އަޅުގަނޑުގެ ކިބައިން ފެންނާނީ ރައްޔިތުންގެ އަޑު އަހައިގެން ނަތީޖާ ނެރޭ ވެރިކަމެއް ކުރާތަން ކަމުގައި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭމްގައި ނ.ހޮޅުދޫގައި ގިނަ އަދަދެއްގެ ބަޔަކާއިއެކު ބޭއްވި ޖަލްސާގައި ވާހަކަފުޅު ދައްކަވަމުން ޑރ. މުއިއްޒު ވިދާޅުވީ މިސަރުކާރުގެ މިވޭތުވެދިޔަ ފަސް އަހަރަކީ ދިވެހި ރައްޔިތުންނަށް ހިތްދަތިކަން ތަހައްމަލު ކުރި ފަސް އަހަރު ކަމަށެވެ. މިފަސް އަހަރަކީ ދިވެހި ރައްޔިތުންނަށް ތަރައްޤީގައި ބޭކާރުވެގެން ދިޔަ ފަސް އަހަރު ކަމަށެވެ.
މުއިއްޒު ވިދާޅުވީ މިސަރުކާރުގެ ތަރައްޤީގެ ސްޕީޑާއި ތަރައްޤީ ގެނައުމުގައި ކުރާ މަސައްކަތް މާލޭގެ އަމީނީ މަގު ހެދުމަށް ކުރަމުންދާ މަސައްކަތުންވެސް މާ ސާފުކޮށް ފެންނަ ކަމަށެވެ. އަމީނީ މަގު ހެދުމަށް ދެގުނަ ބޮޑު އަގެއްގައި ބަޔަކާއި ހަވާލުކޮށްގެން ބާރަށް ދާނެ ކަމަށް އުންމީދު ކުރިނަމަވެސް މަގުގެ މަސައްކަތް ކުރެވޭ ގޮތް ދިވެހި ރައްޔިތުންނަށް ފެންނާނެ ކަމަށް މުއިއްޒު ވިދާޅުވިއެވެ. މުއިއްޒު ވަނީ ހޮޅުދޫގައިވެސް މިސަރުކާރުން ހިންގާ މަޝްރޫޢުތައް އޮތީ އެފަދަ ހާލަތެއްގައި ކަމަށް ވިދާޅުވެފައެވެ.
މުއިއްޒު ވިދާޅުވީ ޕީޕީއެމް، ޕީއެންސީގެ ލީޑަރޝިޕަކީ ޤައުމުގެ ވެރިކަމަށް ފައްކާ ވެފައިވާ އެކަމުގެ ތަޖުރިބާއާއި ގާބިލްކަން އޮތް ޓީމެއް ކަަމަށެވެ. މި ފަސްއަހަރު އެއްވެސް ސީރިއަސް ކަމެއް ނެތި ސިޔާސީ މަޤާމުތަކުގައި ތިއްބެވި ބޭފުޅުން ފިނި ކޮޓަރީގައި ތިއްބަވައިގެން ފަސް އަހަރު ނިންމާލިޔަސް، ކުރިއަށް އޮތް ފަސް އަހަރަކީ ރައްޔިތުންނާއި ގާތަށް ސިޔާސީ ބޭފުޅުންނާއި، އަދި ޚުދުމު އޭނާވެސް ވަޑައިގެން ކުރައްވާނެ ވެރިކަމެއް ކަމަށެވެ.
އަޅުގަނޑުމެން ޔަގީންކޮށް އަރުވަން ތިޔަބޭފުޅުންނަށް ޚިދުމަތް ކުރުމުގައި ތިޔަބޭފުޅުންގެ އަޑު އަހައިގެން 24 ގަޑިއިރު މަސައްކަތް ކުރާނަން. އަޅުގަނޑުމެން ވާ ވައުދަކީ ފުއްދާނެ ވައުދުތަކެއް. މިހާތަނަށްވެސް ވާނީ އެކަން ސާބިތުކޮށް ދީފަ.
– މުއިއްޒު ވިދާޅުވިއެވެ.
މުއިއްޒު ވަނީ ހޮޅުދޫ ރައްޔިތުންނަށް ބޭނުންވާ ކަންކަން ކޮށްދެއްވާނެ ކަމުގެ ޔަގީންކަން ދެއްވާފައެވެ. އެގޮތުން ފެނުގެ މަޝްރޫޢު ބާރު ސްޕީޑުގައި ކުރިއަށް ގެންގޮސް ނިންމާ ދޭނެކަމަށް މުއިއްޒު ވިދާޅުވިއެވެ. އަދި އެރަށުގައި ސްކޫލެއް އަޅާ ދިނުމާއި، ގެދޮރު ވެރިކަން ކަށަވަރު ކޮށްދެއްވުމާއި، މަގު ހެދުމުގެ މަޝްރޫއުވެސް ބާރު ސްޕީޑުގައި ގެންގޮސް ނިންމާނެ ކަމުގެ ޔަގީންވަނީ ދެއްވާފައެވެ.
PPM PNC Riyaasee Candidate Dr Mohamed Muizzu N.Holhudhoo Rayyithunnaa badhdhalu kurevvun @MMuizzu#Vote4Muizzu #DrMuizzuSembe#DhiveheengeRaajje #FreePresidentYameen pic.twitter.com/FczzrDeZ5v
— Progressive Party of Maldives (@ProgressPartyMV) August 24, 2023
މުއިއްޒު ވަނީ މިޖަލްސާގައިވެސް ރައްޔިތުން ވެރިކަން ހަވާލު ކުރައްވައިފިނަމަ ޤާނޫނީ ހަމަތަކުގެ މަތީން ފުރަތަމަ ކުރައްވާނެ ކަމަކީވެސް ރައީސް ޔާމީން މިނިވަން ކުރުންކަމަށް ވިދާޅުވެފައެވެ.
