އަންނަ ސެޕްޓެމްބަރު 9 ގައި އޮންނަ ރިޔާސީ އިންތިހާބުގައި ފައިސާގެ ނުފޫޒު ފޯރުވާނެ ކަމަށާއި އެކަމަށް ރައްޔިތުން ނުގުޑުމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި މާލެ ސިޓީގެ މޭޔަރު ޑރ. މުހައްމަދު މުއިއްޒު ދ. ހުޅުދެލީގައި މިއަދު ވިދާޅުވެއްޖެއެވެ.
މެދުރާއްޖެ ތެރޭގައި ހަތަރު ރަށަކަށް މުއިއްޒު ފެއްޓެވި ދަތުރުގައި ހުޅުދެލީގައި ބޭއްވި ޖަލްސާގައި މުއިއްޒު ވިދާޅުވީ ގައުމުގެ ކަންކަން މިހާރު ބޮއްސުންލާފައި އޮތް އިރު، އަޒުމަކަށް ހަދަން ޖެހޭނީ އެންމެ ފުރަތަމަ ގައުމު އިސް ކުރަން ކަމަށެވެ.
އަދި މި ކެމްޕެއިން ތެރޭގައި ފައިސާގެ ނުފޫޒާއި އެހެނިހެން ނުފޫޒުތައް އަންނާނެ ކަމަށާއި އެއަށް ރައްޔިތުން ބޯނުލެނބުމަށް މުއިއްޒު އެދިވަޑައިގެންނެވިއެވެ. މުއިއްޒު ވަނީ ހުޅުދެލީ ރައްޔިތުންނަށް ގިނަ ވައުދުތަކެއް ވެވަޑައިގެންފައެވެ. އެގޮތުން ރަށުގައި އައިސް ލިބޭނެ ގޮތް ހަމަޖައްސައި ދެއްވާނެ ކަމަށް މުއިއްޒު ވިދާޅުވިއެވެ. އެކަމުގެ ސަބަބުން ހުޅުދެލީގެ މަސްވެރިންނަށާއި ރަށުން ބޭރުން އަންނަ މަސްވެރިންނަށް ބޮޑު ކުރިއެރުމެއް ލިބޭނެ ކަމަށް އޭނާ ވިދާޅުވިއެވެ.
ރަށުގެ ސިއްހީ ނިޒާމު ވަރަށް ބޮޑަށް ހީނަރުވެފައިވާތީ ސިއްހީ މަރުކަޒުގެ ހާލަތު ރަނގަޅުކޮށް، ލެބޯޓަރީގެ ހިދުމަތްތައް ލިބޭނެ ގޮތް ހަމަޖައްސަވާނެ ކަމަށް ވެސް މުއިއްޒު ވިދާޅުވިއެވެ. އަދި ރަށުގެ ކުނި މެނޭޖް ކުރުމުގެ މައްސަލަ ހައްލުކޮށް ދެއްވާނެ ކަމަށް ވެސް ވިދާޅުވިއެވެ.
މީގެއިތުރުން ވެރިކަމަށް ހޮވިވަޑައިގެންފި ނަމަ، ސްކޫލްގެ ޖާގައިގެ އިތުރުކޮށް، ރަށުގެ ބިން ހިއްކުމުގެ މަސައްކަތް ކުރެއްވުމަށް މުއިއްޒު ވައުދުވެވަޑައިގެންނެވިއެވެ. މުއިއްޒު ވަނީ ރަށުގައި އޭޓީއެމްއެއް ގާއިމު ކުރުމަށް ވެސް ވައުދުވެވަޑައިގެންފައެވެ.
