ރިޔާސީ އިންތިޚާބުގައި ވާދަކުރުމަށް އިދިކޮޅު ކޯލިޝަނުން ކަނޑައަޅުއްވާފައިވާ ރައީސް ޔާމީންގެ ކެނޑިޑެސީ އާއި ގުޅޭގޮތުން ޕީޕީއެމްއިން ސްޕްރީމް ކޯޓަށް ހުށަހަޅުއްވާފައިވާ މައްސަލައިގައި އެމަނިކުފާނަށް އިންތިޚާބުގައި ވާދަނުކުރެވޭ ކަމަށް ނިންމައިފިނަމަ، ޕީޕީއެމުން ކެނޑިޑޭޓަކު ނެރުމަށް އިތުރު ވަގުތުދިނުމަށް ހުށަހަޅުއްވައިފިއެވެ.
ރިޔާސީ އިންތިހާބުގައި ބައިވެރިވުމަށް ރައީސް ޔާމީން ހުށަހެޅި ކެންޑިޑެސީ އިލެކްޝަންކޮމިޝަނުން ބަލައިނުގަތުމާއި ގުޅިގެން ސުޕްރީމް ކޯޓަށް ހުށަހެޅި މައްސަލައިގެ އަޑުއެހުން ފަށާފައި ވަނީ މިއަދު މެންދުރު ފަހު 15:45 ހާއިރުއެވެ.
މިއަދުގެ އަޑު އެހުމުގައި ރައީސް ޔާމީންގެ ފަރާތްޕުޅުން ވާހަކަ ދައްކަވަމުން ޤާނޫނީ ވަކީލް ހަމްޒާ ވިދާޅުވީ އެބޭފުޅުންގެ ހުށަހެޅުމަކީ އިލެކްޝަނުން ނިންމަވާފައިވާ ނިންމުން ބާތިކޮށް ރައީސް ޔާމީނަށް އިންތިޚާބުގައި ވާދަކުރެވޭނެ އަމުރެއް ނެރެދެއްވުން ކަމަށެވެ. އަދި ރައީސް ޔާމީނަށް ވާދަ ނުކުރެވޭ ހާލަތެއްގައި އިތުރު ކެނޑިޑޭޓަކު ނެރުމަށް ޖާގަ ދިނުމަށް ވަނީ ހުށަހަޅާފައެވެ. މީގެ އިތުރުން ރައީސް ޔާމީނަށް ވާދަކުރެވޭ ކަމަށް ނިންމައިފިނަމަވެސް އިތުރު ވަގުތު ދެއްވުމަށް ވަނީ ހުށަހަޅާފައެވެ.
ހަމްޒާ ވިދާޅުވީ ރައީސް ޔާމީނަކީ އިދިކޮޅު ކެނޑިޑޭޓަށް ވެފައި، އެތައް ހާސް ރައްޔިތުންގެ މަސްލަހަތު އޮތް ކެނޑިޑޭޓަކަށްވާއިރު ސްޕްރީމް ކޯޓުން މިހާތަނަށް ނިންމާފައިވާ މިފަދަ މައްސަލަތަކުގެ ގަޒިއްޔާތަކަށް ބަލާއިރު ރައީސް ޔާމީނަށް ވާދަނުކުރެވޭނެ ހާލަތެއް ނެތްކަމަށެވެ.
އިދިކޮޅު ޕީޕީއެމްގެ ފަރާތުން ރައީސް ޔާމީނަށް ނުލެވޭ ހާލަތުގައި އިތުރު ކެނޑިޑޭޓަކު ނެރުމަށް މަސައްކަތް ކުރާއިރު، އިއްޔެ ވަނީ ޕީއެންސީގެ ފަރާތުން ވާދަކުރާނެ ކެނޑިޑޭޓެއްގެ ގޮތުގައި މާލެ ސިޓީގެ މޭޔަރު ޑރ.މުއިއްޒު އިންތިޚާބު ކުރައްވާފައެވެ. މުއިއްޒު މިއިންތިޚާބު ކާމިޔާބު ކުރެއްވީ ވަރަށް ވާދަވެރިކޮށް، 2 ވޯޓުގެ ތަފާތުންނެވެ.
އިންތިޚާބު ކާމިޔާބު ކުރެއްވުމަށްފަހު ދެއްވި ފުރަތަމަ ޕްރެސްގައި މުއިއްޒު ވިދާޅުވީ ފުރަތަމަ ދުވަހުން ފެށިގެންވެސް މަސައްކަތް ކުރާނީ ރައީސް ޔާމީން މިނިވަން ކުރުމަށް ކަމަށެވެ. އިންތިޚާބުގައި ވާދަކުރުމަށް މުއިއްޒުއަށް ޕީއެންސީ ޓިކެޓް ލިބުނު ނަމަވެސް އަދި އިންތިޚާބުގައި ވާދަކުރަން ފޯމު ހުށަހަޅާނެ ދުވަހެއް ނިންމާފައި ނުވެއެވެ. އަދި ރަނިން މޭޓަކަށް ކަނޑައަޅާނެ ބޭފުޅަކުވެސް ކަނޑައަޅާފައި ނުވެއެވެ.
ޕީޕީއެމްގެ އިސްބޭފުޅަކު ވިދާޅުވީ ޑރ.މުއިއްޒަކީ ރައީސް ރައީސް ޔާމީނަށް ނުލެވޭ ހާލަތެއްގައި ކުރިމަތިލާން ނިންމާ ތިންވަނަ ޗޮއިސް ކަމަށެވެ. ރައީސް ޔާމީނަށް ނުލެވޭ ހާލަތެއްގައި ކުރިމަތިލާނީ އެމަނިކުފާނު ދައްކާ މީހެއްކަމަށް އޭނާ ވަނީ ބުނެފައެވެ. އަދި އެކަންވެސް ނުވެއްޖެ ހާލަތެއްގައި ކުރިމަތިލާ ކެނޑިޑޭޓަކީ މުއިއްޒުކަމަށް އޭނާ ވިދާޅުވިއެވެ.
ރިޔާސީ އިންތިޚާބުގައި ވާދަކުރުމުގެ މުއްދަތު ހޯމަ ދުވަހަށް ހަމަވާނެއެވެ. މިހާތަނަށް އިލެކްޝަނަށް ހުށަހެޅި ހަމައެކަނި ފޯމަކީވެސް ޕީޕީއެމްގެ ކެނޑިޑޭޓް ރައީސް ޔާމީންގެ ފޯމެވެ. އެމްއެމްޕީއާރުސީގެ ބޮޑު ހިޔާނާތުގައި ވ. އާރަށް ކުއްޔަށް ދޫކުރުމުގައި ރިޝްވަތު ނެގުމާއި މަނީ ލޯންޑަރކުރުމުގެ ކުށް ސާބިތުވެ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒުކުރައްވަމުންނެވެ.
ޤާނޫނު އަސާސީ ބުނާގޮތުން ރައީސުލްޖުމްހޫރިއްޔާއަށްވުމުގެ ޝަރުތުތަކުގެ ތެރޭގައި ޖިނާއި ކުށެއް ސާބިތުވެގެން އެއް އަހަރަށްވުރެ ދިގު މުއްދަތެއްގެ ހުކުމެއް އޮތްނަމަ އެ ހުކުމެއް ތަންފީޒުކޮށް ނިމުމުނުތާ ނުވަތަ ކަނޑައެޅުނު އަދަބު މައާފުކުރިތާ 3 އަހަރުވެފައިވާ މީހަކަށް ވާންޖެހެއެވެ.
އިންތިޚާބުތަކާއި ބެހޭ އާއްމު ޤާނޫނު ބުނާގޮތުން ކެނޑިޑެސީއާއި މެދު ސުވާލު އުފެއްދިއްޖެ ނަމަ އެ މައްސަލަ ހުށައެޅޭނީ ހަމައެކަނި ސުޕްރީމް ކޯޓަށެވެ. އަދި މިގޮތަށް ހުށައަޅާ މައްސަލައެއް އެ ކޯޓަށް ހުށައަޅާތާ ގިނަވަގެން 7 ދުވަހުގެ ތެރޭގައި ނިންމަވަންޖެހެއެވެ. އަދި މި ފަދަ މައްސަލަތައް ނިންމަންވާނީ ސުޕްރީމްކޯޓުގެ ހުރިހާ ފަނޑިޔާރުން ހިމެނޭ ބެންޗަކުންކަމަށާއި ސުޕްރީމްކޯޓުގެ އެ ނިންމެވުމަކީ އެންމެ ފަހުގެ ނިންމެވުންކަމަށްވެސް ޤާނޫނު އަސާސީގައިވަނީ ބަޔާންކޮށްފައެވެ.
