ރ.މީދޫ ރައްޔިތުން އެންމެ ބޮޑަށް ބޭނުންވާ ތަރައްޤީގެ މަޝްރޫޢުތަކުގެ ތެރޭގައި ހިމެނޭ ބަނދަރު ބޮޑު ކުރުމާއި، ހޮސްޕިޓަލުގެ މަސައްކަތް ވެރިކަމުގެ މިދައުރުގެ ތެރޭގައި ފައްޓަވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވައުދުވެ ވަޑައިގެންފިއެވެ.
ކެމްޕެއިނަށް ރ.މީދޫއަށް ވަޑައިގެން ރައީސް ސޯލިހު ވިދާޅުވީ މީދޫގެ ރައްޔިތުންނަކީ އަބަދުވެސް ތަރައްޤީއާ އެކީގައި ތިބޭ ބައެއް ކަމަށާއި އެރަށުގެ ތަރައްޤީއަށް ގިނަ ކަންތައް ކުރަން ނިންމާފައިވާ ކަމަށެވެ. އެގޮތުން އެރަށުގައި ކަރަންޓުގެ ކެޕޭސިޓީ އިތުރު ކުރުމަށް އާ އިންޖީނު ގެއެއް އަޅާ ނެޓްވޯކް އިތުރުކުރާނެ ކަމަށް ރައީސް ވަނީ ވައުދުވެފައެވެ.
އަދިހަމަ އެއާއެކު ދެން އަންނަ ދައުރެއްގައި މީދޫގައި ބޮޑު މިސްކިތެއް އަޅައިދޭނެ ކަމަށާއި ރަށުގެ މަގުތައްވެސް ޒަމާނީ ފެންވަރަށް ހަދާނެ ކަމަށް ވަނީ ވިދާޅުވެފައެވެ. މީގެ އިތުރުން ދެން އަންނަ ދައުރެއްގައި މީދޫއިން ބިންހިއްކައި ރަށުގެ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ހައުސިންގ މަޝްރޫއެއް ހިންގާނެ ކަމަށް ރައީސް ވަނީ ވައުދުވެފައެވެ. އަދި ޒުވާނުން އެދޭގޮތަށް މީދޫގައި ވޮލީ ކޯޓަކާއި ކޮމިއުނިޓީ ސެންޓަރެއް އަޅައިދޭން ރައީސް ވައުދުވިއެވެ.
ރައީސް އިތުރަށް ވިދާޅުވީ މީދޫގެ ރައްޔިތުންގެ އެންމެ ބޮޑު އެދުމަކީ އެރަށުގައި ހޮސްޕިޓަލެއް އަޅައިދިނުމާއި ބަނދަރު ބޮޑުކޮށްދިނުން ކަމަށެވެ. އެހެންކަމުން ރައްޔިތުން ބޭނުންވާ ތަރައްޤީ އެރަށަށް ގެނެސްދެއްވާނެކަމަށް ވަނީ ވިދާޅުވެފައެވެ.
މީދޫގެ ރައްޔިތުން އެންމެ ބޮޑަށް އެދޭ ދެކަމެއް އެބައޮތް. އެއް ކަމަކީ ރަށުގެ އާ ހޮސްޕިޓަލް، ވަސީލަތްތައް އަލަށް ޤާއިމުކޮށް އޭގެ ޚިދުުމަތް ލިބެން ފެށުން. ދެވަނަ ކަމަކީ ކުޑަވެފައި އޮތް ރަށުގެ ބަނދަރު ބޮޑުކުރުން.
– ރައީސް ވިދާޅުވިއެވެ.
އެގޮތުން އެރަށުގައި އަޅަން ހަމަޖެހިފައިވާ ހޮސްޕިޓަލް މިހާރު ކޮންޓްރެކްޓް ކުރެވިފައިވާ ކަމަށާއި ވަރަށް އަވަހަށް އެމަސައްކަތް ފެށިގެންދާނެ ކަމަށް ރައީސް ވިދާޅުވިއެވެ. ރައީސް ވިދާޅުވީ މީދޫގެ ބަނދަރަކީ ކައިރި ރިސޯޓުތަކުގެ މީހުން ވަރަށް ގިނައިން ބޭނުން ކުރާ ބަނދަރެއް ކަމަށާއި އަބަދުވެސް ފުރި ބާރުވެފައި އޮންނަ ބަނދަރެއް ކަމަށެވެ. އެހެންކަމުން ލަސްތަކެއް ނުވެ އެރަށުގެ ބަނދަރު ބޮޑުކުރުމުގެ އަމަލީ މަސައްކަތް ފެށިގެންދާނެކަމަށް ރައީސް ވިދާޅުވިއެވެ.
