އެހެން ޕާޓީތަކުގެ ކެންޕެއިނަށް ހުރަސް އަޅަން އެމްޑީޕީގެ ލީޑާޝިޕުން ވާގިވެރިއެއް ނުވާނެ ކަމަށް އެ ޕާޓީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ކެންޕެއިން ތަރުޖަމާނު އަދި ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
އިއްޔެ އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ކ. ގުރައިދޫއަށް ވަޑައިގަންނަވަން ހަމަޖެހިފައި ވަނިކޮށް އެމްޑީޕީ ސަޕޯޓަރުން ނުކުމެ ޕީޕީއެމް ސަޕޯޓަރުންނަށް ހަމަލާދީ މާރާމާރީ ހިންގާފައިވެއެވެ.
ދެޕާޓީގެ ސަޕޯޓަރުންގެ މެދުގައި ހަމަނުޖެހުން ހިނގައި ގަޔަށް ބޮލަށް އަރާ ހިސާބަށް ދިޔައިރުވެސް، އެރަށުގައި ހަރަކާތްތެރިވަމުން ގޮސްފައި ވަނީ ވަރަށް މަދު ފުލުހުން ކަން ފާހަގަކޮށްލަންޖެހެއެވެ.
އެ ކަމާއި ގުޅިގެން ވާހަކަ ދައްކަވަމުން ދަ ޑިމޮކްރެޓްސް އިން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ރިޔާސީ ކެންޑިޑޭޓްގެ ތަރުޖަމާނު، އިމްތިޔާޒު ފަހުމީ ވަނީ މި ސަރުކާރުން އެހެން ޕާޓީތަކުގެ ކެންޕެއިނަށް ހުރަސް އަޅަމުންދާ ކަމަށާއި، ހުރިހާ ޕާޓީތަކަށް ވެސް ކެންޕެއިން ކުރުމަށް ހަމަހަމަ ފުރުސަތު ދޭންޖެހޭ ކަމަށް ވިދާޅުވެފައެވެ.
އެކަން ފާހަގަކޮށް، މިއަދު ރައީސް ޞާލިހުގެ ތަރުޖަމާނުގެ ފަރާތުން ބޭއްްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން މާރިޔާ ވިދާޅުވީ, ސަރުކާރުން މަސައްކަތް ކުރަމުން ދަނީ އެންމެނަށްވެސް ކެންޕެއިން ކުރުމަށް ހަމަހަމަ ފުރުސަތެއް ފަހި ކޮށްދެއްވުމަށް ކަމަށެވެ.
އިއްޔެ ހުޅުމާލެ ފޭސް ދޭކަށް ވަޑައިގެން ކެމްޕެއިން ކުރައްވަމުންގެންދެވި ވަގުތުގައި އިދިކޮޅު ޕީޕީއެމްގެ މެމްބަރުންތަކެއް އައިސް އެކަމަނާ ހުންނެވި ސަރަޚައްދުގައި އަޑުގަދަކޮށްފައިވާކަމަށް މާރިޔާ ވިދާޅުވިއެވެ.
އަންނަ މަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި ވާދަކުރައްވާ 8 ކެންޑިޑޭޓުންވެސް އަންނަނީ ރާއްޖޭގެ އެކި ކަންކޮޅުތަކުގައި ކެމްޕޭން ހަރަކާތަތައް ބާއްވަމުންނެވެ.
