ވިލާ ފައުންޑޭޝަނުން ލޯނު ނަގައިގެން ކިޔަވާފައިވާ ދަރިވަރުންގެ ލޯން މައާފްކޮށްދިނުމަށް ވިލާގެ ޗެއާމަން ގާސިމް އިބްރާހީމް ނިންމެވުމާ ގުޅިގެން އެކަމުގެ ރަސްމީ ލިޔުން ހަވާލުކުރަން ވިލާ ފައުންޑޭޝަނުން ނިންމައިފިއެވެ.

އެ ފައުންޑޭޝަނުން ބުނީ މި އޮގަސްޓް މަހުގެ 27، އަދި 28 ގައި ދަރިވަރުންނާއި ސިޓީ ހަވާލުކުރުން ކުރިއަށް ގެންދާނެ ކަމަށެވެ. މީގެ އިތުރުން ލޯނު މައާފުކުރުމުގެ އިދާރީ މަސައްކަތްތައް ކުރުމަށްޓަކައި ކިޔަވާ ދަރިވަރުންގެ މައުލޫމާތު ހިއްސާކުރުމަށް ވިލާ ފައުންޑޭޝަނުން ވަނީ އެދިފައެވެ. އެގޮތުން އޮގަސްޓް 20، ގެ ކުރިން މި ފޯމުގެ ޒަރިއްޔާއިން ދަރިވަރުންގެ މައުލޫމާތު އެ ފައުންޑޭޝަނާ ހިއްސާކުރެވޭނެއެވެ.

ވިލާ ފައުންޑޭޝަނުން ލޯން ނަގައިގެން މެޑިކަލް ދާއިރާއިން ކިޔެވި ދަރިވަރުންގެ ލޯންތައް ވެސް މީގެކުރިން މެއި 25، 2021 ގައި ވަނީ މައާފްކޮށްދީފައެވެ. ރާއްޖޭގެ ތަރައްގީއަށް އެންމެ ބޮޑު ހޭދައެއް ކުރެއްވި އަމިއްލަ އެއް ފަރުދަކީ ގާސިމް އިބްރާހީމްއެވެ.

ކިޔެވުމަށް ވިލާ ފައުންޑޭޝަނުންނާއި ގާސިމް އެކި މީހުންނަށް ދޫކޮށްފައިވާ ލޯން މައާފްކޮށްދިން ކަމަށް ގާސިމް އިއުލާން ކުރީ މިމަހުގެ ނުވަވަނަ ދުވަހުގެ ރޭ އޮތް އެމަނިކުފާނުގެ ރިޔާސީ ކެމްޕޭންގެ ޖަލްސާއެއްގައެވެ.

ގާސިމް ވިދާޅުވީ ވިލާ ފައުންޑޭޝަނުން އަދި އެމަނިކުފާނުގެ އަތްޕުޅުން ސީދާ ގޮތުން ދަރިވަރުންގެ ކިޔެވުމަށް ދޫކޮށްފައިވާ ލޯން ފައިސާ އެމަނިކުފާނަށް ކުރިއަށް އޮތް އިންތިހާބުގައި ކާމިޔާބު ލިބިވަޑައިނުގެންނެވި ނަމަވެސް ބޭނުން ނުވާ ކަމަށެވެ.

ޖުމްހޫރީ ޕާޓީގެ ރިޔާސީ މެނިފެސްޓޯ އިއުލާނުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން، ކޮވިޑުގެ ދުވަސްވަރު، ސިއްހީ ދާއިރާގައި މަސައްކަތްކުރާ ފަރާތްތަކުން އުފުލި ބުރަޔާއި، ތަހައްމަލު ކުރި ވޭން އިހުސާސް ކުރެއްވުނުކަމަށް ޤާސިމް އިބްރާހީމް ވިދާޅުވިއެވެ. އަދި އޭރު ވިލާ ފައުންޑޭޝަނުންނާއި ވިލާ ކުންފުނިން އަދި ޤާސިމް އިބްރާހީމްގެ އަމިއްލަފުޅު ހަރަދުގައި، ސިއްހީ ދާއިރާގެ އެކި ރޮނގުތަކުން ތައުލީމު ހާސިލްކޮށްފައިވާ އަދި ކުރަމުންދިޔަ ދަރިވަރުންގެ ސްޓޫޑެންޓު ލޯނު މައާފުކޮށްދެއްވިކަން ޤާސިމް އިއުލާން ކުރެއްވިއެވެ.