ޤާސިމް އިބްރާހީމް ކޮށްދެއްވާފައިވާ ކަންކަމުގެ ވާހަކަ ދެއްކެވުމަކީ ކަލަ ގޮވުން ނޫންކަމަށާއި، އެއީ ހަނދާންކޮށްދެއްވުންކަމަށް ޤާސިމްގެ އަނބިކަނބަލުން އަދި ޓްރާސްޕޯޓް މިނިސްޓަރ އާއިޝަތު ނަހުލާ ވިދާޅުވެއްޖެއެވެ. ނަހުލާ މިހެން ވިދާޅުވީ ޤާސިމްގެ ކެމްޕެއިން ޖަގަހަ ހެންވޭރުގައި ހުޅުވުމަށް ރޭ ބޭއްވި ހަފްލާގައި ވާހަކަފުޅު ދައްކަވަމުންނެވެ. ޤާސިމްގެ ކެމްޕެއިން ޖަގަހަ ހުޅުވައިދެއްވީވެސް ނަހުލާއެވެ.
ނަހުލާ މިފަދައިން ވިދާޅުވެފައިމިވަނީ ޤާސިމް އިބްރާހީމް ކެމްޕެއިނަށް ރަށްރަށަށް ވަޑައިގެން އެމަނިކުފާނު އެކި ރައްޔިތުންނަށް ވެދީފައިވާ އެހީތަކުގެ ވާހަކަ ތަކުރާރުކޮށް ދައްކާތީ އާންމުގެ ބައެއް ފާޑުކިޔުންތައް އަމާޒުވަމުން ދަނިކޮށެވެ. ޤާސިމްގެ އެފަދަ ވާހަކަތައް ޢާންމުން އަންނަނީ ސޯޝަލް މީޑިއާގައި ދައުރުކޮށް އެއީ ކަލަ ގޮވުންކަމަށް ބުނެ ފާޑުކިޔަމުންނެވެ.
އެ ވާހަކަތަކަށް ރައްދުދެއްވާ ޤާސިމްގެ އަނބިކަނބަލުން ނަހުލާ ވިދާޅުވީ، ގައުމަށް ކޮށްދެއްވާފައިވާ ކަންކަމުގެ ވާހަކަދެއްކެވިޔަސް އެއީ ކަލަގޮވުން ނޫން ކަމަަށެވެ. އެއީ ހަނދާންކޮށްދެއްވުންކަމަށް ވިދާޅުވެ ނަހުލާ ވަނީ ހަނދާންކޮށްދިނުމަކީ މުއުމިނުންގެ ސިފައެއް ކަމަށް ފާހަގަކުރައްވާފައެވެ.
ނަހުލާ ވިދާޅުވީ، ޤައުމުގެ މިނިވަންކަމާއި އިސްތިގްލާލަށްކަމަށްތަކައިވެސް ރާއްޖޭގެ ހާލަތު ވޯޓަކުން އެކަން ބަދަލުކުރުމަކީ ރައްޔިތުންގެ ބޮލުގައި އެޅިފައިވާ ޒިންމާއެއްކަމަށެވެ.
ނަހުލާ މިހެން ވިދާޅުވެފައިވާއިރު، މީގެ ކުރިން އެތައް ރައްޔިތުންނަށް ސިއްޙީ އެހީތެރިކަން ފޯރުކޮށްދީފައިވާނެކަމަށް ޤާސިމް ގެންދަވަނީ ކެމްޕެއިންގެ ސްޕީޗްތަކުގައި ވިދާޅުވަމުންނެވެ. އަދި ޤާސިމްގެ އެހީގައި މަތީ ތަޢުލީމް ހާސިލްކުރި ދަރިވަރުންގެ ލޯންތައް މަޢާފްކޮށްދެއްވާ އެވާހަކަވެސް ޤާސިމް ގެންދަވަނީ ތަކުރާރު ކުރައްވަމުންނެވެ.
ޤާސިމް ވިދާލުވީ މިފަހަރުގެ އިންތިޚާބުގައި ރައްޔިތުން ވޯޓު ލާންވީ މާޒީގައި ރައްޔިތުންނަށް ހެޔޮ ހިތުން ކަންކަން ކޮށްދެއްވާފައިވާ ކެންޑިޑޭޓަކަށްކަމަށާއި، އެ ކެންޑިޑޭޓަކީ އެމަނިކުފާނުކަމަށެވެ.
ކޮމެންޓު ފޮނުވާ