ރައްޔިތުންގެ މަޖިލީހުގެ މިއަދުގެ ޖަލްސާގައިވެސް ކެލާ ދާއިރާގެ މެންބަރު އިބްރާހީމް ޝަރީފްގެ ނަން އިއްވުމުން އޭނާ ޖަލްސާ ދޫކޮށް ވަޑައިގަންނަވަން ދެކޮޅު ހައްދަވައިފިއެވެ.
ރައްޔިތުންގެ މަޖިލީހުގެ 3 ވަނަ ދައުރުގެ 2 ވަނަ ޖަލްސާ މިއަދު ކުރިއަށްގެންގޮސްފައިވާއިރު، މިއަދުގެ ޖަލްސާގައި ކުރިއަށް ދިޔައީ ކޮމިޓީތައް އެކުލަވާލުމުގެ ބަހުސެވެ.
މިކަމަށް ބަހުސް ކުރައްވަމުން ދިއްގަރު ދާއިރާގެ މެންބަރު އިކްރާމް ވަނީ މަޖިލީހުގެ ގަވާއިދުގައި ވަރަށް ސާފުކޮށް ކޮމިޓީތައް އެކުލަވާލުމާއި، ކޮމިޓީން މެންބަރުން ވަކިވުމުން ކަންކަން ކުރަންވީގޮތް ބަޔާންކޮށްދެއްވާފައިވާ ކަމަށް ވިދާޅުވެފައެވެ. އެހެން ކަމުން އެއާއި އެއްގޮތަށް މަސައްކަތް ކުރުމަށްވެސް އޭނާ ވަނީ މަޖިލީހުގެ އިދާރާގެ ކިބައިން އެދިލައްވާފައެވެ.
އިކްރާމްގެ ވާހަކައަށް ރައްދު ދެއްވަމުން މަޖިލީހުގެ ރިޔާސަތުގައި އިންނަވައި، ވިލިފުށީ ދާއިރާގެ މެންބަރު ހަސަން އަފީފް ވަނީ، މަޖިލީހުގެ ކޮމިޓީތައް އެހެން ބައެއް ސަބަބުތަކާއި ހުރެވެސް ކުރިއަށް ނުދާކަން ފާހަގަކުރައްވާފައެވެ.
"ކޮމިޓީތަކުގައި މުގައްރިރު ޖަލްސާ ކުރިއަށް ގެންދިޔުމަށް އުޒުރުވެރިވެއްޖެއްޔާ އެކަންތަކެއް ނުކުރެވޭ. އެހެންވީމާ މުގައްރިރުންގެ ސަބަބުންވެސް ކޮމިޓީތައް ކުރިއަށް ނުގެންގޮސް އެބައޮތް. އެހެންވީމާ އިއްޒަތްތެރު މެންބަރުން ވާހަކަދައްކަވާއިރު، މިހުރިހާ ޕޮއިންޓް ތަކަކަށްވެސް ވިސްނަވައިގެން ވާހަކަދައްކަވަން ވާނީ" ހަސަން އަފީފު ވިދާޅުވިއެވެ.
އަފީފުގެ ވާހަކަފުޅަށްފަހު މެމްބަރު ޝަރީފަށް ފުރުސަތު ދެއްވުމާއެކު އޭނާ ވަނީ ރިޔާސަތަށް ރައްދު ދީ ވާހަކަ ދައްކަވަން ފަށްޓަވާފައެވެ.
"މި ގަވާއިދަކު ހަމަ ގައިމު ވެސް ނޯންނާނެ، ތިޔަ މޭޒުކޮޅު، ތިޔަ ގޮނޑިކޮޅުގައި އިންނަވައިގެން، މަޖިލިސް މެމްބަރުން މިތާ ދައްކާ ވާހަކައަށް ރައްދު ދިނުމާއި އެއަށް ފުރައްސާރަކުރުމާ އޭތި އެނބުރުމާ، މިކަންތައްތަކެއް ނޯންނާނެ އިނގޭތޯ ގަވާއިދަކު. ހަމަޔަގީނުންނެތް. އަޅުގަނޑަށް ހޯދާ ހޯދާ ނުފެނުނު." އިބްރާހީމް ޝަރީފު ވިދާޅުވިއެވެ.
އެއަށް ރައްދު ދެއްވަމުން އަފީފް ވިދާޅުވީ ގަވާއިދުގައި ކަންކަން ސާފުކޮށްދިނުން އޮންނަ ކަމަށެވެ.
އެއާއެކު ޝަރީފްވަނީ ޒުވާބު ކުރާ މޭރުމަކުން ވާހަކަދައްކަވައި މެންބަރުންނާއި ޖަދަލު ނުކުރެވޭނެ ކަމަށް ތަކުރާރުކޮށް ވިދާޅުވަމުން ގޮސްފައެވެ.
"އިއްޒަތްތެރި މެމްބަރަކަށް ޒުވާބެއް ނުކުރެވޭނެ މިތަނަކާ (ރިޔާސަތަކާ)" އަފީފު ވިދާޅުވި އެވެ.
އެއަށްފަހުވެސް ޝަރީފުވަނީ މަޖިލީހުގައި އަޑު ގަދަ ކުރައްވައި، ޒުވާބު ކުރައްވާފައެވެ.
އެހެންކަމުން ޖަލްސާ ކުރިއަށް ނުގެންދެވޭ ހިސާބަށް ކަންކަން ދިއުމުން ޝަރީފްގެ ނަން އިއްވައި ޖަލްސާ ދޫކޮށް ދިއުމަށް ރިޔާސަތުން ވަނީ އަންގަވާފައެވެ. ނަމަވެސް ޝަރީފް އެ އެންގުމަށް ތަބާނުވެ މަޖިލީހުގެ ތަޅުމުގައި އަޑު ގަދަ ކުރައްވަމުން ގެންދެވިއެވެ.
އިއްޔެގެ ޖަލްސާގައިވެސް ޝަރީފާއި އެމްޑީޕީ އިތުރު މެންބަރުންގެ ނަން އިއްވާފައިވެއެވެ.
