އިނދިކޮޅު ކެނޑިޑޭޓެއްގެ ގޮތުގައި ކުރީގެ ރައީސް ޔާމިނަށް ކުރިމަތި ލެވޭގޮތް ނުވެއްޖެ ހާލަތެއްގައި، އިދިކޮޅު ބެކްއަޕް ކެނޑިޑޭޓެއްގެ ގޮތުގައި ޕީއެންސީގެ ރިޔާސީ ކެނޑިޑޭޓް ޑރ. މުއިއްޒު ހުރި ނަމަވެސް، ޕީޕީއެމްގެ ކެނޑިޑޭޓަކު ހުންނާނެ ކަމުގައި އިދިކޮޅު މައި ޕާޓީ ޕީޕީއެމްގެ އިސް ފަރާތްތަކުންނާއި ރައީސް ޔާމިންގެ ވަކީލުން ވިދާޅުވެއްޖެއެވެ.

ރޭ ސުޕްރިމް ކޯޓުގައި ކުރިޔަށްދިޔަ އިދިކޮޅު ރިޔާސީ ކެނޑިޑޭޓް، ރައީސް ޔާމިންގެ ކެނޑިޑަސީގެ މައްސަލާގައި ވަކާލާތު ކުރައްވަމުން، ރިޔާސީ އިންތިޚާބުގައި ވާދަކުރުމަށް އިދިކޮޅު ކޯލިޝަނުން ކަނޑައަޅުއްވާފައިވާ ރައީސް ޔާމީންގެ ކެނޑިޑެސީ އާއި ގުޅޭގޮތުން ޕީޕީއެމްއިން ސްޕްރީމް ކޯޓަށް ހުށަހަޅުއްވާފައިވާ މައްސަލައިގައި އެމަނިކުފާނަށް އިންތިޚާބުގައި ވާދަނުކުރެވޭ ކަމަށް ނިންމައިފިނަމަ، ޕީޕީއެމުން ކެނޑިޑޭޓަކު ނެރުމަށް އިތުރު ވަގުތުދިނުމަށް ވަނީ އެދިފައެވެ.

ރޭ ބޭއްވުނު އަޑު އެހުމުގައި ރައީސް ޔާމީންގެ ފަރާތްޕުޅުން ވާހަކަ ދައްކަވަމުން ޤާނޫނީ ވަކީލް ހަމްޒާ ވިދާޅުވީ އެބޭފުޅުންގެ ހުށަހެޅުމަކީ އިލެކްޝަނުން ނިންމަވާފައިވާ ނިންމުން ބާތިލްކޮށް ރައީސް ޔާމީނަށް އިންތިޚާބުގައި ވާދަކުރެވޭނެ އަމުރެއް ނެރެދެއްވުން ކަމަށެވެ. އަދި ރައީސް ޔާމީނަށް ވާދަ ނުކުރެވޭ ހާލަތެއްގައި އިތުރު ކެނޑިޑޭޓަކު ނެރުމަށް ޖާގަ ދިނުމަށް އޭނާވަނީ ފަނޑިޔާރުންގެ ކިބައިން އެދިފައެވެ. މީގެ އިތުރުން ރައީސް ޔާމީނަށް ވާދަކުރެވޭ ކަމަށް ނިންމައިފިނަމަވެސް އިތުރު ވަގުތު ދެއްވުމަށް ވަނީ ހުށަހަޅާފައެވެ.

އެހެންނަމަވެސް ރޭ ބޭއްވުނު އަޑު އެހުމަށްފަހު، މީޑިއާތަކާއި ވާހަކަ ދައްކަވަމުން ރައީސް ޔާމިންގެ އިސް ވަކީލު ޑރ. ޖަމީލު މީޑިއާތަކަށް މައުލޫމާތު ދެއްވަމުން ވިދާޅުވެފައިވަމީ، ޕީޕީއެމްއަކީ ރާއްޖޭގަ އޮތް އެންމެ ބޮޑު ޕާޓީ ކަމަށާއި ރައީސް ޔާމިންއަށް ކުރިމަތިލެއްވޭ ގޮތް ނުވެއްޖެނަމަވެސް، ޕީޕީއެމްގެ ކެނޑިޑޭޓަކު ހުނާނޭ ކަމުގައެވެ. އަދި އޭނާ ވިދާޅުވީ، ޕީއެންސީގެ ކެނޑިޑޭޓަކީ އެންމެ "ވާރސްޓު ސިނާރިއޯ" (އެންމެ ގޯސް ހާލަތު) ކަމުގައެވެ.

އެކަމުގަ މާބޮޑަށް ހާސްވާނެ ކަމެއް ނެތް. ތިބޭފުޅުން ބިރު ގަންނާނެ ކަމެއް ނެތް. ރާއްޖޭގެ ރިޔާސީ ނިސާމުގަ އަދި ރާއްޖޭގެ ސިޔާސީ ނިޒާމުގަ ޕީޕީއެމްއަކީ އެންމެ ބޮޑު ޕާޓީ. އިގޭތޯ!.. ޕީޕީއެމްގެ މައްސަލައެއް އަޅުގަޑުމެން ކޯޓަށް މި ގެނައީ. އަޅުގަޑުމެން ފުރަތަމަ އުއްމީދު މިކުރަނީ ، އަޅުގަޑުމެންގެ ޔަގީންކަން އޮތީ، އަޅުގަޑުމެންގެ އިތުބާރަކީ އިރާދަ ކުރެއްވިއްޔާ މި ޓިކެޓް ސަލާމަތްވެގެން މި ކޯޓުން ނިކުންނާނެ. އިގޭތޯ!.. އެހެންވީމަ ދޭއް، ތިނެއްގެ ވާހަކައެއްވެސް އަޅުގަޑުމެންގެ ސިކުނޑިއަކު ނެތް. ދެން ދެވަނަ ވާހަކައަކީ، އޯލްޓަރނޭޓިވް ޕްލޭނެއް (އެހެން ހައްލެއް) ނއަތުވެއްޖެއްޔާވެސް އަންނާނީ ޕީޕީއެމްގެ އޯލްޓަރނޭޓިވް ޕްލޭންއެއް. ޕީއެންސީއަކީ އަޅުގަޑު ގަބޫލުކުރާ ގޮތުގައި "ވޯސްޓް ކޭސް ސިނާރިއޯ" (އެންމެ ގޯސް ހާލަތު).

ޕީއެންސީގެ ކެނޑިޑޭޓަކު ހުރިނަމަވެސް، ޕީޕީއެމްގެ ކެނޑިޑޭޓަކުން ހުންނާނެކަމަށް ވިދާޅުވަމުން ޑރ. ޖަމީލް ވިދާޅުވިއެވެ.

އިިދިކޮޅު ކެނޑިޑޭޓެއްގެ ގޮތުގައި ރައީސް ޔާމިން ނޫން ކެނޑިޑޭޓެއްގެ ވާހަކަ ދެއްކުން މީގެ ކުރިން ޕީޕީއެމްގެ ލީޑަރޝިޕަށާއި އެކްޓިވިސްޓުންނަށް މަނާ ކޮށްފައި އޮތްނަމަވެސް، ރޭގެ އަޑު އެހުމަށްފަހު މީޑިއާތަކަށް މައުލޫމާތު ދެއްވަމުން، ނައިފަރު ދާއިރާގެ މެމްބަރު އަހުމަދު ޝިޔާމުވެސް ވިދާޅުވެފައިވަނީ، ރައީސް ޔާމިނަށް ކުރިމަތި ނުލެވިއްޖެނަމަ ޕީޕީއެމްގެ ކެނޑިޑޭޓަކު ހުންނާނެ ކަމުގައެވެ.

އޭނާ ވިދާޅުވީ އިދިކޮޅު ރިޔާސީ ކެނޑިޑޭޓަކު ނެރުމަށް ޕްލޭން އޭ، ބީ، އަދި ސީ ވެސް އޮތް ކަމުގައެވެ. އެގޮތުން ޕްލޭން އޭއަކީ ރައީސް ޔާމިން ވާދަކުރެއްވުން ކަމަށާއި، އެންމެވެސް އެދޭ ގޮތަކީވެސް އެއީ ކަމުގައި އޭނާ ވިދާޅުވިއެވެ. އޭނާ އިތުރަށް ވިދާޅުވީ، ޕްލޭން ސީގެ ވާހަކަ ދައްކަވާނީ ޕްލޭން ބީ އަށްފަހުގައި ކަމަށެވެ. އެއީ އިދކޮޅު ޕީޕީއެމްގެ ކެނޑިޑޭޓަކު ނެރުންކަމަށް ވިދާޅުވަމުން އޭނާ ވިދާޅުވީ އެހާލަތުގައި ޕީޕީއެމްގެ ކެނޑިޑޭޓަކު ހުރެފަ ޕީއެންސީގެ ކެނޑިޑޭޓަކުވެސް ހުންނާނެ ކަމުގައެވެ.