ބޮލީވުޑްގެ ކުރީގެ މަޝްހޫރު އެކްޓަރު ސަނީ ޑިއޯލް ގެ ހަދު ދަރިފުޅު ރަޖްވީރު ޑިއޯލް ބޮލީވުޑަށް ތައާރަފްވާ ފިލްމް "ދޯނޯ" ސިނަމާތަކުގައި އަޅުވާނީ އަންނަ އޮކްޓޯބަރު މަހުގެ 5 ވަނަ ދުވަހުގައިއެވެ.
އަންނަ މަހުގެ 5 ގައި ސިނަމާތަކަށް ގެންނަން ހަމަޖެހިފައިވާ ފިލްމަކީ ބޮލީވުޑްގެ މަޝްހޫރު އެކްޓަރު ސަނީ ޑިއޯލްގެ ހަގު ދަރިފުޅު ރަޖްވީރު ޑިއޯލް އާއި މިހާރު ވަރަށް މަދުން ނޫނީ ފިލްމުތަކުން ނުފެންނަ ކުރީގެ މަޝްހޫރު ބަތަލާ ޕޫނަމް ދިލަންގެ ދަރިފުޅު ޕަލޯމާ ތަކޭރިއާ ދިލަން ތައާރަފުކުރާ ފިލްމެވެ. ސަނީ އާއި ޕޫނަމަކީ ކުރިން އެކީގައި ފިލްމުތަކެއް ކުޅެފައިވާ ދެ ތަރިންނަށްވާތީ، އެ މީހުންގެ ދަރިންތަކެއްގެ ކެމިސްޓްރީ ފިލްމަކުން ބަލާލުން ވާނީ ފޭނުންނަށް ހާއްސަ ކަމަކަށެވެ.
ރާޖްވީރު ބޮލީވުޑްއަށް ތައާރަފް ވާއިރުގައި އޭނާގެ ބޭބެ އަދި ސަނީ ގެ ދޮށީ ދަރިފުޅު ކަރަން ޑިއޯލް ވަނީ "ޕަލްޕަލް ދިލްކޭ ޕާސް" ކިޔާ ފިލްމް އަކުން 2019 ވަނަ އަހަރު ބޮލީވުޑް އަށް ތައާރަފްވެފައިއެވެ.
މީޑިއާތަކުން ބުނީ މި ފިލްމަކީ ޑެސްޓިނޭޝަން ވެޑިންއަކަށް ބިނާކޮށް ހަދާ އާއިލީ ލޯބީގެ ފިލްމެއް ކަމަށެވެ. ރާޖްވީރު ލީޑު ރޯލުން ފެނިގެންދާ މި ފިލްމްގެ ބަތަލާގެ ރޯލު ކުޅޭނީ ކުރީގެ މަޝްހޫރު ބަތަލާ ޕޫނަމް ދިލަންގެ ދަރިފުޅު ޕަލޯމާ ތަކޭރިއާ ދިލަން، 27، އެވެ.
View this post on Instagram
މި ފިލްމު ހަދާފައި ވަނީ އަލަށް ނުކުތް ޑައިރެކްޓަރު އަވްނީޝް ބަރްޖަތިއާ އެވެ. އޭނަ އަކީ "މޭނޭ ޕިޔާރު ކިޔާ" އާއި "ހަމް އާޕް ކޭ ހޭ ކޯން" އަދި "ހަމް ސާތު ސާތު ހޭ" ފަދަ މަޝްހޫރު އާއިލީ ލޯބީގެ ފިލްމުތައް ގެނެސްދިން ޑައިރެކްޓަރު ސޫރަޖް ބަރްޖަތިއާގެ ދަރިއެކެވެ. "ދޯނޯ" އަކީ ސޫރަޖްގެ އާއިލީ ފިލްމު ކުންފުނި ރާޖްޝްރީން ގެނެސްދޭ އެއްޗެކެވެ.
އެ ޕްރޮޑަކްޝަން ހައުސްގެ އެންމެ ފަހުގެ ފިލްމަކީ ސޫރަޖްގެ މިދިޔަ އަހަރުގެ "އޫޗާއީ" އެވެ.
