ރިޔާސީ އިންތިޚާބުގައި ވާދަކުރައްވާ މިހާރުގެ ރައީސްގެ އިބްރާހިމް މުހައްމަދު ޞާލިހުގެ ރަނިން މޭޓަކަށް އެމްޑީޕީގެ ޕާލިމަންޓްރީ ގްރޫޕްގެ ލީޑަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ހަމަޖައްސަވައިފިއެވެ.

ޚަބަރު އޮންލައިނަށް މައުލޫމާތު ލިބިފައިވާ ގޮތުގައި ރައީސް ޞާލިހު ވަނީ އެމަނިކުފާނުގެ މިހާރުގެ ނައިބް ރައީސް ފައިސަލް ނަސީމަށް މިއަދު އެކަން ހިއްސާ ކުރައްވާފައެވެ. ފައިސަލް އަކީ ރައީސް ޞާލިހުގެ ރަނިން މޭޓުކަމަށް ފާޅުގައި ޝައުގުވެރިކަން ފާޅު ކުރެއްވި ހަމައެކަނި ބޭފުޅާވެސް މެއެވެ.

ރަނިން މޭޓަކު ކަނޑައެޅުމަށް ރައީސް ވަނީ ރޭވެސް ކޯލިޝަންގެ އިސްވެރިންނާއި، އެމްޑީޕީގެ އިސް ބޭފުޅުންނާއި މަޝްވަރާ ކުރައްވާފައެވެ. މަޝްވަރާތަކަށްފަހު ހުށަހެޅުނު ނަންތަކުގެ ތެރެއިން ރައީސް ނިންމެވީ އަސްލަމަށް ރަނިންމޭޓްކަން ދެއްވުމަށެވެ.

ރައީސް ޞާލިހުގެ ރަނިން މޭޓުކަމަށް ފައިސަލް ނަސީމްގެ އިތުރުން، އަސްލަމާއި، ފޮރިން މިނިސްޓަރ ޝާހިދު އަދި އަދާލަތު ޕާޓީގެ ރައީސް އިމްރާންވެސް ޝައުގުވެރިކަން ފާޅުކުރެއްވިކަމަށް މައުލޫމާތު ލިބިފައެވެ. މީގެ ތެރެއިން ފައިސަލަކީ މިހާރުގެ ރައީސް ޞާލިހުގެ ނައިބް ރައީސެވެ. އަދި ފައިސަލަކީ މަލްޓިޕާޓީ ނިޒާމުގެ ތެރެއިން ނައިބް ރައީސްކަމުގެ މަޤާމު ފަސް އަހަރުގެ ދައުރު ނިމެންދެން ފުރިހަމަ ކުރެއްވި ހަމައެކަނި ނައިބް ރައީސްވެސް މެއެވެ.

އަސްލަމަކީ ރައްޔިތުންގެ މަޖިލީހުގެ މެމްބަރުކަމާއި، ރައްޔިތުންގެ މަޖިލީހުގެ ޚާއްސަ މަޖިލީހުގެ މެމްބަރުކަން ކުރައްވާފައިވާ އަދި އެމްޑީޕީ އުފެއްދުމުގައިވެސް އެންމެ އިސްކޮށް ހަރަކާތްތެރިވި ބޭފުޅެކެވެ. އައްޑޫއަށް އުފަން އަސްލަމަކީ އެމްޑީޕީގެ ޕީޖީ ގްރޫޕްގެ ލީޑަރެވެ. ރިޔާސީ ކެމްޕޭނުގައި އަސްލަމް ނުފެންނާތީ އެވާހަކަ ވަރަށް ބޮޑަށް ދަނީ ދެކެވެމުންނެވެ. ޚާއްސަކޮށް ރައީސް ޞާލިހާއިއެކު އެއްވެސް ދަތުރެއްގައި އަސްލަމް ނުފެންނާތީ އެވާހަކަ ގިނަ ބަޔަކު ދިޔައީ ދައްކަމުންނެވެ.

ރިޔާސީ އިންތިޚާބުގައި ރައީސް ޞާލިހުގެ ކެންޑިޑެސީ ފޯމް މާދަމާ ނޫނީ އާދީއްތަ ދުވަހު ހުށަހަޅުމަށް ވަނީ ހަމަޖެހިފައެވެ. ރިޔާސީ އިންތިޚާބަށް ކުރިމަތިލުމުގެ މުއްދަތު ހޯމަ ދުވަހު ހަމަވާނެއެވެ. ކެނޑިޑޭޓުންގެ މެދުގައި ގުރުއަތުލުން އޮތީ ބުދަ ދުވަހުއެވެ.