އިދިކޮޅު ޕީޕީއެމްގެ ރައީސް ޔާމީން ގެއަށް ބަދަލު ކުރުމުގައި އެހީތެރިވުމަށް ރިޔާސީ އިންތިޚާބު އޮބްޒާވު ކުރުމަށް ރާއްޖެ ވަޑައިގެން އުޅުއްވާ އީޔޫގެ ވަފްދުގެ އަރިހުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެދިވަޑައިގެންފިއެވެ.
ރިޔާސީ އިންތިޚާބް ހިނގާގޮތް ބެލުމަށްޓަަކައި އީޔޫއިން ފޮނުވާ ކޯ-ޓީމުގެ ޗީފް އޮބްޒަރވަރގެ ގޮތުގައި ހަމަޖައްސަވާފައިވާ ޔޫރަޕިއަން ޕާލަމެންޓުގެ މެންބަރު، މރ. ނާޗޯ ސަންޗެޒް އަމޯރ، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އަރިހަށް އިޙްތިރާމުގެ ޒިޔާރަތެއް މިއަދު ވަނީ ކުރައްވާފައެވެ.
މިބައްދަލުވުމުގައި ރައީސް ނަޝީދު ވަނީ އިންސާފުވެރި، މިނިވަން އިންތިޚާބެއް ބޭއްވުމަށްޓަކައި ރައީސް ޔާމީން ގެއަށް ބަދަލުކުރުމަށް އެހީތެރިވުމަށް، ރިޔާސީ އިންތިޚާބު އޮބްޒާވްކުރުމަށް ރާއްޖެ ވަޑައިގެންއުޅުއްވާ އީޔޫ ވަފްދުގެ އަރިހުން އެދިވަޑައިގެންފައެވެ.
ރައީސް ނަޝީދު ގެންދަވަނީ އިންތިޚާބުގެ ކެމްޕޭންގައި އެކި ރަށްރަށަށް ވަޑައިގެން ރައީސް ޔާމީން ގެއަށް ބަދަލުކޮށް މިނިވަން ކުރުމަށް ގޮވާލަމުންނެވެ. މި ސަރުކާރުން ކުރީގެ ރައީސް ޔާމީން އަބްދުލްގައްޔޫމާއި ދޭތެރޭ އަމަލު ކޮށްފައިވާ ގޮތަކީ އެއީ އެންމެން ވެސް ކަންބޮޑުވާ ކަމެއް ކަމަށާއި އެމްއެމްޕީއާރުސީގެ ވައްކަމުގެ މައްސަލައިގައި 273 މީހުން ހިމެނޭ ކަމަށް ނަޝީދު ވަނީ ވިދާޅުވެފައެވެ. ނަމަވެސް އެމައްސަލައިގައި އެންމެ ބޭފުޅަކު ހިފައި ހައްޔަރުކޮށް، ފަސް އަހަރުވީމާ އެއީ އިންސާފުގެ ގޮތުގައި ބަލައި ގަނެވޭނެ ކަމެއް ނޫން ކަމަށް ނަޝީދު ވިދާޅުވިއެވެ.
އިންސާފުވެރި، މިނިވަން އިންތިޚާބެއް ބޭއްވުމަށްޓަކައި ރައީސް ޢަބްދުالله ޔާމީން ގެއަށް ބަދަލުކުރުމަށް އެހީތެރިވުމަށް، ރިޔާސީ އިންތިޚާބު އޮބްޒާވްކުރުމަށް ރާއްޖެ ވަޑައިގެންއުޅުއްވާ އީޔޫ ވަފްދުގެ އަރިހުން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އެދިވަޑައިގެންފި pic.twitter.com/tfn8z8KPzW
— People's Majlis (@mvpeoplesmajlis) August 15, 2023
ނަޝީދު ވިދާޅުވީ، އެމަނިކުފާނަށް ހަގީގަތުގައި މީހުން ޖަލުން ނެރެން އެނގިވަޑައިގަންނަވާ ކަމަށެވެ. އެކަމަކީ އެއީ އެމްޑީޕީގައި އުޅުނުއިރު، ފައްކާކޮށްފައިވާ ނިޒާމެއް ކަމަށް ވެސް ނަޝީދު ވިދާޅުވިއެވެ.
ނަޝީދު ވަނީ ރައީސް ޔާމީން މިނިވަން ކުރުމަށް ޕީޕީއެމް ލީޑަރޝިޕުން އެކަށީގެންވާ މަސައްކަތެއް ނުކުރާކަމަށް ވިދާޅުވެ ބަހުގެ ހަމަލާތަކެއްވެސް ދެއްވަފައެވެ. ނަމަވެސް އިދިކޮޅު ކޯލިޝަނުން ބުނެފައިވަނީ ރައީސް ޔާމީން ޖަލަށް ދާންޖެހުނީ ރައީސް ނަޝީދުގެ ބައިވެރިވުމާއިވެސް އެކުގައި ކަމަށެވެ.
