ސަރުކާރުން ކަންކަން ކުރާ ގޮތް ގޯސް ކަމުގައިވާނަމަ ސަރުކާރާއިއެކު ކޯލިޝަން ހަދައިގެން ނުތިއްބަވައި، ކޯލިޝަނުން ވަކިވެ ސަރުކާރަށް ފާޑުވިދާޅުވުމަށް އެމްޑީޕީގެ ރިޔާސީ ކެންޑިޑޭޓް ރައީސް ޞާލިހު ވިދާޅުވެއްޖެއެވެ.

ރައީސް ޞާލިހު މިހެން ވިދާޅުވީ ވެރިކަމުގެ ދެވަނަ ދައުރަކަށް އެމަނިކުފާނު ކުރިމަތިލި ލެއްވުމުން ކޯލިޝަންގައި ހިމެނޭ ޖުމްހޫރީ ޕާޓީގެ ފަރާތުންނާއި، އެމްއާރުއެމްގެ ފަރާތުން ރައީސް ޞާލިހަށް ތާއީދު ނުކޮށް ސަރުކާރަށް ފަޑުވިދާޅުވަމުންދާތީ މިއަދު ރާއްޖޭ ޓީވީގައި ވާހަކަ ދައްކަވަމުންނެވެ.

ރައީސް ޞާލިހު ވިދާޅުވީ ވެރިކަމަށް ވަޑައިގެންނެވީ ފަސް އަހަރު ދުވަހަކަށް ކޯލިޝަންގެ ތެރެއިން ވެރިކަން ކުރެއްވުމަށް ވައުދުވެގެން ކަމަށެވެ. ވެރިކަމުގެ ދައުރު ހަމަވުމާއި ހަމައަށްދާއިރު އެކަން ހާސިލް ކުރެވިފައިވާކަމަށް ރައީސް ވިދާޅުވިއެވެ. ކޯލިޝަން ހިފެހެއްޓުވީ ވަރަށް ގިނަ ގޮންޖެހުންތަކާއިއެކުގައި ކަމަށާއި ނަމަވެސް ކެތްތެރި ކަމާއިއެކު ކޯލިޝަން ހިފަހައްޓައި ހުރިހާ ބޭފުޅުންގެ ޚިޔާލާއި މަޝްވަރާއާއިއެކު ދައުރު ފުރިހަމަ ކުރެވެމުންދާ ކަމަށް ރައީސް ވިދާޅުވިއެވެ.

ވެރިކަމަށް ވަޑައިގެންނެވީ ފާޑުކިޔާނެކަން ގަބޫލުފުޅު ކުރައްވައިގެންކަން ފާހަގަކުރައްވާ ރައީސް ވިދާޅުވީ ސަރުކާރުގައި ތިބެ، ސަރުކާރުން މަސައްކަތް ކުރާގޮތް އެނބިތިބެ އެއާ ދެކޮޅަށް ވާހަކަދައްކަވާނީ އެއްވެސް އަޚުލާގެއް ނެތުމުން ކަމަށެވެ. ސަރުކާރުން ކަންކަން ކުރާ ގޮތުގައި މައްސަލަ ހުރިކަމަށް ގަބޫލުކުރެވޭނަމަ އެންމެ ރަނގަޅުގޮތަކީ ސަރުކާރާ ދުރަށް ދިއުން ކަމަށް ވެސް އެމަނިކުފާނު ވިދާޅުވިއެވެ.

ސަރުކާރުގެ ތެރޭގަ ތިއްބަވާއިރު ކަންތައް ކުރާ ގޮތް އެނގިވަޑައިގެން ތިއްބަވައި، އެއާ އިދިކޮޅަށް ވާހަކަ ދެއްކެވީމާ އަޅުގަނޑަށް ގަބޫލުކުރެވެނީ އެއީ އެއްވެސް ޑިސިޕްލިނެއް ނެތް ބޭފުޅުންނޭ. ސަރުކާރު ތެރޭގައި މައްސަލައެއް ހުރިނަމަ އެންމެ ރަނގަޅު ގޮތަކީ ބޭރަށް ވަޑައިގަތުން. ޚާއްސަކޮށް ރިޔާސީ އިންތިޚާބެއްގަ ކެމްޕޭނެއް ކުރަމުން އަންނައިރު ސަރުކާރުގެ ތެރޭގަ ތިއްބަވައިގެން މިކަހަލަ ކަންކަން ކުރުމަކީ އަޚުލާގީގޮތުން ދަށު ދަރަޖައިގެ ކަމެއް ކަމަށް އަޅުގަނޑަށް ގަބޫލުކުރެވެނީ.

– ރައީސް ވިދާޅުވިއެވެ.

ރައީސް ޞާލިހު މިހެން ވިދާޅުވިއިރު ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ޤާސިމް އިބްރާހިމާއި، އެމްއާރުމްގެ ރައީސްފާރިސް މައުމޫން ގެންދަވަނީ ރިޔާސީ އިންތިޚާބުގައި ވާދަކުރައްވާ ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ. މިބޭފުޅުން ވަނީ ރައީސް ޞާލިހު ވަނީ ޤާނޫނު އަސާސީއާއި ޤާނޫނުތަކާއި ކަނޑައެޅިގެން ޚިލާފް ވެފައިކަމަށާއި، ވެރިކަމުގެ ދެވަނަ ދައުރެއް ދޭންޖެހޭ ހަމަ އެއްވެސް ސަބަބެއް ނެތްކަމަށެވެ.