މިސަރުކާރު ކޯލިޝަންގައި ހިމެނޭ އަދާލަތު ޕާޓީގެ ރައީސް ޝައިޚު އިމްރާނަކީ ދީނީ އިލްމުވެރިޔާ ޑރ.އަފްރާޝީމް ޢަލީގެ މަރާގުޅޭގޮތުން ބޮޑެތި ދޮގުހެދި މީހެއް ކަމަށާއި، އެހެންކަމުން ސިޔާސީ މަންފާއަށްޓަކައި އިމްރާން ކިތަންމެ ބޮޑު ގޮދެެއްވެސް ހަދާފާނެކަން ދިވެހި ރައްޔިތުން ގަބޫލު ކުރާނެކަމަށް ޑރ.މުއިއްޒުގެ ތަރުޖަމާން މުހައްމަދު ތޮލާލް ވިދާޅުވެއްޖެއެވެ.
ޕްރޮގްރެސިން ކޮންގްރެސް ކޯލިޝަނުން ކޮންމެ ދުވަހަކު ބާއްވަމުންދާ ސިލްސިލާ ނޫސްވެރިންގެ ބައްދަލުވުމުގެ ތެރެއިން މިއަދު ބޭއްވި ބައްދަލުވުމުގައި ތޮލާލް ވިދާޅުވީ އިމްރާނަށް ޑރ.މުއިއްޒު މާބޮޑަށް އެނގިވަޑައި ގަންނަވާކަމަށް ވިދާޅުވެ ދެއްކެވި އެއްވެސް ވާހަކައަކީ ހަގީގަތެއް ނެތް ދޮގުވާހަކެއް ކަމަށެވެ. އިމްރާނަކީ ޑރ.އަފްރާޝީމް މަރުގެ ތުހުމަތު ރައީސް ޔާމީންގެ އިސްތަށިފުޅުގައި އެޅުއްވުމަށްފަހު މަޖިލީހުގައި ސުވާލު ކުރުމުން އެއީ ސިޔާސީ ބޭނުމަށް ދެއްކެވި ވާހަކައެއް ކަމަށް ވިދާޅުވި ބޭފުޅެއްކަމަށް ތޮލާލް ވިދާޅުވިއެވެ.
ޕީޕީއެމް/ޕީއެންސީގެ ވެރިކަމެއް އައިސްގެން ރައީސް ޔާމީން ޖަލުން މިނިވަން ނުކުރާނެކަމަށް ވިދާޅުވެ އިމްރާން ވާހަކަ ދެއްކެވިއިރު ރައީސް ޔާމީން މިނިވަން ވާނީ އެމްޑީޕީގެ ވެރިކަމެއްގައިތޯ ތޮލާލް ވަނީ ސުވާލު ކުރައްވާފައެވެ. ރައީސް ޔާމީނަށް މާހެޔޮ އެދޭކަމަށް ވިދާޅުވެ އިމްރާން ވާހަކަ ދައްކަވާއިރު ހޯމް މިނިސްޓަރަކަށް ހުންނަވައިގެން ރައީސް ޔާމީން މިއަދުން މިއަދަށްވެސް ގެއަށް ބަދަލު ކޮށްލަން ވީނޫންތޯ ތޮލާލް ވަނީ ވިދާޅުވެފައެވެ.
އިމްރާނަކީ ކާކުކަން ކޮން ބޭފުޅެއްކަން ދިވެހި ރައްޔިތުންނަށް ނޯޅޭ. އިމްރާނަކީ ކަރުދާސް ރީމެއް ހިފައިގެން ހުރެ ޑރ.އަފްރާޝީމްގެ މަރުގެ ތުހުމަތު ރައީސް ޔާމީންގެ އިސްތަށިފުޅުގައި އަޅުއްވައި، އެކަން ބަލަން ޖެހުމުން އެއީ ސިޔާސީ މަގުސަދެއްގައި ދެއްކެވި ވާހަކައެއް ކަމަށް ވިދާޅުވި ދޮގުވެރިއެއް.
– ތޮލާލް ވިދާޅުވިއެވެ.
ތޮލާލް ވިދާޅުވީ އެމްޑީޕީގެ ރިޔާސީ ކެންޑިޑޭޓުންނާއި، އެމަނިކުފާނުގެ އަރިސް ބޭފުޅުން މިއަދު ކުޅެނީ ޑިފެންސަށް ކަމަށާއި، މިއިންތިޚާބު އެއްބުރުން ޑރ.މުއިއްޒު ކާމިޔާބު ކުރާތަން ފެނުމުން މިހާރު އޮތީ ސަރުކާރަށް ގޮތް ހުސްވެފައި ކަމަށެވެ. ތޮލާލް ވިދާޅުވީ މިއިންތިޚާބު ކާމިޔާބުކޮށް ރައީސް ޔާމީން މިނިވަން ވުމަކީ މިސަރުކާރަށް ހަޖަމް ނުކުރެވޭނެ ކަމެއްކަމަށްވެސް ތޮލާލް ވިދާޅުވިއެވެ.
