ބޭންކް އޮފް ބަރޯޑާ އިން ނަގާފައިވާ ލޯނެއް ނުދައްކައިގެން ބޮލީވުޑްގެ މަޝްހޫރު ތަރި ސަނީ ޑިއޯލްއަށް ބޭންކުން އިންޒާރުދީ އޭނާގެ މިލްކިއްޔާތެއް ވިއްކާލަން ހުޅުވާލައިފި އެވެ.
މީގެ ދެދުވަސް ކުރިން އެ ބޭންކުން ނެރުނު އިއުލާނުގައިވާ ގޮތުން ބޭންކަށް ދައްކަން ޖެހިފައި އޮތް ލޯނުގެ އަދަދު 55.99 ކްރޯޑް ރުޕީސް (7 މިލިއަން ޑޮލަރު) އަރަ އެވެ. ނަމަވެސް މިދިޔަ އަހަރުގެ ޑިސެމްބަރުން ފެށިގެން އެ ލޯނަށް ސަނީ ފައިސާ ދައްކައިފައެއް ނުވެ އެވެ.
އެހެންވެ ބޭންކުން ވަނީ ސަނީ އަށް މިކަންކަމަށް ރިއާޔަތް ކޮށް ނޯޓިސްއެއް ފޮނުވައިއެވެ. އަދި އެކަމުގެ ސަބަބުން ރަހުނުގެ ގޮތުގައި އޭނާ ބޭންކުގައި ރަހުނު ކުރި ޖުހޫގައި ހުންނަ ސަނީގެ ވިލާ ވަނީ ނީލަމުގައި ވިއްކާލަން އިއުލާން ކޮށްފަ އެވެ. އެތަނަކީ ސަނީގެ ޕްރޮޑަކްޝަން ހައުސްތަކަކާއި ޕްރިވިއު ތިއޭޓަރެއް ވެސް ހިމެނޭ ތަނެކެވެ.
View this post on Instagram
ލޯނު ނުދައްކައިގެން ސަނީ ވިލާ އޮންލައިންކޮށް ނީލަމުގައި ވިއްކައިލަން ކުރި އިއުލާނުގައިވާ ގޮތުން ނީލަން ފެށޭ އަގަކީ 51.43 ކްރޯޑް ރުޕީސް (6.2 މިލިއަން ޑޮލަރު) އެވެ. ސަނީ އެ އަދަދު ނުދައްކައިފިނަމަ އަންނަ ސެޕްޓެމްބަރު މަހުގެ 9 ވަނަ ދުވަހުގައި އެތަން ނީލަން ކިއުން އޮންނާނެއެވެ.
ބޭންކުން ސަނީއަށް ނޯޓިސް ފޮނުވާފައި މިވަނީ އެންމެ ފަހުން ނުކުތް އޭނާގެ ފިލްމު "ގަދަރް 2″އަށް ގިނަ ކާމިޔާބީތަކެއް ލިބެމުން އަންނަ ދަނޑިވަޅެއްގައިއެވެ. މި މަހުގެ 11 ގައި ރިލީޒްކުރި މި ފިލްމަށް މިހާތަނަށް އާމްދަނީގެ ގޮތުގައި 470.17 ކްރޯޑް ރުޕީސް (57 މިލިއަން ޑޮލަރު) ލިބިފައިވެ އެވެ.
