2 އެއަރލައިނަކުން މިއަދު ރާއްޖެއަށް އަލަށް ދަތުރު ފަށައިފިއެވެ.
މިއަދު ރާއްޖެއަށް މުޅިން އަލަށް ދަތުރުފަށާފައި ވަނީ ކަޒަކިސްތާންގެ ޤައުމީ އެއަރލައިން، އެއަރ އަސްތާނާ އާއި އެއަރ ސީޝެލްސް އެވެ.
އެއަރ އަސްތާނާގެ ފުރަތަމަ ފްލައިޓު ވެލާނާ އިންޓަރނޭޝަނަލް އެއަރޕޯޓަށް ޖައްސާފައިވަނީ މިއަދު ހެނދުނު 7:05 ގައެވެ. އެ ފްލައިޓަށް ވަނީ ވޯޓަރ ސެލިއުޓަކާއެކު ހޫނު މަރުޙަބާއެއް ކިޔާފައެވެ. އޭ ތްރީ 321 މަރުކައިގެ މި ބޯޓުން ރާއްޖެއަށް 156 ފަތުރުވެރިން އައެވެ. އެއަރ އާސްތާނާއިން ރާއްޖެއަށް މި ފެށި ދަތުރު ތަކަކީ ފިނި މޫސުމާ ދިމާކޮށް ފެށި ޗާޓަރ ދަތުރު ތަކެކެވެ.
A joyous welcome to the flagship carrier of Kazakhstan.@airastana landed @VelanaAirport today at 0708hrs with 156 passengers.
#SunnySideOfLife#VisitMaldives pic.twitter.com/gFnCW7qXsz— Maldives Airports Company Ltd – MACL (@MACLmedia) December 5, 2020
މި އެއަރލައިނުން ރާއްޖެއަށް ހަފްތާގެ ހޯމަ، ބުދަ އަދި ހޮނިހިރު ދުވަހު ދަތުރު ކުރާނެއެވެ. މިމަހުގެ 16 ވަނަ ދުވަހުން ފެށިގެން ޖެނުއަރީ މަހުގެ 16 ވަނަ ދުވަހާއި ހަމައަށް އެ އެއަރލައިނުން ރާއްޖެއަށް ދަތުރުކުރާނީ ބޮއިންގ 767 މަރުކާގެ ބޮޑު ބޯޓެކެވެ.
މީގެ އިތުރުން ދެން މިއަދު ރާއްޖެއަށް ދަތުރުފެށި އެއަރ ސީޝެލްސްގެ ފުރަތަމަ ފްލައިޓު ވެލާނާ އިންޓަނޭޝަނަލް އެއާޕޯޓުގައި ޖެއްސީ މެންދުރު 12:30ގަ އެވެ. މި ފްލައިޓަށް ވެސް ވޯޓަރ ސެލިއުޓަކާއެކު ރާއްޖެއިން ހޫނު މަރުހަބާއެއް ކިޔާފައި ވެއެވެ. މި ފްލައިޓުން ރާއްޖެއައީ 30 ފަތުރުވެރިންނެވެ.
ސައުތު އެފްރިކާގެ ޖޮހާނަސްބާގުން ވެލާނާ އިންޓަނޭޝަނަލް އެއާޕޯޓަށް ކުރަންފެށި ސީދާ ދަތުރުތައް އަދި ބާއްވަން ނިންމާފައި ވަނީ ހަފްތާއަކު އެއް ފަހަރު ކަމަށް އެ އެއަރލައިނުން މީގެކުރިން ވަނީ ބުނެފައެވެ. އެ ގޮތުން އަންނަ ޖަނަވަރީ މަހު ނުވަ ވަނަ ދުވަހުގެ ނިޔަލަށް ކޮންމެ ހޮނިހިރު ދުވަހަކު އެ އެއަރލައިން ރާއްޖެއަށް ދަތުރު ކުރާނެއެވެ. އެހެން ނަމަވެސް ޑިމާންޑަށް ބަލައި ހަފްތާއަކު 3 ފްލައިޓަށް ދަތުރުތައް އިތުރުކުރަން ޖެހިދާނެ ކަމަށްވެސް އެ އެއަރލައިނުން ވަނީ ބުނެފައެވެ.
A warm welcome to @air_seychelles @VelanaAirport.
Today the flight landed at 1230hrs with 30 passengers.
#VisitMaldives #SunnySideOfLife pic.twitter.com/C6qvmCW7zb— Maldives Airports Company Ltd – MACL (@MACLmedia) December 5, 2020
ޖުލައި 15 ވަނަ ދުވަހު ރާއްޖޭގެ ބޯޑަރު އަލުން ހުޅުވާލި ފަހުން ރާއްޖެއަށް ދަތުރުކުރާ އެއަރލައިންގެ އަދަދު މިވަނީ 19 އަށް އިތުރު ވެފައެވެ. ޓޫރިޒަމް މިނިސްޓްރީން ލަފާކޮށްފައިވާ ގޮތުގައި މި އަހަރު ނިމެންވާއިރަށް ރާއްޖެއަށް ދަތުރުކުރާ އެއަރލައިންގެ އަދަދު 26 އަށް އަރާނެއެވެ.
ރާއްޖެއަށް ތަފާތު ސަރަހައްދު ތަކުން އެއަރ ލައިންތައް ދަތުރުކުރަން ފަށާފައި މިވަނީ ރާއްޖެއަށް ދުނިޔޭގެ އެކި ކަންކޮޅުތަކުން ދަތުރުކުރާ މީހުން އިތުރުވާން ފަށާފައި ވާތީ ކަން ފަތުރުވެރިކަމުގެ ދާއިރާގެ ބޭފުޅުން ވިދާޅުވެއެވެ. އެގޮތުން ރާއްޖެ މިހާރު ފަތުރުވެރިކަމުގެ އެކިއެކި މާކެޓްތަކުގައި އިޝްތިހާރު ކުރަމުން ދަނީ މިފަދަ ދަނޑިވަޅެއްގައި ރައްކާތެރި ޗުއްޓީއެއް ހޭދަކޮށްލެވޭނެ މަންޒިލްގެ ގޮތުގައެވެ. މީގެ އިތުރުން މި އަހަރު ތެރޭ ރާއްޖެއަށް ލިބުނު، ފަތުރުވެރިކަމުގެ ދާއިރާގެ ދުނިޔޭގެ ފެންވަރުގެ މަތީ އެވޯޑްތަކަކީ ރާއްޖެއަންނަ ފަތުރުވެރިންގެ އަދަދު އިތުރުވާ އެއް ސަބަބެވެ.
