ރިޔާސީ އިންތިޚާބުގައި މިނިސްޓަރ އޮފް އާރޓްސް ކަލްޗަރ އެންޑް ހެރިޓޭޖް ޔުމްނާ މައުމޫންގެ ތާއީދު ރައީސް ޞާލިހަށް ކުރެއްވުމަށް ނިންމަވައިފިއެވެ.
ޔުމްނާ ރައީސް ޞާލިހަށް ތާއީދު ކުރެއްވިކަން ހާމަ ކުރައްވައި ކުރެއްވި ޓުވީޓުގައި ވިދާޅުވީ ޤައުމުގެ ހަމަޖެހުމާއި ތަރައްޤީއަށް ރައީސް ޞާލިހު ދެވަނަ ދައުރަކަށް އިންތިޚާބު ކުރެއްވުމަކީ ކޮންމެހެން މުހިންމު ކަމެއްކަމަށެވެ. މިސަރުކާރުން ތަރައްޤީއާއި ކުރިއެރުން ހޯދުމުގައި އެތައް ގޮތަކުން ކުރިއެރުން ހޯދާފައިވާކަން ފާހަގަކޮށް ޔުމްނާ ވަނީ ރައީސަށް ތާއީދު ކުރިކަން ހާމަ ކުރައްވާފައެވެ.
ޤައުމުގެ ހަމަޖެހުމާއި ތަރައްޤީއަށް ރައީސް އިބްރާހިމް މުހައްމަދު ޞާލިހަށް ދެވަނަ ދައުރަކަށް އިންތިޚާބުކުރުމަކީ މުހިންމު ކަމެއް ކަމަށް އަޅުގަނޑު ޤަބޫލުކުރަން. ރައްޔިތުންނަށް ލުއިފަސޭހަ ކޮށްދޭން މި ސަރުކާރުން ފަށާފައިވާ މުހިންމު މަސައްކަތްތަކާއި މަޝްރޫޢުތައް ކުރިޔަށް ގެންދިޔުން މުހިންމު.
– ޔުމްނާ މައުމޫން ވިދާޅުވިއެވެ.
ޔުމްނާ ވިދާޅުވީ ރައީސް ޞާލިހު ކުޑަރަށެއް ބޮޑުރަށެއް ތަފާތު ކުރުމެއްނެތި ޚިދުމަތް ދެއްވުމަށް ގެންގުޅުއްވާ ސިޔާސަތަކީ ވަރަށް ބޮޑަށް ތާއީދު ކުރެވޭ ސިޔާސަތެއް ކަމަށެވެ. އަދި ސަގާފީ ތަރިކަ ރައްކާކޮށްދީ ސަގާފީ ފަތުރުވެރިކަން ކުރިއެރުމަށް ރައީސްގެ ސިޔާސަތަށް ފުރިހަމައަށް ތާއީދު ކުރާކަމަށް ޔުމްނާ ވިދާޅުވިއެވެ.
އެ މަނިކުފާނުގެ ސިޔާސަތުތަކަށާއި މެނިފެސްޓޯއަށް އަޅުގަނޑަށް ތާއީދު ކުރެވޭ. އެ ގޮތުން ކުޑަރަށެއް ބޮޑު ރަށެއް ތަފާތު ނުކޮށް އަސާސީ ޚިދުމަތްތައް ފޯރުކޮށްދެއްވައި، ސަގާފީ އަދި ޤުދްރަތީ ތަރިކަ ރައްކާތެރިކޮށް، ރަށު އަދި ސަގާފީ ފަތުރުވެރިކަން ކުރިއެރުވުމުގެ ސިޔާސަތަށް ތާއީދުކުރެވޭ.
– ޔުމްނާ ވިދާޅުވިއެވެ.
ޔުމްނާ ރައީސަށް ތާއީދު ކުރައްވަން ނިންމެވިއިރު، އެކަމާނެ ބޭބެ ފާރިސް މައުމޫން ގެންދަވަނީ ރިޔާސީ އިންތިޚާބުގައި ވާދަކުރައްވައި ކެމްޕޭން ކުރައްވަމުންނެވެ. ފާރިސްގެ އެއްބަޑު އެއްބަފާ ބޭފުޅުންގެ ތެރެއިން އެއްވެސް ބޭފުޅަކު މިއިންތިޚާބުގައި އޭނާއަށް ތާއީދު ނުކުރައްވައެވެ.
