މި އަހަރުގެ ރިޔާސީ އިންތިހާބުގައި ކޮންމެ ވޯޓުލާ މަރުކަޒެއްގައި، ކޮންމެ ޕާޓީއަކުން ނުވަތަ ކޮންމެ ކެންޑިޑޭޓެެއް ފަރާތުން މަންދޫބަކު ބެހެއްޓުމަށް ހުޅުވާލި ފުރުސަތުގައި އެންމެ ގިނައިން އެޕްލިކޭޝަން ލިބިފައި ވަނީ ޕީއެންސީގެ ފަރާތުން ކަމަށް އިލެކްޝަންސް ކޮމިޝަން (އީސީ)ން ވިދާޅުވެއްޖެއެވެ.
އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ކުރެއްވި ސޯޝަލް މީޑިއާ ޕޯސްޓެއްގައި ވިދާޅުވީ މޮނިޓަރުންނާއި އޮބްޒާވަރުންނަށް ވުމަށް ހުށަހެޅުމުގެ ސުންގަޑި ހަމަވިއިރު ރާއްޖޭގެ މީޑިއާތަކުން މޮނިޓަރުންގެ ގޮތުގައި 4545 އެޕްލިކޭޝަން އަދި އިންތިހާބުގެ އޮބްޒާވަރުންގެ ގޮތުގައި ސިޔާސީ ޕާޓީތަކުންނާއި، ޖަމްޢިއްޔާ ޖަމާޢަތްތަކުންނާއި އަމިއްލަ ގޮތުން ކުރިމަތިލެއްވި ބޭފުޅުންނާއެކު 3607 އެޕްލިކޭޝަން، އޮބްޒާވަރުންނާއި، މޮނިޓަރުންގެ ގޮތުގައި، ޖުމްލަ 8152 އެޕްލިކޭޝަން ރާއްޖޭން އީސީއަށް ލިބިފައިވާ ކަމަށެވެ.
އެޕްލިކޭޝަން ހުށަހެޅި ޕާޓީތައް:
– އެމް.ޑީ.ޕީ: 458
– ޖޭޕީ: 217
– ޕީ.އެން.ސީ: 548
– އެމް.އެން.ޕީ: 271
– ދަޑިމޮކްރެޓްސް: 241
އެޕްލިކޭޝަންތަކުގެ މަޢުލޫމާތު ކަށަވަރުކޮށް އެކްރެޑިޓް ކުރުމުގެ މަސައްކަތް މިހާރު ކުރިއަށްދާ ކަމަށާއި ރިޔާސީ އިންތިހާބުގައި 574 ވޯޓުލާ މަރުކަޒު ގާއިމް ކުރެވޭއިރު، ކޮންމެ ވޯޓުލާ މަރުކަޒެއްގައި، ރާއްޖެއިން ގާތްގަނޑަކަށް 14 ބޭފުޅުން ހަރަކާތްތެރިވާނެ ކަމަށް ކޮމިޝަނުން މައުލޫމާތުދެއެވެ.
އަދި އިންތިހާބު އޮބްޒާވްކޮށް މޮނިޓަރ ކުރުމަކީ، އިންތިހާބުގެ ކަންކަން ގާނޫނާއި ގަވާއިދުގެ އިމުގެ ތެރެއިން ކުރިޔަށް ގެންދިޔުމަށް، އީސީއަށް ލިބިގެންދާ ވަރަށް ބޮޑު ހިތްވަރެއް ކަމަށް ހަބީބު ފާހަގަކުރެއްވިއެވެ.
ރާއްޖޭގެ މޮނިޓަރުންނާއި، އޮބްޒާވަރުންގެ އިތުރުން، ބައިނަލްއަގްވާމީ އޮބްޒާވަރުންނާއި މޮނިޓަރުންގެ އޮބްޒަރވޭޝަންތަކާއެކު، ރިޔާސީ އިންތިހާބު 2023 ވެގެންދާނީ، އެންމެ ރަނގަޅަށް، އެންމެ ގިނަ އަދަދެއްގެ ބޭފުޅުން، އޮބްޒާވްކޮށް މޮނިޓަރ ކުރެވޭނެ އިންތިޚާބަށް ކަމަށް ހަބީބު ވިދާޅުވިއެވެ.
ރިޔާސީ އިންތިޚާބުގައި، ސިޔާސީ ޕާޓީތަކުން ފަސް ކެންޑިޑޭޓުން އަދި އަމިއްލަ ގޮތުން ތިން ކެންޑިޑޭޓަކު ވާދަކުރެއެވެ. ޕާޓީތަކުގެ ޓިކެޓުގައި ވާދަކުރައްވަނީ ޖުމްހޫރީ ޕާޓީގެ ފަރާތުން އެ ޕާޓީގެ ލީޑަރު އޮނަރަބަލް ޤާސިމް އިބްރާހީމް، އެމްޑީޕީގެ ފަރާތުން އެ ޕާޓީގެ އިސް ލީޑަރު، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް، ޕީޕަލްސް ނެޝަނަލް ކޮންގްރެސްގެ ފަރާތުން މާލޭ ސިޓީގެ މޭޔަރު ޑރ. މުހައްމަދު މުއިއްޒު، މޯލްޑިވްސް ނޭޝަނަލް ޕާޓީގެ ފަރާތުން އެ ޕާޓީގެ ރައީސް މުހައްމަދު ނާޒިމް، ދަ ޑިމޮކްރެޓްސްގެ ރިޔާސީ ކެންޑިޑޭޓެއްގެ ގޮތުގައި ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
އަމިއްލަ ކެންޑިޑޭޓުންގެ ގޮތުގައި އިންތިޚާބުގައި ވާދަކުރައްވަނީ މޯލްޑިވްސް ރިފޯމް މޫވްމަންޓުގެ ކުރީގެ ރައީސް ފާރިސް މައުމޫން، ކުރީގެ ހޯމް މިނިސްޓަރު އުމަރު ނަސީރު އަދި ޑިފެންސް މިނިސްޓްރީގެ ކުރީގެ ޑެޕިއުޓީ މިނިސްޓަރު ހަސަން ޒަމީލުއެވެ.
