ދިވެހި ރާޢްޖެއަކީ މިނިވަން މުސްތަގިއްލު ޤައުމެއް ކަމަށާއި، ރާއްޖޭގެ މައްޗަށް ބަސް ކިޔޭގެ އެއްވެސް ޤައުމެއް އެއްވެސް ބަޔަކު ނުތިބޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ ކެމްޕޭންގައި ރ.އިނގުރައިދޫއަށް ވަޑައިގެން ދެއްކެވި ވާހަކަފުޅުގައި ރައީސް ޞާލިހު ވަނީ ރާއްޖޭގެ ޚާރިޖީ ސިޔާސަތާއި ގުޅޭގޮތުން ވާދަވެރި ފަރާތްތަކުން ދައްކަވާ ވާހަތަކަށް ރައްދު ދެއްވާފައެވެ. ރައީސް ވިދާޅުވީ ރާއްޖެއިން މިހާރު ޢަމަލު ކުރަމުންދަނީ ހުރިހާ ޤައުމަކާއިވެސް ގުޅިގެން އެކުވެރި ކަމާއިއެކު މަސައްކަތް ކުރުމަށް ކަމަށެވެ.

ރާއްޖޭގެ މައްޗަށް ބަސް ކިޔޭގެ، އަދި ގޮތްކިޔޭގެ އެއްވެސް ޤައުމެއް ނޯންނާނެކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ ދިވެހިންގެ މިނިވަންކަމާއި ސިޔާސަތާއި އިސްތިގުލާލަށް ކުޑަވެސް ލޮޅުމެއް އަންނަ ކަމެއް މިވެރިކަމުގައި ކޮށްފައި ނުވާނެކަމަށެވެ.

އަޅުގަނޑުމެންނަކީ މިނިވަން ޤައުމެއް. އަޅުގަނޑުމެން ބަސްބުނާނީ އަޅުގަނޑުމެން އަމިއްލައަށް. އޭގެ މައްޗަށް ބަސް ކިޔޭގެ ބަޔަކު ނިތިބޭނެ.

– ރައީސް ޞާލިހު ވިދާޅުވިއެވެ.

ރައީސް ވިދާޅުވީ، މީގެ ކުރިން ރާއްޖެއަކީ ކޮން ތަނެއްތޯ އާއި ގެންގުޅޭ ސިޔާސަތުތަކާއި އެހީ ހޯދުމަށް ދިޔަ ނަމަވެސް ގައުމުގެ އެތެރޭގެ ހާލަތު އޮތް ގޮތާއި، ދުނިޔޭގެ ގައުމުތަކާއި އޮތް ގުޅުމާއި ދޭތެރޭގައި ސުވާލު އުފައްދާ ކަމަށާއި، މިއަދު އެކަހަލަ އެއްވެސް ދައްޗެއް އަދި ސުވާލެއްވެސް ނުއުފެއްދާ ކަމަށެވެ.

މިއިންދަ މީހަކު ޖަލުގައި އެބަ އިނޭ، ކޮން ސަބަބަކާއި ހުރެތޯ، އޭނާ ޖަލުގައި އިނީ، އެއިން އެއްވެސް ސުވާލެއް އެއްވެސް ގައުމަކުން އަޅުގަނޑުމެންނާއި މިހާތަނަށް ކޮށްފައެއް ނެތް. އަޅުގަނޑުމެން ހިތުން އަޅުގަނޑުމެންގެ ސިޔާސަތުތައް ގައުމުތަކުން ބަލައިގެންފި.

– ރައީސް ވިދާޅުވިއެވެ.

ދުނިޔޭގެ އެހެން ގައުމުތަކާއި އެކަހެރިވެ އޮވެގެން އެއްވެސް ގައުމަކަށް ކުރިއެރުމެއް ނުލިބޭނެކަން ފާަހަގަކުރައްވަމުން ރައީސް ވިދާޅުވީ މިނިވަންކަމާއި ސަލާމަތާއި ރައްކާތެރިކަމާއި އަދި ތަރައްގީ ބާރު ސްޕީޑްގައި ކުރިއަށްގެންދަން ބޭނުންވާނަމަ ދުނިޔޭގެ ގައުމުތަކާއި އެކީގައި އިތުބާރު ހިފޭ ގުޅުމެއް ބާއްވަން ޖެހޭ ކަމަށެވެ.

ރައީސް ވިދާޅުވީ، ވެރިކަމުގެ އާރާއި ބާރު ހިފެހެއްޓުމަށްޓަކައި ގައުމިއްޔަތު ބޭނުންކޮށް މީހުން ބޮލަށް ވައްްދާ ކަމަށެވެ. އަދި މިހާރު ޒަމާން ބަދަލުވެފައިވާ ކަަމަށާއި، އެކަހެރިވެގެންވެސް ނުތިބެވޭނެ ކަަމަށް ރައީސް ވިދާޅުވިއެވެ.

ރައީސް މިހެން ވިދާޅުވި ނަމަވެސް މިސަރުކާރުން އަވަށްޓެރި އިންޑިއާއާއި ގާތް ގުޅުމެއް ބާއްވާ، ޚާރިޖީ ގޮތުން ވަރަށް ބޮޑަށް އިންޑިއާއަށް ބަރޯސާވެފައިވާކަމަށް އިދިކޮޅު ފަރާތްތަކުން ދަނީ ބުނަމުންނެވެ.