ކުރިއަށް އޮތް ރިޔާސީ އިންތިހާބު ކާމިޔާބުކޮށް ވެރިކަމަށް ވަޑައިގެންފި ނަމަ، މާލެ އާއި ރަށް ރަށުގައި ހުރި ފެނާއި ކަރަންޓުގެ އަގު އެއް އަގަކަށް ހަދައި ކަރަންޓާއި ފެން ބިލްގެ ހުރިހާ ޖޫރިމަނާއެއް މާފްކޮށް ދެއްވާނެ ކަމަށް ޖުމްހޫރީ ޕާޓީ (ޖޭޕީ) ގެ ރިޔާސީ ކެންޑިޑޭޓު ގާސިމް އިބްރާހިމް މިރޭ ވިދާޅުވެއްޖެއެވެ.
ރިޔާސީ ކެމްޕޭންގައި މިރޭ ތިނަދޫސިޓީގެ ރައްޔިތުންނާއި ބައްދަލުކުރައްވައި ވާހަކަ ދައްކަވަމުން ގާސިމް ވިދާޅުވީ ރާއްޖޭގެ ރައްޔިތުން އެދޭ ތަރައްޤީއާ ތަހުޒީބު ހޯއްދަވާދެއްވާނެ ކަމަށާއި އެކަމަށް އެމަނިކުފާނު ހުންނެވީ ޖޯޝާއެކު ތައްޔާރުވެގެން ކަމަށެވެ. ތިނަދޫސިޓީއާ މިސަރަހައްދުގެ ރައްޔިތުން އުންމީދު ކުރަމުންދާ މަޝްރޫއުތައް އެމަނިކުފާނުގެ ވެރިކަމެއްގައި ފުރިހަމަކޮށްދެއްވާނެ ކަމަށް ގާސިމް ވިދާޅުވިއެވެ.
ގާސިމް ވިދާޅުވީ ކާޑެއްދޫ އެއާޕޯޓާއި މިސަރަހައްދުގެ މަސްވެރިކަމުގެ ސިނާއަތް އެހެން ލެވެލްއަކަށް ގެންގޮސްދެއްވާނީ އެމަނިކުފާނުގެ ވެރިކަމުގައި ކަމަށެވެ. އެމަކިފާނުގެ ވެރިކަމެއްގައި މަސްވެރިންގެ އަތުން މަސްގަންނަ އަގު މަދުވެގެން 26 ރުފިޔާއަށް ބޮޑުކޮށްދެއްވާނެ ކަމަށެވެ. މަސްވެރިކަމުގެ ސިނާއަތުގައި އެމަނިކުފާނު މިހާތަނަށް ކުރައްވާފައިވާ އިންވެސްޓްމަންޓްތައް ސަރުކާރުން ގާއިމްކޮށްފައިވާ ފެސިލިޓީޒް ތަކަށްވުރެ ފުރިހަމަ ވާނެ ކަމަށާއި ކަންކަން ކުރެވޭނީ ކަންކުރުމުގެ ހެޔޮނިޔަތާއި ގާބިލްކަން ހުރި ފަރާތްތަކަށް ކަމަށެވެ.
ގާސިމް ވިދާޅުވީ ގައުމުގެ މިނިވަންކަމާއި އިސްތިގްލާލަށް ކުރިމަތިވެފައިވާ ގޮންޖެހުންތަކަކީ މިއަދުގެ ގައުމުގެ ތަރައްޤީ މަޑުޖެހުމުންދާ ސަބަބު ކަމަށެވެ. މިސަރުކާރުން ރައްޔިތުންނަށް ވަނީ ޚިޔާނާތްތެރި ވެފައިކަމަށާއި ގައުމުގެ ފުދުންތެރިކަން އަމިއްލަ ޖީބަށް ޖަމާކުރަމުންދަނީ ގައުމު ފުޑާލާފައި ކަމަށް ގާސިމް ވިދާޅުވިއެވެ.
ގާސިމް ވިދާޅުވީ މާލެ އާއި ރަށްރަށުގައި ކަރަންޓާއި ފެނުގެ ކަންކަމުގައި ތަފާތު ކުރުން ގެންގުޅެމުންދާ ކަމަށެވެ. އަދި ޖޭޕީގެ ވެރިކަމެއްގައި މާލެއެކޭ، ރާއްޖެތެރެއެކޭ ތަފާތު ނުކުރައްވާނެ ކަމަށް ގާސިމް ވިދާޅުވިއެވެ.
އަޅުގަނޑުގެ ވެރިކަމެއްގައި އިރާދަކުރެއްވިއްޔާ ރާއްޖޭގެ ހުރިހާ ކަންކޮޅެއްގައި އޮންނާނީ އެއް އަގެއް. މާލެއެކޭ ރާއްޖެތެރެއެކޭ އަޅުގަނޑު ތަފާތެއް ނުކުރާނަން. އަދި މިހާތަނަށް ރާއްޖޭގެ ރައްޔިތުންގެ ތެރެއިން ކަރަންޓު ބިލާއި ފެނުގެ ބިލަށް ޖޫރިމަނާކޮށްފައިވާ ހުރިހާ ޖޫރިމަނާއެއް މާފް ކުރާނަން.
– ގާސިމް ވިދާޅުވިއެވެ.
މި ޖަލްސާގައި ގާސިމް ވަނީ ވިޔަފާރި ކުރާ ތަންތަނުން ޑަބަލްކޮށް، ފެނާއި ކަރަންޓު ބިލްގެ ފައިސާ ނުނެގޭނެ ކަމަށާއި އެކަން ވެސް ކުރެވޭނީ އެއް އަގެއްގައި ކަމަށް ވިދާޅުވެފައިވެއެވެ. ހާއްސަކޮށް، ސަބްސިޑީގެ އުސޫލުން ދޭން ޖެހޭ އެއްޗެއް ދޭނީ ވަރަށް ބަލާފައި ކަމަށް ވެސް ގާސިމް ވިދާޅުވިއެވެ.
ގާސިމް ވިދާޅުވީ މާލޭ ސަރަހައްދައް މީހުން ޖަމާކުރުމުގެ ބަދަލުގައި އެމަނިކުފާނު ގައުމު ބިނާ ކުރައްވާ ރާއްޖޭގެ ކަންކޮޅުތަކުގައި ގާއިމްކުރައްވާ ސިޓީތަކުގައި ތަހުޒީބު ވަސީލަތްތައް ގާއިމްކޮށް ފުރުޞަތުތައް އުފައްދައިގެންނެވެ. އެކަންކުރާނީ ދުނިޔޭގެ އެންމެ ތަހުޒިބު ސިޓީ ތަކުގެ ނަމޫނާއިއިންނާއި އެކަމުގެ އިލްމާއި ދިރާސާތައްކުރާ ކުރާ މާހިރުންގެ ލަފަޔާއި ބައިވެރިވުން ހޯދައިގެން ކަމަށެވެ.
ގާސިމް ވިދާލުވީ ބޭރުގައުމު ތަކުގެ ސިފައިން މިގައުމުގައި ބައިތިއްބާގެން ރައީސް ޞާލިހު އުޅުއްވަނީ ގައިގަތެޔޮ ދަމަންތޯ އެވެ. 25 އަހަރު ވަންދެން ރައްޔިތުންގެ މަޖިލީހުގައި އިދެ، ގާނޫނު އަސާސީ އާއި ގާނޫނުތައް ދަނެ، ގައުމުގެ ރައީސްކަން ލިބުމުން ޤާނޫނުއަސާސީ އާއި ގާނޫނު ތަކާއި ރައީސް ޞާލިހް ކަނޑައެޅިގެން ޚިލާފް ވެފައިވާކަމަށެވެ. މިއީ ރައްޔިތުންނަށް ދިން ކިހާބޮޑު ނިކަމެތިކަމެއްތޯ ގާސިމް ވިދާޅުވިއެވެ.
