ސިޓީ ކައުންސިލްގެ ދަށަށް ހުޅުމާލެ ގެންނާނީ އާބާންކޯގެ މުވައްޒަފުން ބާކީ ނުވާ ގޮތަށް ކަމުގައި ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިހާބަށް ހުށަހެޅުއްވި މެނިފެސްޓޯގައި މުއިއްޒު ވަނީ ހުޅުމާލޭގެ މުނިސިޕަލް ހުރިހާ ހިދުމަތެއް ބެލެހެއްޓުން މާލެ ސިޓީ ކައުންސިލާ ހަވާލުކުރަން ހިމަނާފައެވެ. އެގޮތުން އިދިކޮޅުގެ މެނިފެސްޓޯގައި ހުށަހަޅާފައި ވަނީ، މިކަން ކުރަން ބޭނުންވާ ބަޖެޓާއި ވަސީލަތްތައް އާބަންކޯއިން ހޯދައިގެން ސިޓީ ކައުންސިލުން އެ މަސައްކަތްތައް ކުރާ ގޮތަށެވެ.
ނަމަވެސް، ސަރުކާރާއި އާބަންކޯގެ ވެރިން އޭނާ ދެއްކެވި ވާހަކަ އޮޅުވާލައިގެން އެ ކުންފުނީގެ މުވައްޒަފުންނަށް ވަޒީފާގެ ބިރު ދައްކަމުން ގެންދާ ކަމަށް، ށ. ކަނޑިތީމުގައި ބޭއްވި ކެމްޕެއިން ޖަލްސާގައި މުއިއްޒު ތުހުމަތުކުރެއްވިއެވެ.
އާބަންކޯއަކީ ގާތްގަނޑަކަށް ހާހެއްހާ މުވައްޒަފުން އުޅޭ ތަނެއް އެއީ. އެ މުވައްޒަފުންނަށް ބިރު ދައްކަނީ ސަރުކާރުން. ތިބޭފުޅުން، މުނިސިޕަލް ޑިޕާޓްމަންޓުގައި އުޅޭ 500 އެއްހާ މުވައްޒަފުން ކައުންސިލަށް ބަދަލުކުރަންށޭ އެ އުޅޭނީ. ބަދަލުކުރީމައި މިހާރު ތި ލިބޭ ބޮޑު މުސާރައެއް ނުލިބޭނެޔޭ. ވަޒީފާ ގެއްލޭނެޔޭ. މަގުމަތި ވާނެޔޭ.
– މުއިއްޒު ވިދާޅުވިއެވެ.
މިދިޔަ ހޮނިހިރު ދުވަހުގެ ރޭ ހުޅުމާލެ 2 ގައި ބޭއްވި ކެމްޕެއިނު ޖަލްސާގައި މުއިއްޒު ވިދާޅުވީ، މާލެއަކީ ވިލިމާލެ އާއި މާލެއާއި ހުޅުމާލެ ކަމަށެވެ. ނަމަވެސް ވިޔަފާރި ކުންފުންޏެއްގެ ދަށުގައި ހުޅުމާލެ އޮތުމުން އެކަމުގެ ގެއްލުން ރައްޔިތުންނަށް ކުރާތީ އެކަން ބަދަލުކުރުމަށް އޭނާ ވައުދު ވެވަޑައިގެންނެވިއެވެ.
މުނިސިޕަލް ހިދުމަތްތައް ބަދަލުކުރުމުގެ އިތުރުން، ޕީޕީއެމް/ޕީއެންސީގެ ސަރުކާރެއްގައި މާލެ ސިޓީ ކައުންސިލްގެ ބަހާނުލާ ހުޅުމާލެއިން ބިން ވިއްކުން ނުވަތަ ކުއްޔަށްދިނުމުގެ އެއްވެސް ހަރަކާތެއް ނުހިންގޭނެ ކަމަށް ވެސް މުއިއްޒުގެ މެނިފެސްޓޯގައި ވަނީ ހިމަނާފައެވެ.
