ޖުމްހޫރީ މައިދާނަށް އެއްވވި މައްސަލާގައި މިއަދު ފުލުސް އޮފީހަށް ހާޒިރު ކުރުމަށް ޗިޓް ފޮނުވި، ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގު އެދެނީ އޭނާ ޖާމިނުކޮށް ރައީސް ޔާމީން މިނިވަން ކޮށްދެއްވުމަށް އޭނާ ބުނެފިއެވެ.
ޓޮމް ހާޒިރު ކުރީ މިއަދު ހެނދުނު 10 ޖެހިއިރަށެވެ. އެނާ އާއި އިދިކޮޅު 5 ބޭފުޅަކު މިއަދު ފުލުހަށް ހާޒިރު ކުރެއެވެ. ޓޮމް ހާޒިރު ކުރާ މައްސަލައާއި ގުޅިގެން އޭނާ ވިދާޅުވީ އޭނާ ޕޮލިހަށް ދާން ޗިޓު ލިބުމުން ފުލުހަށް ދާން ތައްޔާރު ކަމަށެވެ. ނަމަވެސް އޭނާގެ އެދުމަކީ އޭނާ ޖާމިނު ކުރުމަށްފަހު ރައީސް ޔާމީން މިނިވަން ކުރުމަށް ޓޮމް ވަނީ ވިދާޅުވެފައެވެ.
މޯލްޑިވްސް ޕޮލިސްއަށް ހާޒިރުވާން ޗިޓް ލިބިފައިވާތީ މިދަނީ ޕޮލިސްއަށް. ޖާމިނުކޮށް ހައްޔަރުކޮށްފައި ރައީސް ޔާމީން ދޫކޮށްދެއްވާ.
– ޓޮމް ވިދާޅުވިއެވެ.
މީގެ ކުރިން ބައެއް މައްސަލަތަކުގައި ކޯޓުން ވަނީ ވަކި މީހަކު ޖާމިނުކޮށް، ކުށްތަކުގައި ޝާމިލުވާ ފަރާތްތަކަށް ލުއިދީފައެވެ. އެގޮތުން މިސަރުކާރުގެ ފުރަތަމަ ޓުވަރިޒަމް މިނިސްޓަރ އަލީ ވަހީދަށް ކުރެވުނު ޖިންސީ ގޯނާގެ ތުހުމަތުތަކުގައި އޭނާ ބޭސްފަރުވާއަށް ރާއްޖެއިން ފުރުމުގެ ހުއްދަ ދިނީ އޭރުގެ ޔޫތު މިނިސްޓްރީގެ ސްޓޭޓް މިނިސްޓަރ އަޑުބަަރޭ ޖާމިނުކޮށްފައެވެ. އަދި ސީ ލައިފް ގްލޯބަލް ކުންފުނީގެ މެނޭޖިން ޑިރެކްޓަރު އަހުމަދު މޫސާ (އައްމަޓީ) ގެ ކޮއްކޮ އަފީފާ މޫސާއާއި ދައްތަ މަރިޔަމް ނައީމާ ޖާމިނުވާ ގޮތަށް، ކަފާލާތުގެ ދަށުން، ޝަރުތުތަކަކާއެކު އައްމަޓީ ދޫކޮށްލަންވެސް އަމުރު ކުރިއެވެ.
ރިޔާސީ އިންތިޚާބުގައި އިދިކޮޅު ކެނޑިޑޭޓަކީ ރައީސް ޔާމީންކަމަށް އިދިކޮޅުން ވަނީ ކަނޑައަޅާފައެވެ. ނަމަވެސް ރައީސް ޔާމީނަށް އިންތިޚާބުގައި ވާދަ ކުރުމުގެ ފުރުސަތު ވަނީ ވަރަށް ހަނިވެފައެވެ. އިދިކޮޅުން ތުހުމަތުކުރާ ގޮތުގައި ހައިކޯޓުގައި އޮތް ރައީސް ޔަމީންގެ އިސްތިއުނާފް މައްސަލަ މަޑުޖައްސުވާފައި އޮތީ ބަޔަކު ގަސްދުގައެވެ. މައްސަލަ މިވަގުތަށް މަޑުޖެހިފައިވަނީ މައްސަލަ ބައްލަވާ ފަނޑިޔާރުންގެ ބެންޗުގައި ހިމެނޭ ފަނޑިޔާރަކު ޗުއްޓީއަށް ވަޑައިގަތުމާ ގުޅިގެންނެވެ.
ޕީޕީއެމް އާއި ޕީއެންސީގެ ރިޔާސީ ކެންޑިޑޭޓަކަށް ރައީސް ޔާމީން ހަމަޖައްސައި އެމަނިކުފާނަށް ރިޔާސީ ޓިކެޓް ހަވާލުކޮށްފައިވެއެވެ. ނަމަވެސް ވ. އާރަށް ކުއްޔަށް ދިނުމުގައި ހިންގާފައިވާ ހިޔާނާތުގެ އަމަލުތަކެއް ސާބިތުވުމާ ގުޅިގެން ކްރިމިނަލް ކޯޓުން ވަނީ އެމަނިކުފާނު 11 އަހަރަށް ޖަލަށްލުމަށް ހުކުމްކޮށްފައެވެ. މިހުކުމް ހައިކޯޓުން ބާތިލް ނުކުރާހާ ހިނދަކު ރައީސް ޔާމީނަށް އިންތިހާބުގައި ވާދައެއް ނުކުރެއްވޭނެއެވެ.
ރިޔާސީ އިންތިޚާބުގައި ވާދަ ކުރުމުގެ މުއްދަތު އަންނަ މަހުގެ 7 ވަނަ ދުވަހަށް ހަމަވާނެއެވެ.
