ރިޔާސީ އިންތިހާބުގެ ވާދަކުރެއްވުމަށް ޕީޕީއެމްގެ ރިޔާސީ ކެންޑިޑޭޓް، ރައީސް ޔާމީން ހުށަހެޅުއްވި ކެންޑިިޑެސީ ބަލައިނުގަތުމާއި ގުޅިގެން ސުޕްރީމް ކޯޓަށް ހުށަހަޅާފައިވާ މައްސަލައިގެ ހުކުމް އިއްވެވުމުގެ މަޖިލިސް މިއަދު ހެދުނު 9:30 އަށް ތާވަލުކޮށްފިއެވެ.
ރިޔާސީ އިންތިހާބުގެ ވާދަކުރެއްވުމަށް ރައީސް ޔާމީންގެ ފަރާތްޕުޅުން އަންގާރަ ދުވަހު ހުށަހެޅުއްވި ކެނޑިިޑަސީ ބަލައިނުގަތުމަށް އިލެކްޝަންސް ކޮމިޝަނުން ނިންމި މައްސަލަ ސުޕްރީމް ކޯޓަށް ހުށަހަޅުއްވާފައިވަނީ ބުދަދުވަހުގެ ފަތިހުގެ ވަގުތެއްގައެވެ. އަދި އެ މައްސަލައާ ގުޅޭގޮތުން ސުޕްރީމް ކޯޓުގައި ހުކުރު ދުވަހު ބޭއްވި އަށެއްކަ ގަޑިއިރުގެ އަޑުއެހުމަށްފަހު އުއްތަމަ ފަނޑިޔާރު އޮނަރަބަލް މުއުތަސިމް އަދުނާނު ވިދާޅުވީ، ދެން އޮންނާނީ މައްސަލައިގެ ހުކުމް އިއްވާ މަޖިލިސްކަމަށެވެ. ސުޕްރީމް ކޯޓުން ވަނީ ރައީސް ޔާމީން ހުށަހެޅުއްވި މައްސަލައިގައި ހުކުމް އިއްވުން މިއަދު ހެނދުނު 9:30 އަށް ތާވަލުކޮށްފައެވެ.
އިންތިޚާބުތަކާއި ބެހޭ އާއްމު ޤާނޫނު ބުނާގޮތުން ކެންޑިޑެސީއާއި މެދު ސުވާލު އުފެއްދިއްޖެނަމަ އެ މައްސަލަ ހުށަހެޅޭނީ ހަމައެކަނި ސުޕްރީމް ކޯޓަށެވެ. އަދި މިގޮތަށް ހުށައަޅާ މައްސަލައެއް އެ ކޯޓަށް ހުށައަޅާތާ ގިނަވަގެން 7 ދުވަހުގެ ތެރޭގައި ނިންމަވަންޖެހެއެވެ. އަދި މިފަދަ މައްސަލަތައް ނިންމަންވާނީ ސުޕްރީމް ކޯޓުގެ ހުރިހާ ފަނޑިޔާރުން ހިމެނޭ ބެންޗަކުންކަމަށާއި، ސުޕްރީމް ކޯޓުގެ އެ ނިންމެވުމަކީ އެންމެ ފަހުގެ ނިންމެވުންކަމަށްވެސް ޤާނޫނު އަސާސީގައި ވަނީ ބަޔާންކޮށްފައެވެ.
11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ރައީސް ޔާމީންގެ ކެނޑިޑަސީ ބަލައިނުގަތުމަށް ނިންމި އެއް ސަބަބަކީ 12 މަސް ދުވަހަށްވުރެ ދިގު މުއްދަތެއްގެ ހުކުމެއް ތަންފީޒުކުރައްވަން ގެންދެވުމެވެ. އެއި ޤާނޫނު އަސާސީ ބުނާގޮތުން ރައީސުލްޖުމްހުރިއްޔާކަމުގެ މަގާމަށް ކުރިމަތިލާ މީހަކީ ޖިނާއި ކުށެއް ސާބިތުވެގެން 12 މަސް ދުވަހަށްވުރެ ދިގު މުއްދަތެއްގެ ހުކުމެއް އޮތް މީހަކަށްވާނަމަ، އެ ހުކުމެއް ތަންފީޒުކޮށް ނިމުމުނުތާ ނުވަތަ ކަނޑައެޅުނު އަދަބު މައާފު ކުރިތާ 3 އަހަރުވެފައިވާ މީހަކަށް ވާންޖެހެއެވެ.
ރައީސް ޔާމީންގެ ކެނޑިޑަސީ ބަލައިނުގަތުމަށް ނިންމި ދެވަނަ ސަބަބެއްކަމަށް އިލެކްޝަންސް ކޮމިޝަނުން ވިދާޅުވަނީ އެމަނިކުފާނު އަދާކުރައްވަންޖެހޭ ސާބިތު ދަރަންޏެއް އޮތުމެވެ. ހުކުމާއި އެއްގޮތަށް ސާބިތު ދަރަންޏެއް ނުދައްކާނަމަ އިންތިހާބުގައި ވާދަކުރުމުގެ ފުރުސަތު ގެއްލޭނެކަމަށް ގާނޫނުއަސާސީގައި ބުނެއެވެ. އިލެކްޝަންސް ކޮމިޝަނުން ވިދާޅުވީ އާރަށުގެ މައްސަލައިގައި ރައީސް ޔާމީންގެ މައްޗަށް އިއްވި 11 އަހަރުގެ ޖަލު ހުކުމުގައި ހިމެނޭ، 5 މިލިއަން ޑޮލަރުގެ ޖޫރިމަނާ ފައިސާ ކޯޓު ހުކުމުގައި އޮތް 5 މަސް ދުވަހުގެ ތެރޭގައި ދައްކާފައިނުވާތީ އިންތިހާބުގައި ވާދަކުރެއްވުމުގެ ޝަރުތެއް އުނިވެފައިވާކަމަށެވެ.
އެ ޖޫރިމަނާ ފައިސާއާ ގުޅިގެން ޝަރީއަތުގެ މަޖިލީހުގައި ވާހަކަ ދައްކަވަމުން ރައީސް ޔާމީން ވިދާޅުވީ މީގެކުރިން ކުރި ހުކުމްގައި އޮތް ޖޫރިމަނާގެ ފައިސާވެސް ދައްކަން ނޯޓިސްއެއް ލިބިވަޑައިގެންނެވިކަމަށެވެ. ނަމަވެސް އާރަށުގެ މައްސަލައިގައި ހިމެނޭ 5 މިލިއަން ޑޮލަރުގެ ޖޫރިމަނާ ފައިސާ ދެއްކުމާއި ގުޅޭގޮތުން މިހާތަނަށް ނޯޓިސްއެއް ލިބިވަޑައިގެންފައި ނުވާކަމަށެވެ. ޔާމީން ވިދާޅުވީ އެ ފައިސާ ނުދެއްކުމުގެ އެއްވެސް ނިޔަތެއް ނެތްކަމަށާއި، ފައިސާ ނުދެއްކި އޮތީ އެ ފައިސާ ދައްކަން އޮތް ސުންގަޑި އެނގިވަޑައިނުގަންނަވާތީކަމަށްވެސް ޔާމީން ވިދާޅުވިއެވެ.
ހުކުމެއް އޮތުމުން ކެނޑިޑަސީ ބަލައިނުގަތުމަށް އިލެކްޝަނުން ނިންމެވި ނިންމެވުމާއި ގުޅިގެން ރައީސް ޔާމީންގެ ވަކީލުން މައިގަނޑު ގޮތެއްގައި ފާހަގަކުރައްވަމުން ގެންދެވީ ހުކުމެއް އޮތްކަމަށް ބުނާ ބައި ތަރުޖަމާކުރާނެ ގޮތަކާއި ގުޅޭގޮތުންނެވެ. ވަކީލުން ވިދާޅުވީ ޤާނޫނު އަސާސީގައި ރައީސުލްޖުމްހޫރިއްޔާކަމުގެ މަގާމަށް ކުރިމަތިލާ މީހަކީ ޖިނާއި ކުށެއް ސާބިތުވެގެން 12 މަސް ދުވަހަށްވުރެ ދިގު މުއްދަތެއްގެ ހުކުމެއް އޮތް މީހެއްކަމަށް ބުނާ ބުނުމަކީ، އިސްތިއުނާފު ކުރުމުގެ މުއްދަތު ހަމަވެފައިވާ ހުކުމާއި، ނުވަތަ އިސްތިއުނާފް ނުކުރާ ހުކުމާއި، އެންމެ މަތީ ކޯޓުން ގޮތް ކަނޑައަޅާފައިވާފަދަ މައްސަލަތައްކަމަށެވެ. އެހެންކަމުން ރައީސް ޔާމީންގެ މައްޗަށް ދަށު ކޯޓުން އިއްވާފައިވާ 11 އަހަރުގެ ޖަލު ހުކުމުގެ އިސްތިއުނާފް މަރުހަލާތައް ނުނިމެނީސް، އެމަނިކުފާނަށް އިންތިހާބުތަކުގައި ވާދަކުރުމަށް ލިބިދީފައިވާ އަސާސީ ހައްގު ނުހިފެހެއްޓޭނެކަމަށް ރައީސް ޔާމީންގެ ވަކީލުން ވިދާޅުވިއެވެ.
ރައީސް ޔާމީންގެ ފަރާތްޕުޅުން ހުށަހެޅުއްވި މައްސަލައިގައި ވަނީ ކެނޑިޑަސީ ބަލައިގަތުމަށް އިލެކްޝަންސް ކޮމިޝަނުގެ މައްޗަށް އެންގެވުމުގެ އިތުރުން، ރައީސް ޔާމީނަށް ކުރިމަތި ނުލެވޭނަމަ ޕީޕީއެމުން އެހެން ކެނޑިޑޭޓަކު ނެރުމަށް ފުރުޞަތު ދެއްވުމަށްވެސް އެދިވަޑައިގެންފައެވެ.
ރައީސް ޔާމީންގެ ހުކުމަކީ އިދިކޮޅު ފަރާތްތަކާއި ސަރުކާރު ކޯލިޝަންގައި ހިމެނޭ ފަރާތްތަކުގެވެސް ނަޒަރު ހުއްޓިފައިވާ މައްސަލައެކެވެ. އަދި މިއީ މިފަހަރުގެ ރިޔާސީ އިންތިޚާބަށް ނިންމާނެ އެންމެ ބޮޑު ނިންމުންވެސް މެއެވެ.
