ރިޔާސީ އިންތިޚާބުގައި ވާދަކުރައްވާ އިދިކޮޅު ޕްރޮގްރެސިވް ކޯލިޝަންގެ ކެނޑިޑޭޓް ޑރ.މުހައްމަދު މުއިއްޒުއާއި، ޖޭޕީގެ ފަރާތުން ވާދަކުރައްވާ ޤާސިމް އިބްރާހިމާއި، ޑިމޮކްރެޓްސްގެ ކެންޑިޑޭޓް އިލްޔާސް ލަބީބްގެ ކެންޑިޑެސީ އިލެކްޝަންސް ކޮމިޝަނުން ބަލައިގެންފިއެވެ.
މިތިން ކެންޑިޑޭޓުންގެ ތެރެއިން މުއިއްޒުއާއި، ޤާސިމް ފޯމު ހުށަހަޅުއްވާފައިވަނީ މިއަދުއެވެ. އިލްޔާސްގެ ފޯމުގައި ދިމާވި މައްސަލަ ހައްލު ކުރުމަށްފަހު މިއަދު ވަނީ ފޯމަށް ހުއްދަ ދީފައެވެ.
އިލްޔާސްގެ ފޯމު އިލެކްޝަނުން ބަލައި ނުގަތީ އޭނާގެ އިންތިޚާބީ އެޖެންޓު ކަމުގައިވާ ފާޠިމަތު ނިއުމާގެ މައްޗަށް ހުކުމްކޮށްފައި އޮތް ސާބިތު ދަރަންޏެއް ޚަލާސް ކުރިކަން އެނގެން ނެތުމުންނެވެ. އެހެންނަމަވެސް، ހުށަހަޅަންޖެހޭ ލިޔެ ކިޔުންތައް ހަމަކުރުމުން، އިލްޔާސްގެ ފޯމު މިހާރު އިލެކްޝަންސް ކޮމިޝަނުން ވަނީ ބަލައިގެންފައެވެ. އިލްޔާސް ލަބީބްގެ ރަނިންމޭޓެއްގެ ގޮތުގައި ކަނޑައަޅާފައިވަނީ އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރުއެވެ.
ޕީޕީއެމް / ޕީއެންސީ ރިޔާސީ އިންތިޚާބު ބޮއިކޮޓް ކުރުމަށް ރައީސް ޔާމީން އެދިވަޑައިގަތީ އެމަނިކުފާނުގެ ކެންޑިޑަސީ މައްސަލަ ސުޕްރީމް ކޯޓުން ނާކާމިޔާބު ވެވަޑައިގަތުމުންނެވެ. ސުޕްރީމްކޯޓުން މައްސަލަ ނިންމެވުމުން ރައީސް ޔާމީން ޕާޓީއަށް ފޮނުއްވި މެސެޖެއްގައި ވަނީ އެމަނިކުފާނުގެ އަސާސީ ހައްގެއް ނިގުޅައިގެންފައިވާކަމަށް ވިދާޅުވެ އިންތިޚާބު ބޮއިކޮޓްކުރުމަށެވެ.
އަންނަ ރިޔާސީ އިންތިޚާބުގައި ވާދަކުރެއްވުމަށް ރައީސް ޔާމީން ޝަރުތު ފުރިހަމަނުވާކަމަށް ސުޕްރީމްކޯޓުން ނިންމަވާފައިވަނީ، ރައީސް ޔާމީންގެ ކެންޑިޑަސީ ފޯމް އިލެކްޝަންސް ކޮމިޝަނުން ބަލައި ނުގަތުމުން އެމަނިކުފާނު ހުށައެޅި މައްސަލާގައި އިއްޔެ އިއްވެވި ޙުކުމުގައެވެ. އެ މައްސަލަ ބެއްލެވި ހަތް ފަނޑިޔާރުންގެ އިއްތިފާގުން ނިންމެވި، ރައީސް ޔާމީންގެ ކެންޑިޑެސީ ބަލައިނުގަންނަން އީސީން ނިންމީ ރަނގަޅަށް ކަމަށެވެ.
ޤާސިމް އިބްރާހީމްގެ ކެންޑިޑަސީ ފޯމު ހުށައެޅުމަށް މިއަދު ވަޑައިގެންނެވިއިރު، ޤާސިމްގެ އަރިހުގައި މިހާރު ޓްރާންސްޕޯޓް މިނިސްޓަރ އަދި އަނބިކަނބަލުން އައިޝަތު ނަހުލާއާއި، ރަނިންމޭޓް ޑރ އަމީން އިބްރާޙީމްވެސް ވަނީ ބައިވެރިވެޑައިގެންފައެވެ. ގާސިމް އިބްރާހީމްގެ ރަނިންމޭޓަކަށް ޑރ އަމީން ހަމަޖައްސަވާފައިވަނީ އިއްޔެގެ ވަގުތެއްގައެވެ.
ރިޔާސީ އިންތިޚާބުގައި ވާދަކުރެއްވުމަށް އިލެކްޝަންސް ކޮމިޝަނަށް ކެންޑިޑެސީ ފޯމް ހުށައެޅުއްވީ ގާސިމް އިބާރާހިމްއެވެ. އަދި މިފޯމާ ހަވާލުވެވަޑައިގަތީ އިލެކްޝަންސް ކޮމިޝަންގެ ރައީސް ފުއާދު ތަޢުފީޤެވެ.
އިލެކްޝަނުން ކަނޑައެޅި މުއްދަތު ހަމަވިއިރު ހުށަހެޅީ 8 ކެނޑިޑޭޓުންނެވެ. ކެނޑިޑޭޓުންގެ މެދުގައި ގުރުއަތުލުން އޮންނާނީ ބުދަ ދުވަހުއެވެ.
