭ ވުޒާރާގެ ސްޓޭޓް މިނިސްޓަރ އަލްފާޟިލާ ނީޒާ އިމާދެވެ. ނީޒާގެ ވާހަކަފުޅުގައި ވަނީ ކުދި ވިޔަފާރިތަކަށް މިފަދަ އިތުރު ހަބުތަކެއް ރާއްޖޭގެ އެކި ސަރަހައްދުތަކުގައި ހުޅުވުމުގެ މަސައްކަތް ކުރިއަށްދާކަން ފާހަގަކުރައްވާފައެވެ. އެގޮތުން އައްޑޫ ސިޓީއާއި ކުޅުދުއްފުށީ ސިޓީގައި ހަބުތަކެއް ހުޅުވި ވަރަށް އަވަހަށް ހިދުމަތް ދޭން ފަށާނެކަމަށް ނީޒާ ވިދާޅުވިއެވެ.

އެސްއެމްއީ ހަބުގެ ދެވަނަ ފަންގިފިލާއިގައި ސެލޫނަކާއި، އާޓް އެންޑް ކްރާފްޓް އަދި ގާމެންޓަށް ހާއްސަ ކިއޮސްކްތައް ހުންނާނެވެ. އަދި ކުރެހުންތެރިންގެ މަސަކަތްތައް ޕްރޮމޯޓް ކުރުމަށް ގެލެރީއަކާއި ގޭމިންގ އޭރިއާއެއްގެ އިތުރުން ކުޑަކުދިންނަށް ހާއްސަ ޕްލޭ އޭރިއާއެއް ހިމެނޭނެއެވެ. އަދި ހަމަ އެހެންމެ ދިވެހި އުފެއްދުންތައް އުފައްދާ ފަންނާނުންނަށް ހާއްސަކޮށްގެން މިތަނުގައި ޤާއިމްކޮށްފައިވާ މިނީ ސިނަމާ ކައިރި މުސްތަގުބަލެއްގައި ހުޅުވިގެންދާނެއެވެ.

އެސްއެމްއީ ހަބްގެ ދެވަނަ ފަންގިފިލާ ހުޅުވުމުގެ ރަސްމިއްޔާތުގައި އިކޮނޮމިކް މިނިސްޓްރީގެ ބައެއް އިސްވެރިންނާ، ސްޓޭޓް ޓްރޭޑިންގ އޯގަނައިޒޭޝަންގެ މެނޭޖިންގ ޑިރެކްޓަރ ސައީދު ބައިވެރިވަޑައިގެންނެވިއެވެ.