އެމްޑީޕީގެ ބައެއް މެންބަރުން އެޕާޓީން ވަކިވެވަޑައިގެން އުފެއްދެވި ދަ ޑިމޮކްރެޓްސްއަށް މިފަހަރުގެ ރިޔާސީ އިންތިޚާބުގައި ފުރަތަމަ ތިން ވަނަވެސް ނުލިބޭނެކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. ރައީސް މިހެން ވިދާޅުވީ ކެމްޕެއިންގައި ރ އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅު ހުޅުދުއްފާރަށް ވަޑައިގެން ވާހަކަފުޅު ދައްކަވަމުންނެވެ.
ރައީސް ވިދާޅުވީ އެމްޑީޕީއަށް ކުޑަ ލޮޅުމެއް މިފަހުން އައިކަމަށެވެ. ދަ ޑިމޮކްރެޓްސްގެ ނަން ވިދާޅުނުވެ ވާހަކަފުޅު ދައްކަވަމުން ރައީސް ވަނީ، އެމްޑީޕީގެ ވޯޓު ބާކީ ނުކުރުމަށް އިލްތިމާސްކުރައްވާފައެވެ. ރައީސް ވިދާޅުވީ އެމްޑީޕީން ވަކިވެގެން ދިޔަ މެންބަރުންނާ ދޭތެރޭ އެކި ރަށްރަށުގެމީހުންގެ ވިސްނުން ހުރި ގޮތް ވަރަށް ސާފުކޮށް އެމަނިކުފާނަށް އެނގިވަޑައިގަންނަވާކަމަށެވެ. މި އިންތިޚާބުގައި 1ވަނަ، 2ވަނަ އަދި 3ވަނަ އާއިހަމައަށްވެސް އެމީހުންނަށް މި އިންތިޚާބުގައި އާދެވޭނެކަމަށް ޤަބޫލުފުޅު ނުކުރެވޭކަމަށް ރައީސް ވިދާޅުވިއެވެ.
ރަނގަޅަށް ވާދަކުރަން ބޭނުންވާކަމަށް، މިއުޅެނީ އިނގިރޭސިވިލާތުގައިނަމަ ޕްރިމިއަރ ލީގުގެމެޗެއް. ބަދަލު ކުޅުންތެރިން އަރުވައިގެންކާމިޔާބެއް ނުވާނެ. ފުލް ޓީމް ކުޅެން އަރަންވާނީ. އަޅުގަނޑު މިތިބީ ފުލް ޓީމާއެކީ. އިރާދަކުރެއްވިއްޔާ މި އިންތިޚާބު އަޅުގަނޑުމެން ކާމިޔާބުކުރާނީ ބޮޑު ތަފާތަކުން އެއްބުރުން.
– ރައީސް ވިދާޅުވިއެވެ.
ރައީސް މިހެން ވިދާޅުވެފައިވާއިރު އެމްޑީޕީގެ އެތެރޭގައި އުފެދުނު ޚިޔާލުތަފާތުންތަކުގެ ތެރެއިން ބައެއް މަޖިލިސް މެންބަރުން އެޕާޓީން ވަކިވެވަޑައިގެން އުފެއްދެވި ދަ ޑިމޮކްރެޓްސް އިންވެސް މިފަހަރުގެ ރިޔާސީ އިންތިޚާބުގައި ވާދަކުރައްވައެވެ. އެޕާޓީން ނެރެފައިވާ ކެންޑިޑޭޓަކީ ހުޅުދޫ ދާއިރާގެ މެންބަރު އިލްޔާސް ލަބީބެވެ. އަދި ރަނިން މޭޓަކީ މިސަރުކާރުގެ އެސްޓީއޯގެ ފުރަތަމަ މެނޭޖިންގ ޑިރެކްޓަރ ޙުސައިން ޢަމްރެވެ. އެޕާޓީންވެސް އަންނަނީ ރިޔާސީ އިންތިޚާބަށް މެނިފެސްޓޯއާއި ސިޔާސަތު ޢާންމުކޮށް، ރަށްރަށްވަޑައިގެން ކެމްޕެއިން ކުރައްވަމުންނެވެ. އެންމެ އިސްކޮށް ހުންނެވީ ރައީސް ޞާލިޙްގެ ޒަމާންވީ ގާތް ރަޙްމަތްތެރިޔާ އަދި މަޖިލީހުގެ ރައީސް މުޙައްމަދު ނަޝީދެވެ.
ހުޅުދުއްފާރުގައި ވާހަކަފުޅު ދައްކަވަމުން ރައީސް ވިދާޅުވީ، ރާއްޖޭގެ ރައްޔިތުންގެ އަސާސީ ޚިދުމަތްތައް ފޯރުކޮށްދިނުމަށް މިސަރުކާރުން ވަރަށް ގިނަ މަސައްކަތް ކުރަން ޖެހުނުކަމަށެވެ. ޚާއްޞަކޮށް ސިއްޙީ ދާއިރާގެ ޚިދުމަތް ރަނގަޅުކުރުމަށް ގިނަ ކަންތައްތަކެއް ކުރެވުނުކަމަށް ރައީސް ވިދާޅުވިއެވެ.
އަޅުގަނޑުމެން ވެރިކަމަށް އާއިރު 127 ރަށުގަ އޭރު ނެތް އެމްބިއުލާންސެއް. މިހިސާބުން އަޅުގަނޑުމެން މަސައްކަތް ފަށްޓައިފިން. ކަރަންޓުގެ ހާލަތު އޮތީ އެގޮތަށް. ފެނާ ނަރުދަމާގެ ޙާލަތު އޮތީ އެގޮތަށް. ލަފާފުރުމުގެ ދަތިކަން ގިނަ ރަށްރަށުގައި ހުރީ އެގޮތަށް. މިހެންގޮސް އިންސާނަކު ދިރިއުޅުމަށް މިޒަމާނުގައި ބޭނުންވާނެ ޒަރޫރީ ބޭނުމަށް ޖެހިފައިވާ ހާލަތު މި ދެންނެވީ. ފަށައިގަންނަން ޖެހުނީ އެހިސާބުން.
– ރައީސް ވިދާޅުވިއެވެ.
ރައީސް ވިދާޅުވީ، މިއަދު އިތުރު ދައުރަކަށް އެމަނިކުފާނު ކުރިމަތި ލެއްވިއިރު މަސައްކަތްތަތަކެއް ކޮށްދެއްވުންކަމުގެ ހިތްހަމަ ޖެހުން އެބައޮތްކަމަށެވެ. އެގޮތުން ދައުރު ނިމުމުގެ ކުރިން ހުރިހާ ރަށެއްގައި ފެނާ ނަރުދަމާ ނިންމޭނެކަމަށް ރައިސް ވިދާޅުވިއެވެ. ވަރަށް ގިނަ ރަށްތަކެއްގައި މަގުތައް ހެދުމާއި ކަރަންޓު ރަނގަޅު ކުރެވެމުންދާކަމަށްވެސް ރައީސް ވިދާޅުވިއެވެ.
