ތަރައްޤީގެ ވާހަކަ ރައްޔިތުން މިނެކިރާލަން އޮތް އެންމެ ފަސޭހަ އެއްގޮތަކީ ކުރީ ސަރުކާރުން އަޅަން ވައުވެ އަޅައިދިން ބްރިޖާއި، މިސަރުކާރުން އަޅަންބުނެ ނޭޅި އޮތް ބުރިޖުން ކަމުގައި ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައިި އައްޑޫ ސިޓީގައި ގިނަ އަދަދެއްގެ ބަޔަކާއިއެކު ބޭއްވި ފޯރިގަދަ ޖަލްސަގައި މުއިއްޒު ވަނީ އައްޑޫ ސިޓީގެ ތަރައްޤޯއަށް މުހިންމު ވައުދުތަކެއްވެސް ވެވަޑައިގެންފައެވެ. މުއިއްޒު ވިދާޅުވީ ހިތަދު އާއި ހުޅުމީދުއާ ދެމެދުގައި ވެސް ބްރިޖެއް އެޅުމަކީ ކުރީގެ ރައީސް ޔާމީން 2018 ވަނަ އަހަރުގެ ރިޔާސީ އިންތިހާބުގައި ވެވަޑައިގެންނެވި ވައުދެއް ކަމަށެވެ. އެކަން ނުވެދިޔައީ އޭރު ރައްޔިތުން ނިންމި ނިންމުމާއިއެކު މިސަރުކާރު އެކަން ކުރަން ބޭނުން ނުވުމުން ކަމަށެވެ.
މުއިއްޒު ވިދާޅުވީ މިވައުދު ފުއްދާނީ ހަމަ ރައީސް ޔާމީންގެ އިރުޝާދުގެ ދަށުން ޕީޕީއެމް، ޕީއެންސީގެ ވެރިކަމެއްގައި ކަމަށެވެ. އަންނަ މަހު 9 ގައި ބާއްވާ ރިޔާސީ އިންތިހާބު ކާމިޔާބުވެއްޖެ ނަމަ، ހުޅުމީދޫ-ހިތަދޫ ބްރިޖު ހަގީގަތަކަށް ހަދައިދޭނެ ކަމުގެ ޔަގީންކަން މިރޭ މުއިއްޒު ދެއްވިއެވެ.
ރާއްޖޭގައި ބްރިޖު އެޅުމުގެ މަޝްރޫއުތައް މިހާތަނަށް ތަފާތު ފެނިފައި ވާނީ. ބްރިޖެއް އެޅުނު ތަނާއި އަޅަން އުޅެ ނޭޅުނު ތަނާ ފެނިފައި ވާނީ. އެހެންވީމާ ރައްޔިތުން ހިޔާރުކުރަންވީ ބްރިޖު އެޅިފައި ތިބި ފަރާތްތޯ، އަޅަން އުޅެ ނޭޅުނު ފަރާތްތޯ ތިމަންނަމެން ގައުމު ހަވާލުކުރަންވީ.
– މުއިއްޒު ވިދާޅުވިއެވެ.
މާލެ ސަރަހައްދުގެ އިޢްތިޞާދާއި ވަޒީފާތަކާއި އެތައް ކުރިއެރުމެއް އަންނާނެކަމަށް ބުނެ މިސަރުކާރުން އަޅަންފެށި ބްރިޖުގެ މަސައްކަތް އެކަށީގެންވާ ސްޕީޑެއްގައި ނުދާކަން ސަރުކާރުންވެސް ގަބޫލު ކުރެއެވެ. ބްރިޖުގެ މަސައްކަތް ނިންމުމަށް ދީފައިވާ ޓައިމްލައިނާ އެއްގޮތަށް މަސައްކަތް ނުދާއިރު ބްރިޖު މަސައްކަތް ކުރާ އުޅަދުތައް ފަރަށް އެރުމާއި ކެރޭން ކަނޑައިގެން ވެއްޓުމުގެ ހާދިސާތައް ވަނީ ހިނގާފައެވެ.
ގްރޭޓަރ މާލޭ ސަރަޙައްދަށް ބޮޑު ބަދަލެއް އިޤްތިޞާދީގޮތުންވެސް އަދި ޢުމްރާނީގޮތުންވެސް ގެނުވާނެ މިމަޝްރޫޢުގެ ޢަމަލީ މަސައްކަތް ފަށާފައިވަނީ މިދިޔަ އަހަރުގެ އޯގަސްޓް މަހުގައެވެ. އަދި ނިންމުމަށް ހަމަޖެހިފައިވަނީ އަންނަ 2024 ނިޔަލަށެވެ. ހަތަރު ސަރަޙައްދެއް ގުޅުވާލާ، ޖުމްލަ 6.7 ކިލޯމީޓަރުގެ މިބްރިޖު ތަރައްޤީކުރުމަށް 7 ބިލިއަނަށްވުރެ ގިނަ ދިވެހި ރުފިޔާ ހޭދަކުރުމަށްވަނީ ހަމަޖެހިފައެވެ.
