ރައީސް ޔާމިނަށް އޮތް ތާއީދު ހާމަ ކުރެއްވުމަށް މިއަދު ބޭއްވުމަށް ހަމަޖެހުނު ނޫސްވެރިންގެ ބައްދަލުވުން ކުއްލިގޮތަކަށް ކެންސަލް ކުރެއްވުމަށްފަހު، މާލޭ ސިޓީގެ މޭޔަރު ޑރ. މުއިއްޒު ވީޑިއޯ މެދުވެރިކޮށް އެންމެފަހުން އޭނާގެ ޝުއޫރު ފާޅު ކުރައްވައިފިއެވެ.
ކުރިޔަށް އޮތް ރިޔާސީ އިންތިޚާބަށް ރައީސް ޔާމިނަށް ވާދަ ނުކުރެއްވޭ ހާލަތުގައި ކުރިޔަށް އޮތް ރިޔާސީ އިންތިޚާބުގެ، ޕީޕީއެމްގެ ޓިކެޓް ކަށަވަރު ކުރެއްވުމަށް ޑރ. މުއިއްޒު މަސައްކަތް ކުރައްވަމުން ގެންދަވާކަމަށް އަޑު ފެތުރިފައި ވަނިކޮށް، ރައީސް ޔާމިނަށް ތާއީދުކުރާ ޗެނަލް 13 ޓީވީ މެދުވެރިކޮށް މުއިއްޒު މިއަދު ދެއްވި ވީޑިއޯ މެސެޖުގައި ވިދާޅުވީ އޭނާ ސިޔާސީ މައިދާނަށް ވެދެވަޑައިގެންނެވުމުގެ ކުރިންވެސް ރައީސް ޔާމިން ފެނިވަޑައިގެންނެވީ ވަރަށް ކަމުދާ ކެރޭ ޝަޚުސިއްޔަތެއްގެ ގޮތުގައި ކަމުގައެވެ.
އަޅުގަނޑު ސިޔާސީ މައިދާނަށް ވަނުމުގެ ކުރިން ވެސް އަޅުގަނޑު ހަމަ ރާއްޖޭގެ ސިޔާސީ މައިދާނުގައި އޭރުގެ ރައީސް މައުމޫންގެ ސަރުކާރުން ފެށިގެން ފެންނަ ކެބިނެޓް ވަޒީރުންނާއި އިސްވެރިންގެ ތެރެއިން އަޅުގަނޑަށް ވަރަށް ކަމުދާ ޝަހްސިއްޔަތެއްގެ ގޮތުގަ އޭރުގަ ޔާމީން އަޅުގަނޑަށް ފާހަގަ ވެގެން ދިޔައީ.
ޗެނަލް 13 ގައި ލައިވްކޮށް ވާހަކަ ދައްކަވަމުން މުއިއްޒު ވިދާޅުވިއެވެ.
ޕީޕީއެމްގެ އެތެރޭގައި އެޕާޓީގެ ރިޔާސީ ޓިކެޓުގައި ޕާޓީގެ ކެނޑިޑޭޓަކަށް ވާދަ ކުރުމުގެ ފުރުސަތު ގެއްލިދާނެކަމަށް ޕާޓީގެ ގިނަ އަދަދެއްގެ މެމްބަރުން ކަންބޮޑު ވެފައިވަނިކޮށް، ޓީވީގައި ވާހަކަ ދައްކަވަމުން މުއިއްޒު ވިދާޅުވީ އޭނާ ޕީޕީއެމްގެ ރިޔާސީ ޓިކެޓް ހޯދުމަށް މަސައްކަތް ކުރާކަމަށް ދެކެވެމުންދާ ވާހަކަތަކަށް ކުރިން ޖަވާބު ދެއްވުމަށް އުޅުއްވާފައި ނުވާކަމުގައެވެ.
އަދި ވިދާޅުވީ އެހެންނަމަވެސް މި ވާހަކަތަކަށް ޖަވާބު ނުދެއްވާ މާގިނަ ދުވަހު ހުރުމުން ޕާޓީގެ މެމްބަރުންގެ މެދުގައި ހިތް ނުތަނަވަސްކަން އުފެދިގެން ގޮސްފައިވާކަމަށް ގަބޫލު ކުރައްވާ ކަމުގައެވެ. އެހެންކަމުން ކޮންމެވެސް ހިސާބަކުން އެވާހަކަތަކަށް ޖާވާބު ދެއްވަން ޖެހިފައިވާކަމަށް މިހާރު ގަބޫލު ކުރެއްވޭކަމަށްވެސް މުއިއްޒު ވިދާޅުވިއެވެ.
އެހެން ނަމަވެސް މާ ގިނަ ދުވަހު މި ވާހަކަ މިގޮތަށް، އަޅުގަނޑު އެއްވެސް ވަރަކަށް ނުދައްކާ ހުރުމުން ޕާޓީގެ ބައެއް މެމްބަރުންގެ ތެރޭގައި، ހިތްނުތަނަވަސްކަން އުފެދޭކަން ގަބޫލުކުރެވޭ. އެހެންވެ އަޅުގަނޑު ގަބޫލުކުރަނީ ކޮންމެވެސް ހިސާބަކުން މި ވާހަކަތައް ދައްކަން ޖެހޭ: މުއިއްޒު.
އިދިކޮޅު ޕީޕީއެމްގެ ރިޔާސީ ޓިކެޓް އޭނާ ހޯއްދަވަން އުޅުއްވާކަމަށް އެތައް ދުވަހެއް ވަންދެން ކުރެވެމުން އަައިސްފައިވާ ތުހުމަތުތަކަށް ޖަވާބު ދެއްވަމުން މުއިއްޒު ވިދާޅުވެފައި ވެއެވެ.
މުއިއްޒު ވިދާޅުވެފައިވަނީ، ރައީސް ޔާމިނަށް އެނާގެ ހިތުގައި އިލްލާސްތެރިކަން އޮތީ އެއްވެސް "ކޮންޑިޝަން" އަކާ ނުލާކަމުގައެވެ. އަދި ވިދާޅުވީ އޭނާގެ ހިތުގައި ރައީސް ޔާމިނަށް އޮތީ "އަން ޑިވައިޑެޑް" (ދެގޮތެއް ނުވާ) ލޯޔަލްޓީއެއް (އިޚްލާސްތެރިކަމެއް) ކަމުގައެވެ.
އަޅުގަނޑުގެ މި ލޯޔަލްޓީ އާއި މެދު ސުވާލު ކުރާ ފަރާތްތަކަށް އެބޭފުޅުން އަމިއްލައަށް ޖަވާބު ދެއްވީމަ ރަނގަޅު ވާނެ.
ރައީސް ޔާމިނަށް އޮތް އިޚްލާސްތެރިކަން ސިފަ ކުރައްވަމުން މުއިއްޒު ވިދާޅުވެފައި ވެއެވެ.
One Response
މީ ވަރަށް ބޯ ރަގަޅު ބޭފުޅެކެވެ. މީނަގެ ހީލަތާއި މަކަރުވެރިކަން ޔާމީނަށް ވުރެން އަދި ޕީޕީއެމްގައި މިތިބަ "ލީޑަރުން" ނަށް ވުރެން މާ ބޮޑުވާނެއެވެ. ޔާމީނު ނެތް ތަނެއްގައި ކެންޑިޑެސީ ނޫނީ ހުރިއްޔާ ރަނިންގމޭޓްކަން ދަމައި ގަންނާނެއެވެ. ބަލަންތިބޭށެވެ.