ރިޔާސީ އިންތިޚާބު ކާމިޔާބުކޮށް ވެރިކަން ލިބިއްޖެނަމަ އުފެދޭ ސަރުކާރެއްގެ ކެބިނެޓްގެ 4 ގޮޑި ބޮޑު ތިލަދުންމައްޗަށް ޚާއްސަ ކުރާނެކަމަށް ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބް ވިދާޅުވެއްޖެއެވެ.
ރިޔާސީ ކެމްޕޭނަށް ކުޅުދުއްފުއްޓަށް ކުރެއްވި ދަތުރުގައި އިލްޔާސް ވިދާޅުވީ ރިޔާސީ ކޮންމެ ރިޔާސީ އިންތިޚާބެއްގައިވެސް ސަރުކާރެއް އެކުލަވާލުމުގައި ބޮޑު ތިލަދުންމައްޗަކީ މުހިންމު ދައުރެއް އަދާކުރާ ރައްޔިތަކު ހިމެނޭ ސަރަހައްދެއް ކަމަށެވެ. ނަމަވެސް ސަރުކާރެއް އެކުލަވާލާއިރު އެމުހިންމުކަން ނުފެންނަކަމަށެވެ.
އޭނާ ވިދާޅުވީ ޑިމޮކްރެޓްސްގެ ވެރިކަމެއްގައި އެކަން ބަދަލު ކުރާނެކަމަށެވެ. ބޮޑު ތިލަދުންމަތީގެ ދައުރާއިއެކު ސަރުކާރެއް އެކުލަވާލާއިރު އިސްކޮށްދީ ކެބިނެޓްގެ 4 ޖާގަ ބޮޑު ތިލަދުންމައްޗަށް ޚާއްސަ ކުރާނެކަމަށް އިލްޔާސް ލަބީބް ވިދާޅުވިއެވެ.
ވަޒީރުންގެ މަޖިލީހުގައި މި ބޮޑު ތިލަދުންމަތީގެ ހަތަރު މަގާމް، ހަތަރު ކެބިނެޓް މިނިސްޓަރުން ތިބުން އެއީ މިސަރަހައްދުގެ ތަރައްގީއަށް ވަރަށް މުހިންމުކަމެއް. އެގޮތަށް މިހާރު ވާނީ އަޅުގަނޑުމެން ނިންމާފަ.
– އިލްޔާސް ވިދާޅުވިއެވެ.
ޑިމޮކްރެޓުންގެ ސަރުކާރެއްގައި ކުޅުދުއްފުށީގެ ބައިވެރިވުމަކީ އިންތިހާއަށް މުހިންމުކަމެއް ކަމަށާއި އެހެންވުމުން އޭގެ ތެރެއިން ދެ މަގާމެއް ކުޅުދުއްފުއްޓަށް ރިޒާވްކުރުމަކީ މުހިންމުކަމެއްގެ ގޮތުގައި ދެކިލައްވާކަމަށް އިލްޔާސް ވިދާޅުވިއެވެ. އިލްޔާސް ލަބީބާއި، ރައީސް ނަޝީދު ހިމެނޭހެން ހއ. އދ އަށް ކުރައްވާ ދަތުރުގައި ކުޅުއްފުއްޓާއި ދިއްދޫ ހިމެނޭހެން އެސަރަހައްދުގެ ގިނަ ރަށްތަކަށް ދިއުމަށް ވަނީ ހަމަޖެހިފައެވެ.
ކުޅުދުއްފުށީ ދެ މެމްބަރުންގެ ތެރެއިން ޑިމޮކްރެޓްސްއަށް ސޮއި ކުރެއްވި ޔާސިރު އަބްދުއް ލަތީފާއި، ސިޓީ ކައުންސިލްގެ މޭޔަރު އާތިފް އަދި ބައެއް އެހެން މެމްބަރުން ވަނީ އަލުން އެމްޑީޕީއާއި ގުޅިފައެވެ. ނަމަވެސް ރައީސް ނަޝީދު ވިދާޅުވީ އެބޭފުޅުން ބަދަލުވިޔަސް ކުޅުދުއްފުށިން ޑިމޮކްރެޓްސް އަށް އޮތް ތާއީދު ފަނޑު ނުވާނެކަމަށެވެ.
