އިލެކްޝަންސް ކޮމިޝަންގެ އިންތިހާބުގެ މައި މަރުކަޒު ހުންނަ ދަރުބާރުގެ ހިމެނޭ ސަރަހައްދުގެ އަމީނީމަގުގައި އެމްޑީޕީގެ ބެނާތައް ދަމާފައިހުރުމުން ބެނާތައް ނަގަން އަންގާފައި ވީނަމަވެސް އަދިވެސް ނަގާފައި ނުވާކަމަށް މައުލޫމާތު ލިބިއްޖެއެވެ.
ދަރުބާރުގެއަކީ މިފަހަރުގެ އިންތިޚާބީ މައި މަރުކަޒެވެ. ރިޔާސީ އިންތިޚާބާއި ގުޅުންހުރި މައިގަނޑު ހުރިހާ މަސައްކަތެއް ކުރަމުންދަނީ ދަރުބާރުގޭގައެވެ. އިސީން ވަނީ ޕޯޓް ކޮމްޕްލެކްސް އިމާރާތާއި ދަރުބާރުގޭގެ ކުރިމައްޗަށްވާ ގޮތަށާއި، އިންވެގެންވާ މަގުތަކާއި، ގޯޅިތަކުގައި އެއްވެސް ޕާޓީއެއްގެ އަދި އެއްވެސް ކެންޑިޑޭޓެއްގެ ކެމްޕޭން ދިދައާއި ބެނާ ދެމުމާއި ޕޯސްޓަރު ހަރުކުރުން ފަދަ ކަންކަން ނުކުރުމަށް ހުރިހާ ޕާޓީތަކަށްވެސް އަންގާފައެވެ.
ނަމަވެސް އެންގި ފަހުން އެމްޑީޕީން ވަނީ ދަރުބާރުގޭގެ ކުރިމަތީގައި ގިނަ އަދަދަކަށް އެމްޑީޕީގެ ބެނާތައް ދަމާފައެވެ. އެބެނާތައް ނެގުމަށް އީސީން އެމްޑީޕީއަށް އަންގާފައިވާތާ މިހާރު ވަނީ 3 ދުވަސް ވެފައެވެ. އެހެން ނަމަވެސް އަދިވެސް ބެނާތައް ނަގާފައި ނުވެއެވެ.
މައުލޫމާތު ލިބިފައިވާ ގޮތުގައިި އެމްޑީޕީން ބެނާތައް ދަމަމުންދަނީ މާލެ ސިޓީ ކައުންސިލުންވެސް ހުއްދަ ނުނަގައެވެ. ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ ކެމްޕޭން ބެނާތަކާއި ޕޯސްޓަރުތައް ހަރުކުރުން މިހާރު ވަނީ ވަރަށް ބޮޑަށް އިތުރުވެފަ އެވެ. ހާއްސަކޮށް މާލޭގައި މި ފޯރި ވަނީ ގަދަވެފަ އެވެ.
