އާބާދީ ކުޑަ މ. ވޭވަށަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިއަދު ވައުދުވެވަޑައިގެންފިއެވެ.
ވޭވަށުގެ އާބާދީގައި 240 މީހުން ހިމެނޭ އިރު، އެ ރަށުގައި މައިގަނޑު ގޮތެއްގައި ކުރަނީ މަސްވެރިކަމެވެ. އެގޮތުން މަސް ކައްކައި ހިއްކުމުގެ އިތުރުން، މަހުން ތައްޔާރުކުރާ އެކި ބާވަތްތަކުގެ އުފެއްދުންތައްވެސް މިރަށުގެ ރައްޔިތުން އާންމުކޮށް އުފައްދައި އުޅެއެވެ. ވޭވަށަށް މުއިއްޒު ވަޑައިގަތުމުން، މަރުހަބާ ދަންނަވަން ޕީޕީއެމް/ޕީއެންސީގެ ސަޕޯޓަރުން ނުމެފައިވެއެވެ.
ވޭވަށުގައި ތިބި އިދިކޮޅު ސަޕޯޓަރުންނާ ބައްދަލު ކުރައްވައި މުއިއްޒު އެންމެ ފުރަތަމަ ފާހަގަ ކުރެއްވި އެއް ކަމަކީ އެ ރަށުގެ ބަނދަރު ސިނާއީ މަސްވެރި ބަނދަރަކަށް ހަދާނެ ކަމުގެ ވައުދެވެ. އަދި ރަށުގެ ނެރު ބަދަލުކޮށް ދިނުމަށް ވެސް މުއިއްޒު ވައުދުވެވަޑައިގެންނެވިއެވެ.
އޭގެއިތުރުން އިޖުތިމާއީ މަރުކަޒެއް ގާއިމުކޮށް، ސިއްހީ މަރުކަޒުގެ ފެންވަރު އިތުރަށް ތަރައްގީކޮށް، ހިދުމަތްތައް ލިބޭނެ ގޮތް ހަމަޖައްސަވައި ދެއްވާނެ ކަމަށް ވެސް މުއިއްޒު ވިދާޅުވިއެވެ.
PPM PNC ge Riyaasee Candidate Dr. Mohamed Muizzu M. Veyvashah vadaigennevun
@MMuizzu @HucenSembe#Vote4Muizzu #DrMuizzuSembe2023#DhiveheengeRaajje #FreePresidentYameen pic.twitter.com/7nz0TLWPsL— Progressive Party of Maldives (@ProgressPartyMV) August 18, 2023
އެންމެ ފަހު ކަމެއްގެ ގޮތުގައި މުއިއްޒު ވެވަޑައިގެންނެވީ މި ރަށަށް ފުޓްސަލް ދަނޑެއް އަޅައި ދެއްވާނެ ކަމުގެ ވައުދެވެ. މީގެއިތުރުން ދ. އަތޮޅުގެ މާދެލިއަކީ މަސް ކިރުވައި އަދި މަސް ބަންދު ކުރާ ކާރުހާނާއަކަށް ބަދަލުކޮށްލާނެ ކަމަށް ވިދާޅުވިއެވެ.
