މާލޭގެ ބޭފުޅެއްގެ ކޮންޓްރޯލް ލ.އަތޮޅަށް އޮތް އޮތުން މިފަހަރުގެ ރިޔާސީ އިންތިޚާބުގައި ނިމުމަކަށް ގެންނެސް ލ.އަތޮޅުގެ ރައްޔިތުން މިނިވަންވާނެ އިންތިޚާބަކަށް މިއިންތިޚާބު ވެގެންދާނެކަމަށް ލ.އަތޮޅުގެ ކެމްޕޭނާއި ޕީޕީއެމް/ޕީއެންސީގެ ފަރާތުން އިސްކޮށް ހަވާލުވެ ހުންނެވި ފައިސަލް ވިދާޅުވެއްޖެއެވެ.
ރިޔާސީ ކެމްޕޭންގައި މިރޭ ލ. ގަމުގައި ބޭއްވި ފޯރިގަދަ ޖަލްސާގައި ވާހަކަ ދައްކަވަމުން ފައިސަލް ވިދާޅުވީ ލ.އަތޮޅުގެ ރައްޔިތުންނަކީ މާލޭގައި ހުންނަ ބޭފުޅަކު ބޭނުންވާހާ ގޮތަކަށް ކުރިއަށްދާން އޮތް އަތޮޅެއް ނޫންކަމަށެވެ. މިވީހާ ދުވަހު ލ.އަތޮޅުގެ ތަރައްޤީއާއި ކުރިއެރުން ހިފެހެއްޓިފައިވަނީ މިސަބަބަށް ޓަކައި ކަމަށާއި، ބޯގަންވިލާގޭ ފައްޔާޒު އިސްމާއިލް ވިދާޅުވާހާ ގޮތަކަށް ދެން ލ. އަތޮޅުގެ ރައްޔިތުން އާބަސް ނުވުނާނެކަމަށް ފައްޔާޒު ވިދާޅުވިއެވެ.
މިރޭ ލ.ގަމުގެ ޒުވާނުން މިސަރުކާރަށް ދިން މެސެޖަކީ ވަރަށް ވަރުގަދަ މެސެޖެއް ކަމަށާއި، މިއިންތިޚާބުގައިި ލ.އަތޮޅުގެ މެޖޯރިޓީ ޑރ.މުއިއްޒަށް ލިބުމުގައި ލ.އަތޮޅުގެ ޒުވާނުން ތިބިގޮތް މިރޭ ސާފުވެފައިވާކަމަށް ފައިސަލް ވިދާޅުވިއެވެ.
ފައިސަލް ވިދާޅުޥި މިއިންތިޚާބު އެއްބުރުން ކާމިޔާބުކޮށް ރައީސް ޔާމީން މިނިވަން ކުރުމަކީ މިޤައުމުގެ ރައްޔިތުން އެދި ގޮވާ ގޮވުން ކަަމަށެވެ. އެކަން ކޮށްދެއްވާނީ ދިވެހި ރައްޔިތުންގެ ފުރިހަމަ ތާއީދާއިއެކު ޑރ.މުއިއްޒުކަމަށް ފައިސަލް ވިދާޅުވިއެވެ. ފައިސަލް ވަނީ މިއިންތިޚާބުގައި ލ.އަތޮޅުގެ މެޖޯރިޓީ ޑރ.މުއިއްޒަށް ހޯދުމުގައި ކުރެވެން އޮތް ހުރިހާ ކަމެއް ކޮށްދެއްވާނެކަމަށް ވިދާޅުވެފައެެވެ.
