އިދިކޮޅު އެންމެ ބޮޑު ޕާޓީ ޕީޕީއެމްގެ ރިޔާސީ ކެނޑިޑޭޓް ރައީސް ޔާމީންގެ ކެންޑިޑެސީ އިލެކްޝަންސް ކޮމިޝަނުން ބަލައި ނުގަތް މައްސަލާގައި ސްޕްރީމް ކޯޓުގައި ކުރިއަށްދާ އަޑުއެހުންތައް ނިންމާލައި، ހުކުމް ކުރުމަށް ތައްޔާރުވެއްޖެއެވެ.
މިއަދު ހަވީރު 3:45 ގައި ފެށި ޝަރީއަތުގެ އަޑުއެހުންތައް ދެންމެ ނިންމާލާފައިވާއިރު، މައްސަލަ ހުށަހެޅި ފަރާތް، މައްސަލަ ރައްދުވާ ފަރާތުގެ އިތުރުން މައްސަލައިގައި ތަދައްހުލުވެފައިވާ ފަރާތްތަކަށް ވާހަކަ ދެއްކުމުގެ ފުރުސަތު ފަނޑިޔާރުންގެ ބެންޗުން ވަނީ ދެއްވާފައެވެ.
މިމައްސަލައިގެ އަޑުއެހުންތައް ނިންމަވާލެއްވުމަށްފަހު އުއްތަމަ ފަނޑިޔާރު އަހުމަދު މުއުތަސިމް އަދުނާން ވިދާޅުވީ، މިމައްސަލާގައި ފަނޑިޔާރުން ރިއާޔަތް ކުރައްވަންޖެހޭ ކަންކަން ރިއާޔަތް ކުރައްވައި، ބަލަންޖެހޭ ކަންކަން ބެލުމަށްފަހު އެއްވެސް ކަމަކާއި ގުޅޭގޮތުން ސުވާލެއް ކުރައްވަން ނެތްނަމަ، އިތުރު އަޑު އެހުމެއް ނުބާއްވާ ދެން ބާއްވާނީ މިމައްސަލައިގެ ހުކުމް ކުރުމަށް ބާއްވާ އަޑު އެހުންކަމަށެވެ.
ޔާމީންގެ ފަރާތްޕުޅުން މައިގަނޑު ގޮތެއްގައި ފާހަގަކުރީ އެ މަނިކުފާނުގެ ޖަލު ހުކުމް އިސްތިއުނާފް މަރުހަލާގައި އޮތުމުން އިންތިހާބުގައި ވާދަކުރުމުގެ ފުރުސަތު ލިބެންޖެހޭނެ ކަމަށެވެ. ނަމަވެސް އިލެކްޝަންސް ކޮމިޝަނުން ބުނެފައިވަނީ އިސްތިއުނާފް ނުނިމި އޮތަސް ހުކުމް ދެމި އޮތްހާ ހިނދަކު ވާދަ ނުކުރެވޭނެ ކަމަށެވެ.
ޔާމީނަށް އިންތިހާބުގައި ވާދަކުރުމުގެ ފުރުސަތު ލިބިވަޑައިނުގަންނަވާނަމަ އާ ކެންޑިޑޭޓަކު ޕީޕީއެމްގެ ފަރާތުން ހުށަހެޅުމުގެ ފުރުސަތު ދިނުމުގެ އަމުރެއް ނެރުމަށް އެ ޕާޓީން އެދުނެވެ. ނަމަވެސް އިލެކްޝަންސް ކޮމިޝަނުން ބުނީ އެގޮތަށް އަމުރެއް ނެރެފިނަމަ އެތައް އިންތިހާބު ފަސްކުރަންޖެހޭ ހާލަތެއް ދިމާވެދާނެ ކަމަށެވެ.
އެ މައްސަލާގެ ތެރެއަށް ތަދައްހުލްވި އެޓާނީ ޖެނެރަލްގެ އޮފީހުން ވެސް ބުނީ އެގޮތަށެވެ. އެކަމަކު އަނެއްކޮޅުން މައްސަލައަށް ތަދައްހުލްވި ޕީޕީއެމްއިން އެދުނީ ޔާމީންގެ ކެންޑިޑެސީ ބަލައިގަނެވޭނެ ކަމަށް ނިންމުމަށެވެ.
