ރިޔާސީ އިންތިހާބުގެ ޝަކުވާތައް ބަލައިގަތުމަށްޓަކައި އަތޮޅުތަކުގައި ކޮމްޕްލެއިންސް ބިއުރޯ ގާއިމުކޮށްފިއެވެ.
އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ ރިޔާސީ އިންތިހާބުގެ ޝަކުވާ ބަލައިގަތުމަށް އައްޑޫ ސިޓީ، ފުވައްމުލަކު ސިޓީ، ކުޅުދުއްފުށި ސިޓީ ކޮމްޕްލެއިންޓްސް ބިއުރޯ އާއި ކޮންމެ އަތޮޅެއްގައި އަތޮޅު ކޮމްޕްލެއިންޓްސް ބިއުރޯ މިއަދުން ފެށިގެން ގާއިމުވެގެންދާނެ ކަމަށެވެ.
ކޮމްޕްލެއިންޓްސް ބިއުރޯއަށް ޝަކުވާ ހުށަހަޅާނީ ޝަކުވާ ފޯމުން ކަމަށާއި ޝަކުވާ ފޯމު ކޮމްޕްލެއިންޓްސް ބިއުރޯގެ އިތުރުން ކައުންސިލްތަކުގެ އިދާރާތަކުން ލިބޭނެ ކަމަށް ހަބީބު ވިދާޅުވިއެވެ.
ހަބީބު ވިދާޅުވި ގޮތުގައި ޝަކުވާ ބަލައިގަންނާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 08:00 ފެށިގެން މެންދުރުފަހު 3:00 އަށް އަދި ހުކުރު ދުވަހު މެންދުރުފަހު 2:00 އިން ހަވީރު 5:00 އަށެވެ. އަންނަ މަހުގެ ނުވަ ވަނަ ދުވަހު ބާއްވާ ރިޔާސީ އިންތިހާބުގެ ޝަކުވާތައް ބަލައިގަތުމަށް އިންތިހާބާބެހޭ މަރުކަޒު ދަރުބާރުގޭގައި މިދިޔަ ޖުލައި މަހުގެ ތެރޭގައި ގައުމީ ކޮމްޕްލެއިންޓްސް ގާއިމުކޮށް ދަނީ ޝަކުވާ ބަލައިގަންނަމުންނެވެ.
އިންތިޚާބާއި ގުޅޭ ޝަކުވާތައް ހުށަހަޅަން ބިއުރޯތައް ކަނޑައެޅި އިއްޔެ ބޭއްވި ޕްރެސްގައި އިދިކޮޅި ޕްރޮގްރެސިވް ކޯލިޝަން ވަނީ އިންތިޚާބު މިނިވަން ކަމާއި އިންސާފުވެރި ކަމާއިއެކު ބޭއްވުމަށް އިލެކްޝަނުން ކުރަންޖެހޭ މަސައްކަތް ނުކުރާކަމަށް ބުނެފައެވެ.
