މިސަރުކާރަށް އިތުރު ދައުރެއް ދީގެން ނުވާނެކަމަށާއި، މިސަރުކާރުން ގެންދަނީ މަތިމައްޗަށް ގޯސް ހަދަމުން ކަމުގައި ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހިމް ވިދާޅުވެއްޖެއެވެ.
ރިޔާސީ ކެމްޕޭންގައި ނ.މާޅެންދޫއަށް ވަޑައިގެން އެރަށުގެ ރައްޔިތުންނާއި ވާހަކަ ދައްކަވަމުން ޤާސިމް ވިދާޅުވީ ދެވަނަ ދައުރަކަށް ރައީސް އިބްރާހިމް މުހައްމަދު ޞާލިހު ކުރިމަތި ލައްވާފައިވާއިރު ރައްޔިތުން ވޯޓު ދޭންޖެހޭ އެއްވެސް ސަބަބެއް ނެތްކަމަށެވެ. ޤާސިމްގެ ވަނީ ވަރަށް ޖޯޝުގައި މިސަރުކަރަށް ނޫނެކޭ ބުނަންޖެހޭ ކަމަށް ވިދާޅުވެފައެވެ.
ރައްޔިތުންނަށް ޚިޔާނާތް ވެއްޖެ، މިނިވަންކަން ގެއްލުވާލައިފި، މިހާރު މިހުރި އިބޫއަށް ރައްޔިތުން ނޯ އޭ ބުނަންޖެހޭ. އޭނާއަށް ދެވަނަ ދައުރެއް ދޭންޖެހޭ އެއްވެސް ސަބަބެއް ނެތް. ރައްޔިތުން މިކަމާއި ވިސްނާ. މަތިމައްޗަށް ހައްދަވަނީ ގޯސް. ޤާނޫނު އަސާސީއާއި ގާނޫނުތަކާއި ތަކުރާރުކޮށް ޚިލާފްވެ ވަޑައިގެންފި.
– ޤާސިމް ވިދާޅުވިއެވެ.
ރައީސް ޞާލިހު ދެވަނަ ދައުރަކަށް ކުރިމަތިލެއްވީ އަމިއްލައަށް ބޭނުންފުޅު ވެގެން ނޫންކަމަށް ޤާސިމް ވިދާޅުވިއެވެ. ކުރިމަތި ލެއްވީ އިންޑިއާގެ ޕްރެޝަރަށް އިންޑިއާއިން ބޭނުންވާތީކަމަށެވެ. މިފަސް އަހަރު ތެރޭ އިންޑިއާއިން 3 ބިލިޔަން ޑޮލަރު ނަގާ ގައުމު ދަރުވާލުމަށްފަހު މުސާރަ ބޮޑު ކުރާ ވާހަކަ ދައްކަވަނީ ކޯއްޗެއް މިޤައުމުން ފެނިގެންތޯ ޤާސިމް ސުވާލު ކުރެއްވިއެވެ.
ޤާސިމް ވިދާޅުވީ ރައްޔިތުން ވޯޓު ދެއްވާއިރު މިސަރުކާރުން ކަންކަން ކުރާ ގޮތަށް ވަރަށް ރަނގަޅަށް ބަލަންޖެހޭކަމަށެވެ. ޤައުމުގެ މިނިވަންކަން ނަގާލައި ކަނޑުވިއްކާލައި، އިންޑިއާ ސިފައިން ރާއްޖޭގައި ބައިތިއްބައި އެތައް ގޯހެއް ހަދާއިރު ރައްޔިތުން ދެވަނަ ފުރުސަތެއް ރައީސް ޞާލިހަށް ދޭންޖެހޭ ސަބަބެއް ނެތްކަމަށް ޤާސިމް ވިދާޅުވިއެވެ. ޤާސިމް ވިދާޅުވީ ރައްޔިތުންނަށް ޚިދުމަތް ކުރަން އޮންނަ މީހަކު ފުރަތަމަވެސް އިޚުލާސްތެރި ވާންޖެހޭނީ އިސްލާމް ދީނާއި، ދިވެހިންގެ މިނިވަން ކަމަށް ކަމުގައެވެ.
ރައީސް ޞާލިހު ވަނީ މިދެކަންތަކަށްވެސް ޚިޔާނާތްވެފައިކަން ޤާސިމް ފާހަގަ ކުރެއްވިއެވެ. ޤާސިމް ވިދާޅުވީ މަޖިލީހުގެ ސުޕަ މެޖޯރިޓީދީ ޖުޑީޝަރީ ދިނުމުންވެސް ޤައުމަށް ހެޔޮ ބަދަލެއް ނުގެނެވި ކުރެއްވީ އަޅުވެތިކަމަށެވެ. މިސަބަބުތަކަށްޓަކައި ރައީސަށް ނޫނެކޭ ބުނަންޖެހޭކަމަށް ޤާސިމް ވިދާޅުވިއެވެ.
