ކުރިއަށް އޮތް ރިޔާސީ އިންތިޚާބުގައި ރައީސް ޔާމީން މިނިވަން ކުރެއްވުމަށް އިންތިޚާބުގައި މިސަރުކާރަށް ނޫނެކޭ ބުނެ ޕީޕީއެމް، ޕީއެންސީގެ ވެރިކަމެއް ގެނައުމުގައި އެންމެ ބޮޑު ދައުރެއް އަދާކުރާނެ ދާއިރާއަކީ މުލަކު ދާއިރާއަށް ވެގެންދާނެ ކަމާއިމެދު ޝައްކު ނުކުރައްވާކަމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
މުލަކު ދާއިރާއަކީ ރައީސް ޔާމީން ރައްޔިތުންގެ މަޖިލީހުގެ މެމްބަރުކަން ކުރެއްވި ރައީސް ޔާމީނާއި ގުޅުން އެންމެ ބޮޑު ދާއިރާއެވެ. ރިޔާސީ ކެމްޕޭންގައި މިރޭ މުލަކުގައި ބޭއްވި ޖަލްސާގައި ވާހަކަ ދައްކަވަމުން ޑރ.މުއިއްޒު ވިދާޅުވީ މުލަކު ދާއިރާއަކީ ހުރިހާ ގޮތަކުންވެސް ރައީސް ޔާމީނަށް ޚާއްސަ ދާއިރާއެއް ކަމަށެވެ.
ރައީސް ޔާމީން މިނިވަން ކުރުމުގައި އެންމެ ބޮޑު މަސައްކަތެއް ކުރައްވާނެ އެއްބަޔަކީ މުލަކު ދާއިރާގެ ރައްޔިތުން ކަމާއިމެދު ޝައްކެތްވެސް ނެތް. ވެރިކަމާއި ހަވާލުވެ ފުރަތަމަ ކުރާނެ ކަމަކީވެސް ޤާނޫނީ އިމުގެ ތެރެއިން ރައީސް ޔާމީން މިނިވަން ކުރުން.
– ޑރ.މުއިއްޒު ވިދާޅުވިއެވެ.
މުއިއްޒު ވިދާޅުވީ ރައީސް ޔާމީން މިނިވަން ކުރުމަށް އެންމެ ބޮޑަށް ބޭނުންވާނެ އެއްދާއިރާއަކީ މުލަކު ދާއިރާގެ ރައްޔިތުން ކަމަށެވެ. މިއިންތިޚާބުގައި މުލަކު ދާއިރާއިން ބޮޑު އައުލަބިއްޔަތަކުން މިސަރުކާރަކަށް ނޫނެކޭ ބުނާނެކަމީ ޝައްކު ނުކުރާނެ ކަމެއްކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ރިޔާސީ ކެމްޕޭންގައި ހުރިހާ ރަށެއްގެ ރައްޔިތުންނާއިވެސް ބައްދަލު ކުރަން ބޭނުންވާކަމަށެވެ. ނަމަވެސް ވަގުތު އޮތް ގޮތުން ހުރިހާ ރަށަކަށް ނުދެވުމަކީ އެކަށީގެންވާ ކަމެއްކަމަށް މުއިއްޒު ވިދާޅުވިއެވެ. ނަމަވެސް ވަގުތާއި ހާލަތު އޮތް ގޮތުން ކުރިއަށް އޮތް 21 ދުވަހު ވީހާވެސް ގިނަ ރަށްރަށަށް ވަޑައިގެން ރައްޔިތުންނާއި ބައްދަލު ކުރައްވާނެކަމަށް މުއިއްޒު ވިދާޅުވިއެވެ. މުއިއްޒު ވަނީ ވެރިކަން ލިބިއްޖެނަމަ މުލަކު ދާއިރާއަށް ކޮށްދެއްވާނެ މުހިންމު ކަންތައްތަކެއް ހިއްސާ ކުރައްވާފައެވެ.
މުލަކަށް ވެވަޑައިގެންނެވި ވައުދުތައް:
– މަގުތައް ރަނގަޅު ފެންވަރަކަށް ހަދައިދޭނަން
– ބަނދަރު ބޮޑު ކޮށް، ބަނދަރު ހެދުމުގެ މަޝްރޫއެއް ހިންގައިދޭނަން
– އިތުރު ފަރާތުގެ ޖެޓީ އަލުނން ހަދާދޭނަން
– ސިއްޚީ މަރުކަޒު ހޮސްޕިޓަލަކަށް ބަދަލު ކުރާނަން
– ޒުވާނުންގެ މަރުކަޒެއް ޤާއިމް ކުރާނަން
– ކުނިމެނޭޖްކޮށް، ރަށް ގިރުވުމަށް ހައްލު ހޯދައިދޭނަން
ނާލާފުއްޓަށް ވެވަޑައިގެންނެވި ވައުދުތައް:
– މުއްޔާ ލާފުށި ކޯޒްވޭއަކުން ގުޅާލާނަން
– ބިއްހިއްކުމުގެ މަޝްރޫޢެއް ހިންގައިދޭނަން
– ނާލާފުއްޓަށް ޒަމާނީ ބޮޑު ބަނދަރެއް ގާއިމް ކޮށްދޭނަން
ކޮޅުފުއްޓަށް ވެވަޑައިގެންނެވި ވައުދުތައް:
– މިސަރުކާރުން ފަށާފައިވާ 100 ގޭގެ މަސައްކަތް ނިންމައި، އަގުތައް ކުޑަކޮށްދޭނަން
– ރަށްގިރުމުގެ މައްސަލައަށް ހައްލު ހޯދައިދޭނަން
މުއިއްޒު ވިދާޅުވީ އެހެން ރަށްތަކަށް ނުދެވުނު ނަމަވެސް ހުރިހާ ރަށެއްގެ ރައްޔިތުން އެދޭ ކަންކަން ހާސިލް ކޮށްދެއްވާނެކަމަށެވެ. އެކަމާއި އެއްވެސް ރައްޔިތަކު ކަންބޮޑުނުވުމަށް މުއިއްޒު ވަނީ އެދިވަޑައިގެންފައެވެ. އަދި ރާއްޖެއަށް ތަރައްޤީ ހާސިލް ކުރެވޭނީ އިޤްތިޞާދު ހަރުނާކޮށްގެން ކަމަށް މުއިއްޒު ވިދާޅުވިއެވެ.
އަޅުގަނޑު ހަމައެމަނި ވައުދުވަނީކީ ނޫން. ވާވައުދުތައް ފުއްދާނެކަމުގެ ޔަގީންކަން ދެން. ރައީސް ޔާމީން ދަސްކޮށްދެއްވީ އެސިޔާސަތު. ވައުދެއް ވެއްޖިއްޔާ އެކަން ކުރާނެ ގޮތާއި، ހާސިލް ކުރާނެ ގޮތް ހިއްސާ ކުރާނަން.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ކަންކަން ކޮށްދެއްވާނީ އިހުލާސްތެރި ކަމާއިއެކު ރައްޔިތުންގެ ވިންދާއި އެއްގޮތަށް ކުޑަ ރަށެއް ބޮޑު ރަށެއް ބެލުމެއްނެތި އަދުލުވެރި ކަމާއި އެކުގައި ކަމަށެވެ.
