2018 ވަނަ އަހަރު އުފެދުނު އެމްޑީޕީ ކޯލިޝަންގެ ވެރިކަން ނިންމުމަށް އެމްޑީޕީ ތެރެއިން މަސައްކަތް ކުރާ މީހުންގެ މަސައްކަތުން އެމްޑީޕީއަށް ވެރިކަން ގެއްލިއްޖެނަމަ، އެމަސައްކަތް ކުރާ މީހުން ސިޔާސީ މައިދާނުން ފޮހެލާނެ ކަމުގެ އިންޒާރު ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.

އަންނަ މަހުގެ 9 ވަނަ ދުވަހު އޮންނަ ރިޔާސީ އިންތިޚާބަށް އެމްޑީޕީން ވާދަކުރާއިރު އޮތް އެންމެ ބޮޑު ގޮންޖެހުމަކީ އަމިއްލަ ޕާޓީގެ ރައީސް މުހައްމަދު ނަޝީދާއި، ޕާޓީގެ އިސްބައެއް ބޭފުޅުން އެމްޑީޕީން ވަކިވެ އެހެން ޕާޓީއެއް އުފެއްދުމެވެ. އަދި ފާޅުގައި މިހާރު ދަނީ އެމްޑީޕީ ފުޑާލައި ބައިބައި ކޮށްލާނެކަމަށް ވިދާޅުވަމުންނެވެ.

މިވާހަތަކާިއ ގުޅިގެން މެމްބަރު ނިހާދު ވިދާޅުވީ އެމްޑީޕީގެ ޢާންމު މެމްބަރު މަގުތަކުގަިއ ތިބެ ބުރަ މަސައްކަތުން ހޯދި ވެރިކަން ނިންމާލައި އެމްޑީޕީ ފުޑާލަން ނިކުތް މީހުންނަށް މަޢާފެއް ނެތްކަމަށެވެ. އަދި އެބައި މީހުން ކުރާ މަސައްކަތުން މިވެރިކަން ނިމިއްޖެނަމަ އެންމެން އެކީނިކުމެ އެބައިމީހުން ސިޔާސީ މަސައްކަތުން ފޮހެލާނެކަމަށް ނިހާދު ވިދާޅުވިއެވެ.

އެމްޑީޕީގެ މެމްބަރުން 17 އަހަރު ވަންދެން ކުރި ބުރަ މަސައްކަތުން ހޯދި ސަރުކާރު ފުޑާލަން ނިކުންނަ ބަޔަކަށް ދުވަހަކުވެސް މަޢާފެއް ނޯންނާނެ! އެބައި މީހުން ކުރާ ކަންކަމުން އެމްޑީޕީގެ ވެރިކަން ގެއްލިއްޖެނަމަ އެންމެން އެއްކޮށް ނިކުމެ ސިޔާސީ މައިދާނުން ސީދާ ފޮހެލާނަން! މީ އެމްޑީޕީއޭ ބްރޯ. އެއަޒުމުގައި މިތިބީ.

– މެމްބަރު ނިހާދު ވިދާޅުވިއެވެ.

ދަ ޑިމޮކްރެޓްސް އަށް ސޮއި ކުރެއްވުމަށް ފަހު އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ އެމްޑީޕީގެ "ފޫވައް ވެއްޓި ގެއްލިއްޖެ" ކަމަށާއި އެ ޕާޓީ ދެން ދާނީ "ރޫޅެމުން" ކަމަށެވެ. ނަޝީދު ވިދާޅުވި ގޮތުގައި އެމަނިކުފާނުގެ ހަޔާތުގެ ގިނަ ދުވަސްތައް ހޭދަކުރެއްވީ ހިތާމަ އާއި އެކަނިވެރި ކަމުގައެވެ. ނަމަވެސް އަބަދުވެސް އަމާޒަކަށްވީ އުސޫލެއް ހޯދައި ގޮތެއް ހޯދަން ކަމަށް ނަޝީދު ވަނީ ވިދާޅުވެފައެވެ.

ނަޝީދު ވިދާޅުވީ ރައްޔިތުންނަށް ތަނަވަސްކަން ހޯދައި ދިނުމަށް ޑިމޮކްރެޓްސްއިން އަބަދުވެސް މަސައްކަތް ކުރާނެ ކަމަށާއި އޮބަހައްޓައިގެން ނުވަތަ ހިފަހައްޓައިގެން ގައުމަށް ލިބޭނެ ކުރިއެރުމެއް ނެތް ކަމަށެވެ. ދަ ޑިމޮކްރެޓްސްގެ ފަރާތުން އިލްޔާސް ލަބީބް ރިޔާސީ އިންތިޚާބުގަިއ ވާދަކުރާއިރު މިއީ އެމްޑީޕީއަށް އޮތް ގޮންޖެހުމެކެވެ.