އއ.މަތިވެރީ ފަޅު ހިއްކާ އެއާޕޯޓެއް އަޅާދޭނެ ކަމުގެ ޔަގީންކަން ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި މިއަދު ޑރ.މުއިއްޒު މަތިވެރިއަށް ވަޑައިގެންނެވުމުން އެރަށުން ވަނީ ވަރަށް ހޫނު މަރުޚަބާއެއް ދަންނަވާފައެވެ. މުއިއްޒު މަތިވެރިއަށް ދިއުމުން އެރަށު އެމްޑީޕީއަށް ނިސްބަތްވާ ބަޔަކު ވަނީ މުއިއްޒުއަށް ހަމަލާދޭންވެސް މަސައްކަތް ކޮށްފައެވެ.
ނަމަވެސް މިއަދު މަތިވެރި ރައްޔިތުންނާއި ބައްދަލުކޮށް ވާހަކަ ދައްކަވަމުން މުއިއްޒު އެފަދަ އެއްވެސް ކަންބޮޑުވުމެއް ފާޅުކޮށް އެވާހަކަ ދައްކަވާފައި ނުވެއެވެ. މުއިއްޒު ދެއްވި ޔަގީންކަމަކީ މަތިވެރީގެ ރައްޔިތުންގެ އެދޭ ތަރައްޤީ ކަށަވަރު ކޮށްދެއްވާނެ ކަމުގެ ޔަގީންކަމަށެވެ.
ރައީސް ޔާމީންގެ ވެރިކަމުގައި މަތިވެރިއާއި، އަދި އެނޫންވެސް ރާއްޖޭގެ ރަށްތަކަށް ގެނައި ތަރައްޤީ މިސަރުކާރުން އޮތީ ހުއްޓާލާފައިކަމަށް މުއިއްޒު ވިދާޅުވިއެވެ. މިފަސް އަހަރަކީ ތަރައްޤީ ހުއްޓި މަޑު ޖެހިފައި އޮތް ފަސް އަހަރު ކަމަށް މުއިއްޒު ވިދާޅުވިއެވެ. ނަމަވެސް ވެރިކަމާއި ހަވާލުވުމަށްފަހު އެކަން ބަދަލުކޮށް މިސަރުކާރުން ފަށާފައިވާ މަޝްރޫޢުތަކާއި ނުކުރެވި ހުރި އެތައް ކަމެއް ކޮށް ނިންމަދޭނެކަމަށް މުއިއްޒު ވިދާޅުވިއެވެ.
އަޅުގަނޑުމެން މިއަންނަނީ ރައީސް ޔާމީންގެ ތަރައްޤީ އަލުން އިޔާދަކުރުމަށް. މިފަސް އަހަރު ތަރައްޤީ އޮތީ ހުއްޓިފަ. އަޅުގަނޑުމެން މިއަންނަނީ އެކަން ބަދަލުކޮށް ތަރައްޤީ ބާރު ސްޕީޑުގައި ކުރިއަށް ގެންދަން.
– މުއިއްޒު ވިދާޅުވިއެވެ.
PPM PNC ge Riyaasee Candidate Dr. Mohamed Muizzu AA.Mathiveri ah vadaigennevun. @MMuizzu #Vote4Muizzu#DrMuizzuSembe#DhiveheengeRaajje #FreePresidentYameen pic.twitter.com/ITFZI6xFHl
— Progressive Party of Maldives (@ProgressPartyMV) September 5, 2023
މުއިއްޒުވަނީ މިޖަލްސާގައި މަތިވެރި ރައްޔިތުން އެންމެ ބޮޑަށް އެދިއެދި ތިބި ބިން ހިއްކުމާއި، އެއާޕޯޓްގެ މަސައްކަތް ކޮށްދެއްވާނެ ކަމުގެ ޔަގީންކަން ދެއްވާފައެވެ. މިއާއިއެކު މަތިވެރިއާއި، އއ.އަތޮޅުގައި ޓުވަރިޒަމް އިތުރަށް ފުޅާކުރުމަށް އިތުރު ރިސޯޓް ތަރައްގީކޮށް ޓުވަރިޒަމް ކުރިއަރުވައި ވަޒީފާގެ ގިނަ ފުރުސަތުތަކެއް ތަނަވަސް ކޮށްދެއްވާނެކަމަށެވެ.
