ކުރިއަށް އޮތް ރިޔާސީ އިންތިޚާބު އޮތީ ފަސޭހަ ކަމާއިއެކު އެއްބުރުން ކާމިޔާބު ކުރެވޭ ގޮތަށް ކަމުގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ ކެމްޕޭންގައި މިރޭ މާލޭގައި ބޭއްވި އެމްޑީޕީގެ މެނިފެސްޓޯގެ އެންމެ ފަހުބައި އިފްތިތާހު ކުރުމަށް ގިނަ އަދަދެއްގެ ބަޔަކާއިއެކު ޒުވާނުންގެ މަރުކަޒުގައި ބޭއްވި ޖަލްސާގައި ވަރަށް ޖޯޝުގައި ވާހަކަ ދައްކަވަމުން ރައީސް ޞާލިހު ވިދާޅުވީ މިހާތަނަށް މުޅި ރާއްޖޭގެ އެކި ކަންކޮޅުތަކަށް ކުރެއްވި ދަތުރުތަކުން މިއިންތިޚާބު އެއްބުރުން ކާމިޔާބުވާތަން ފެންނަ ކަމަށެވެ.

ރައީސް ޞާލިހު ވަނީ މިރޭ އިންތިޚާބުގައި ވާދަކުރައްވާ ވާދަވެރި ކެންޑިޑޭޓުންނަށްވެސް ރައްދު ދެއްވާފައެވެ. ޕީއެންސީގެ ކެންޑިޑޭޓް ޑރ. މުއިއްޒަށް އިޝާރާތް ކުރައްވާ ރައީސް ވިދާޅުވީ އެއީ އަނިޔާވެރިކަމުގެ މާޒީއެއް އޮތް ފިކުރަކުން ވާދަކުރައްވާ ކެންޑިޑޭޓެއް ކަމަށެވެ. އެހެން ކަމުން ދެވަނަ ފަހަރަށް އެއަނިޔާވެރިކަމަށް ޖާގަ ދީގެން ނުވާނެކަމަށެވެ.

ރައީސް ވިދާޅުވީ މާލެއާއި މުޅި ރާއްޖެއިން ފެންނަނީ އިންތިޚާބު އެއްބުރުން ކާމިޔާބު ކުރެވޭތަން ކަމަށެވެ. ނަމަވެސް އިންތިޚާބުގައި އަމިއްލަ މަންފާއަކަށްޓަކައި، އިންތިޚާބު ދެވަނަ ބުރަކަށް ގެންގޮސްގެން ބައިއަޅަން އުޅުއްވާ ބޭފުޅުން ތިއްބެވި ކަމަށާއި، އެފުރުސަތު ނުދެއްވުމަށް ރައީސް ޞާލިހު ވަނީ ގޮވާލާފައެވެ.

މިއިންތިޚާބު އަޅުގަނޑުމެން ކާމިޔާބު ކުރާނީ އެއްބުރުން، އެއްބުރުން، އެއްބުރުން، އަމިއްލަ މަސްލަހަތަށް މަސައްކަތް ކުރައްވާ ބޭފުޅުންނަށް މިއިންތިޚާބު ދެވަނަ ބުރަކަށް ގެންދަން ތިޔަބޭފުޅުން ފުރުސަތު ދެއްވައިގެން ނުވާނެ، ދެއްވާނަންތޯ، އާދެ އަޅުގަނޑުމެން މިއިންތިޚާބު ކާމިޔާބު ކުރާނީ އެއްބުރުން.

– ރައީސް ޞާލިހު ވިދާޅުވިއެވެ.

ރައީސް ވިދާޅުވީ 2018 ވަނަ އަހަރު ރިޔާސީ އިންތިޚާބުގައި ކުރިމަތިލާނެ ވާދަވެރި ކެންޑިޑޭޓެއް ނެތިގެން އެކަންބޮޑުވުން ފާޅުކުުރި ހަނދާން އަދި ނުނެތޭކަމަށެވެ. ސިޔާސީ ހުރިހާ ވެރިން ޖަލަށްލައި، ވާދަކުރެވޭނެހެން ބެލެވުނު އެންމެން ތިބީ ޖަލުގައިކަމަށެވެ. ނަމަބެސް މިއަދު އެހާލަތު ބަދަލުވެ މިއިންތިޚާބުގައި 8 ކެންޑިޑޭޓުން ވާދަކުރުމަކީ ރާއްޖޭގައި ޚިޔާލް ފާޅު ކުރުމާއި އެއްވެ އުޅުމާއި، ސިޔާސީ ބޭނުން ފިކުރަކަށް ތާއީދުކޮށް ކުރިއަށް ދިއުމުގެ ފުރުސަތު އޮތްކަން ހާމަވާ ރީތި މިސާލެއް ކަމަށެވެ.

ބޮޑުތަނުން ނިމިއްޖެ. މީ އެމްޑީޕީ. މި ޖޯޝާއި ފޯރި 💛⚖️

‘ޒަމާނަކުން އައި ޒަމާނެއް، އިގްތިސާދީ މެނިފެސްޓޯ އިއުލާންކުރާ ޖަލްސާގެ ތެރެއިން #ZamaanakunAiZamaaney
#IbuAslam2023
#UfaaveriAmaanRaajje pic.twitter.com/r8h2GYGkFC

— Hussain Shafiu #Ibu2023 (@charly_thuthu) August 24, 2023

ރައީސް ޞާލިހު ވިދާޅުވީ މިއިންތިޚާބުގައި ދިވެހި ރައްޔިތުން ދެވަނަ ބުރެއް ބޭއްވުމަށް ނޭދޭކަމަށެވެ. އަމާޒަކީ އެއްބުރުން އިންތޮިޚާބު ކާމިޔާބު ކުރުންކަމަށެވެ.