ރައީސް އޮފީހުގެ ކުރީގެ މިނިސްޓަރު މުހައްމަދު ޝިހާބާއި ރައްޔިތުންގެ މަޖިލިހުގެ ކުރީގެ ނައިބު ރައީސް އަދި ދިއްގަރު ދާއިރާގެ ކުރީގެ މެމްބަރު އަހުމަދު ނާޒިމް ޖުމްހޫރީ ޕާޓީ އަށް ސޮއިކުރައްވައިފިއެވެ.
ރައްޔިތުންގެ މަޖިލިހުގެ ރައީސްކަން ވެސް ކުރެއްވި ޝިހާބުގެ އިތުރުން ނާޒިމް ޖޭޕީ އަށް ސޮއިކުރެއްވީ އެ ޕާޓީގެ އޮފީހުގައި ބޭއްވި ހަފުލާއެއްގައެވެ. ފޯމާ ހަވާލުވެވަޑައިގަތީ އެ ޕާޓީގެ ލީޑަރު އަދި ރިޔާސީ ކެންޑިޑޭޓްކަމަށް ކަނޑައަޅާފައިވާ ގާސިމް އިބްރާހިމެވެ.
ޝިހާބަކީ ޖޭޕީ އުފެދިއްތާ ކުރީކޮޅު ވެސް އެ ޕާޓީގެ އިސް މެމްބަރެކެވެ. އެކަމަކު، ސިޔާސީ މަސްރަހަށް އަދި ބަދަލުތަކާ އެކު ފަހުން އެމްޑީޕީއާ ގުޅިވަޑައިގަތީއެވެ. ނަމަވެސް، ގާސިމާ އަބަދުވެސް ވަރަށް ގާތް ގުޅުމެއް ބާއްވަވައެވެ. ޝިހާބު ރައީސް އޮފީހުގެ މިނިސްޓަރުކަމުން ދާދި ފަހުން އިސްތިއުފާ ދެއްވީ ވެސް ގާސިމާއި ކުރީގެ ރައީސް އަދި މިހާރު ޑިމޮކްރެޓްސް ޕާޓީއާ އެކު މަސައްކަތް ކުރައްވާ މުހައްމަދު ނަޝީދު މި އަހަރުގެ ރިޔާސީ އިންތިހާބަށް އެކުގައި މަސައްކަތް ކުރެއްވުމުގެ މަޝްވަރާތަކެއް ފެއްޓެވި ހިސާބުންނެވެ.
ނާޒިމަކީ ކުރިން، ކުރީގެ ރައީސް ޔާމީނާ ވަރަށް ގާތް ބޭފުޅެކެވެ. ނަމަވެސް ޑީއާރުޕީ އާއި ޕީއޭ އަދި ޕީޕީއެމް އުފެއްދުމުގައި ވެސް އިސް ދައުރެއް އަދާކުރެއްވި ނާޒިމާއި ޔާމީނާ ދެމެދު ބޮޑެތި ހިޔާލު ތަފާތުވުންތަކެއް އުފެދިގެން ޔާމީނާ ދުރަށް ވަޑައިގަތީއެވެ. އަދި ޔާމީންގެ ވެރިކަމުގެ ފަހު ދުވަސްވަރު އައި 25 އަހަރުގެ ޖަލު ހުކުމާ އެކު އެ ގުޅުން އިތުރަށް ގޯސްވެ، އެއްކޮށް ގުޅުން ކެނޑުނީއެވެ.
މިދެބޭފުޅުން ޖޭޕީއާއި ގުޅިވަޑައިގެންނެވިއިރު، އަލީ ވަހީދުވެސް ވަނީ ޖޭޕީގެ ލީޑަރު ޤާސިމްގެ ސްޕެޝަލް އެޑްވައިޒަރުކަމަށް ހަމަޖައްސާފައެވެ.
