ކެމްޕޭނަށް މިހާތަނަށް ވަޑައިގެންނެވި އަތޮޅުތަކުން ފެނިގެންދިޔަ މަންޒަރަކީ މިއިންތިޚާބު ސާފު އައުލަބިއްޔަތަކުން ކާމިޔާބުވާތަން ކަމުގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިިމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ ކެމްޕޭންގައި މިރޭ ރ.ދުވާފަރުގައި ގިނަ އަދަދެއްގެ ބަޔަކާއިއެކު ބޭއްވި ފޯރިގަދަ ޖަލްސާގައި ވާހަކަ ދައްކަވަމުން ރައީސް ޞާލިހު ވިދާޅުވީ ކެމްޕޭންގައި މިހާތަނަށް 100 އަށްވުރެ ގިނަ ރަށްތަކަށް ދެވިފައިވާކަމަށެވެ. އަދި ވަޑައިގެންނެވި އަތޮޅުތަކުން ފެނިގެންދިޔައީ ބޮޑު ސަޕޯޓެއް އޮތްތަން ކަމުގައެވެ. ރައީސް ވިދާޅުވީ ހއ. ހދ. ށ. ނ. އަދި ގއ.ގދ އަތޮޅުން ބޮޑު އައުލަބިއްޔަތަކުން މިއިންތިޚާބު ކާމިޔާބު ކުރެއްވޭނެކަމަށެވެ.
އަޅުގަނޑުމެން މިއިންތިޚާބު ކާމިޔާބު ކުރާނީ އެއްބުރުން. މިކަން މިއޮތީ ނިމިފަ. ކިހިނެތްތޯ ދުވާފަރުގެ ރައްޔިތުން ތިބީ. އެއްބުރުން އެހެން ނޫންތޯ.
– ވަރަށް ޖޯޝުގައި ވާހަކަ ދައްކަވަމުން ރައީސް ވިދާޅުވިއެވެ.
ރައީސް ވިދާޅުވީ މިހާތަނަށް ވެރިކަމަށް ވަޑައިގެން ރައްޔިތުންނަށް ވެފައިވާ ވައުދުތައް ރަނުން ރަނަށް ފުއްދިފައިވާކަމަށެވެ. އަދި ބައެއް ވައުދުތައް މިހާރުވެސް ފުއްދެމުންދާކަމަށެވެ. ރައީސް ވިދާޅުވީ އިންތިޚާބުގައި ވޯޓު ދޭންވާނީ ވައުދުވެ އެކަން ފުއްދާ ވަރުގެ ބަޔަކަށް ކަމުގައެވެ.
މިހާތަނަށް ދިވެހި ތަޖުރިބާކުރި އަނިޔާވެރިކަމާއި، ކޮރަޕްޝަނާއި ފަސާދައިގެ ތެރެއަށް އަލުން ދާން ބޭނުންވާނެ ރައްޔިތަކު ނުހުންނާނެކަމަށް ރައީސް ވިދާޅުވިއެވެ. ދިވެހި ރައްޔިތުން ބޭނުންވަނީ ތަރައްޤީއާއި ކުރިއެރުން ކަމަށާއި، އެކަން މިސަރުކާރުން މިހާތަނަށްވެސް ވާނީ ކަށަވަރު ކޮށްދީފައިކަމަށް ރައީސް ޞާލިހު ވިދާޅުވިއެވެ.
ރައީސް ވަނީ މިޖަލްސާގައި ރ.އަތޮޅުގެ ރަށްތަކުން މިފަހަރުު ސާފު މެޖޯރިޓީ ދެއްވާނެކަމުގެ ޔަގީންކަން އޮތްކަމަށް ވިދާޅުވެފައެވެ.
