އިންޑިއާގެ މަޝްހޫރު ސުޕަސްޓާރު ރަޖްނީކާންތުގެ އާ ފިލްމު "ރަޖްނީ ދަ ޖެއިލާ" އަށް 3 ދުވަހުގެ ތެރޭގައި 100 ކްރޯޑް ރުޕީސްއަށް ވުރެ ބޮޑު އާމްދަނީއެއް ލިބިއްޖެ އެވެ.
އެންމެ 3 ދުވަހުން 100 ކްރޯޑްގެ ކްލަބަށް މި ފިލްމް ވަދެފައިވާއިރުގައި މި ފިލްމް އަށް ބޮޑު އާމްދަނީއެއް ލިބޭނެ ކަމަށް މީގެ ކުރިންވެސް ވަނީ ލަފާކޮށްފައިއެވެ. ރަޖްނީކާންތުގެ ސްޓައިލްގެ މި ފިލްްމް އަށް ރިލީޒް ކުރި ދުވަހު އެކަނިވެސް ހަމައެކަނި އިންޑިއާގެ ސިނަމާތަކުގައި ދައްކައިގެން އެ ދުވަހު 48.35 ކްރޯޑް ރުޕީސް ލިބުނެވެ. މިދިޔަ ހުކުރު ދުވަހު 25.75 ކްރޯޑް ރުޕީސް ލިބުނުއިރު، ހޮނިހިރު ދުވަހު 35 ކްރޯޑް ލިބުނު ކަމަށް ރިޕޯޓްތައް ބުންޏެވެ.
ދުނިޔޭގެ ބޮކްސް އޮފީހުގައި އެ ފިލްމަށް 216 ކްރޯޑް ރުޕީސް ވަނީ ލިބިފަ އެވެ. އެ ފިލްމުގެ ބަޖެޓަކީ 200 ކްރޯޑް ރުޕީސް އެވެ. ޖެއިލަރ އަކީ ތަމަޅަ ފިލްމު އިންޑަސްޓްރީގެ ބޮޑެތި ގިނަ އެކަޓަރުން ކާސްޓްގަ ހިމެނޭ ފިލްމެކެވެ.
އެގޮތުން ރަޖިނީކާންތްގެ އިތުރުން މި ފިލްމުގެ ރޯލުތަކުން ރާމިޔާ ކްރިޝްނަން، ވިނޭޔަކަން އަދި ތަމަންނާ ބާޓިއާވެސް ފެނިގެން ދެއެވެ. މި ނޫނަސް އިންޑިއާގެ އެކި ހިސާބުތަކުގެ ވަރަށް މަޝްހޫރު އެކްޓަރުން މި ފިލްމުގަ ޚާއްސަ ފެނިލުންތަކެއް ގޮތުގައި ބައިވެރިވެއެވެ.
ރަޖްނީކާންތުގެ ފިލްމެއް ސިނަމާއަށް މި ގެންނަނީ ދެ އަހަރަށް ފަހު އެވެ. މިއީ ހަމަ އޭނާގެ ސްޓައިލްގެ ވަރުގަދަ ތަޅާފޮޅާ މަންޒަރުތައް ހިމެނޭ ފިލްމެކެވެ. މި ފިލްމަކީ ނެލްސަބް ލިޔެ، ޑައިރެކްޓްކޮށްފައިވާ ބްލެކް-ކޮމެޑީ އެކްޝަން ފިލްމެކެވެ. މި ފިލްމްގައި ރަޖްނިކާންތ ފެނިގެންދާނީ ފުލުހެއްގެ ގޮތުގައިއެވެ.
