ވެރިކަމާއި ހަވާލުވެ، ފަސް އަހަރުގެ ތެރޭގައި ރާއްޖޭގައި ހައްޖަށްދާނެ ޤާބިލްކަން ނެތް ނިކަމެތި ރައްޔިތުންގެ ތެރެއިން 1،000 ރައްޔިތުންނަށް ހިލޭ ހައްޖަށް ދެވޭނެ މަގު ފަހިކޮށްދެއްވާނެކަމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި މިރޭ މުލަކުގައި ބޭއްވި ޖަލްސާގައި ވާހަކަ ދައްކަވަމުން ޑރ.މުއިއްޒު ވިދާޅުވީ އަމިއްލައަށް ފައިސާ ދައްކައިގެން ހައްޖަށް ދިޔުމުގެ ތަނަވަސްކަން ނެތް ވަރަށް ގިނަ މީހުން ރާއްޖޭގައި އެބަތިބި ކަމަށާއިި ސަރުކާރުގެ އެފަދަ މީހުންނަށް ހައްޖުގެ އަޅުކަން އަދާކުރުމުގެ ފުރުސަތު ދޭނެ ކަމަށެވެ.
އެގޮތުން އަމިއްލައަށް އެފޯޑް ނުކުރެވޭވަރުގެ މީހުން ސަރުކާރުގެ އެހީގައި ބަހާލައިގެން ފަސްއަހަރުތެރޭ 1000 މީހުން ހައްޖަށް ފޮނުވަން މުއިއްޒު ވަނީ ވައުދުވެ ވަޑައިގެންފައެވެ.
މުއިއްޒު ވިދާޅުވި ގޮތުގައި މޯލްޑިވްސް ހައްޖު ކޯޕަރޭޝަން ހިނގަނީ ރަނގަޅަކަށް ނޫނެވެ. އެ ކޯޕަރޭޝަނުން މީހުން ހައްޖަށް ގެންދާ އަގު ވަރަށް ބޮޑު ކަމަށާއި އެ ކޯޕަރޭޝަނަށް ވަރަށް ގިނަ ބަދަލުތައް ގެންނަން ޖެހޭ ކަމަށް މުއިއްޒުު ވިދާޅުވިއެވެ. އެކޯޕަރޭޝަން ހިންގުން ހަރުދަނާ ކުރެއްވުމަށް ހައްޖު ފަންޑުގެ ނަމުގައި ހާއްސަ ފަންޑެއް އުފައްދަވާ، އެ ފަންޑުން އެކި ކަންކަމަށް އިންވެސްޓުކޮށް ހައްޖު ކޯޕަރޭޝަނަށް ފައިސާ ލިބޭނެ ގޮތް އިންތިޒާމުކުރައްވާނެ ކަމުގައިވެސް އޭނާ ވިދާޅުވިއެވެ.
ހައްޖު ކޯޕަރޭޝަން ހިނގަނީ ރަނގަޅަކަށް ނޫން. އެ ކޯޕަރޭޝަނުން ހައްޖަށް މީހުން ގެންދަނީ ވަރަށް އަގުބޮޑުކޮށް. އެކުންފުނި ފައިނޭންޝިއަލީ ވަރުގަދަ ކުންފުންޏަކަށް ހަދަން އެބަޖެހޭ. އޭރުން އަގުތައް އަގުތައް ކުޑަވެގެންދާނެ.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ކުރީގެ ރައީސް ޔާމީންގެ ދައުރުގައި ޒަކާތް ފަންޑުން ރައްޔިތުންނަށް އެހީތެރިކަން ފޯރުކޮށްދެއްވާފައިވާ ކަމަށާއި އޭނަގެ ވެރިކަމެއްގައިވެސް ޒަކާތު ފަންޑުން ބޭނުންޖެހިފައިވާ މީހުންނަށް އެހީތެރިކަން ފޯރުކޮށްދޭނެ ކަމަށެވެ.
