ރައީސް ޔާމީނަށް ކުރިމަތިނުލެވޭ ހާލަތެއްގައި ދެން ޕީޕީއެމުން އެހެން ކެންޑިޑޭޓަކު ދެއްކިޔަސް ތާއީދެއް ނުކުރާނެ ކަމަށް ރައްޔިތުންގެ މަޖިލީހުގެ މަޑަވެލީ ދާއިރާގެ ކުރީގެ މެމްބަރު މުއާޒު މުހައްމަދު ރަޝީދު ވިދާޅުވެއްޖެއެވެ.
މުއާޒު މިހެން ވިދާޅުވީ އިދިކޮޅު ކޯލިޝަނުން ރައީސް ޔާމީނަށް ކުރިމަތި ނުލެވޭ ހަލަތެއް ކުރިމަތިވެެއްޖެނަމަ، ޕީއެންސީން ކެނޑިޑޭޓް ނެރުމަށް ނިންމައި އެކެނޑިޑޭޓަކީ ޑރ.މުއިއްޒުކަމަށް އިންތިޚާބު ކޮށްފައި ވަނިކޮށް، ޕީޕީއެމްއިން އިތުރު ކެނޑިޑޭޓެއް ނެރުމަށް ނިންމާފައިތީ އެކަމާއި ހިންހަމަ ނުޖެހި ކުރެއްވި ޓުވީޓުގައެވެ.
މުއާޒު ވިދާޅުވީ އިދިކޮޅު ޕްރޮގްރެސިވް ކޯލިޝަނުން ރައީސް ޔާމީނަށް ރިޔާސީ އިންތިޚާބުގައި ކުރިމަތި ނުލެވޭ ހާލަތެއްގައި ޕީޕީއެމްއިން އެހެން ކެންޑިޑޭޓަކު ދެއްކިޔަސް ދެން ތާއީދު ނުކުރައްވާނެކަމަށެވެ. ރައީސް ޔާމީނަށް ކުރިމަތި ނުލެވޭ ހާލަތުގައި އިދިކޮޅު ކޯލިޝަނުން ނެރޭނެ ކެނޑިޑޭޓަކީ ޑރ.މުއިއްޒުކަމަށް ނިންމަވާފައިވާއިރު، އެނިންމުމާއި ދެކޮޅަށް ދެން ނިންމާ އެއްވެސް ނިންމުމަކަށް ތާއީދު ނުކުރާނެކަމަށް މުއާޒު ވިދާޅުވިއެވެ.
ރައީސް ޔާމީނަށް ކުރިމަތިނުލެވޭ ހާލަތެއްގައި ދެން ޕީޕީއެމުން އެހެން ކެންޑިޑޭޓަކު ދެއްކިޔަސް ތާއީދެއް ނުކުރާނަން. ރައީސް ޔާމީނަށް ނުލެވޭ ހާލަތަކަށް ކަމަށްބުނެ ޕީއެންސީން ކެނޑިޑޭޓަކު ވަނީ ހޮވާފަ. ބަތްކައްކައްކާ ކުޅެން ނޫޅޭ.
– މުއާޒު ވިދާޅުވިއެވެ.
ޔާމީނަށް ކުރިމަތި ނުލެއްވޭ ހާލަތެއްގައި އިންތިޚާބަށް މުއިއްޒު ނެރުއްވަން ނިންމެވި ނަމަވެސް، މުއިއްޒަކީ މިހާރު "ޕްލޭން ސީ" ކަމަށް ޕީޕީއެމުން އިއްޔެ ސުޕްރީމު ކޯޓުގައި ވަނީ ބުނެފައެވެ. ޕްލޭން އޭ އަކީ ޔާމީން ކަމަށްވާއިރު، އެމަނިކުފާނުގެ ޕްލޭން ބީ އަކީ ސުޕްރީމް ކޯޓުން ހޯދާ ފުރުސަތުގައި ޕީޕީއެމްއިން އެހެން ކެންޑިޑޭޓެއް ނެރުމެވެ.
އޭގެފަހުން މުއިއްޒު ވަނީ އޭނާގެ ރަނިންމޭޓަކަށް ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެންބެ) މިއަދު ހަމަޖައްސަވައިފައެވެ. އަދި މުއިއްޒު ތަކުރާރުކޮށް ވިދާޅުވަނީ އޭނާ އަކީ "ބެކްއަޕް" ކެންޑިޑޭޓު ކަމަށާއި އަދިވެސް އުއްމީދު ކުރައްވަނީ ޔާމީނަށް އިންތިޚާބުގައި ވާދަކުރެއްވުމުގެ ފުރުސަތު ލިބިގެން ދިއުން ކަމަށެވެ.
ޔާމީންގެ ކެންޑިޑެސީ ބަލައިނުގަތީ ރިޝްވަތާއި މަނީ ލޯންޑަރިންގެ ކުށުގައި އިއްވާފައިވާ 11 އަހަރުގެ ޖަލު ހުކުމެއް އޮތުމާއި އެ ހުކުމާ އެކު އޮތް ފަސް މިލިއަން ޑޮލަރުގެ ޖޫރިމަނާ ނުދައްކާ އޮތުމުންނެވެ. ޔާމީންގެ ކެންޑިޑެންސީއާ ގުޅޭ މައްސަލާގެ އަޑުއެހުންތައް އިއްޔެ ހަވީރުން ފެށިގެން ރޭގަނޑު ވެސް ކުރިއަށް ގެންގޮސް ވަނީ ނިންމާލައިފައެވެ. ދެން އެ މައްސަލާގައި އޮންނާނީ ހުކުމް އިއްވުމުގެ އަޑުއެހުމެވެ.
