އިދިކޮޅު ޕީޕީއެމް ޕީއެންސީގެ ކޯލިޝަނުން މިއަދު މާލޭގައި ބާއްވަން ނިންމި ސުލްހަވެރި ހިނގާލުން މޫސުން ގޯސްވުމުންގެ ސަބަބުން ފަސް ކޮށްފިއެވެ.
"ދިވެހީންގެ ސުލްހަވެރި ހިނގާލުން" ނަމުގައި ބާއްވާ މި ހިނގާލުން ކުރިއަށް ގެންދަން ނިންމާފައިވަނީ މިއަދު ހަވީރު 4:00 ޕީޕީއެމް އޮފީސް ކުރިމަތިންނެވެ. މި ހިނގާލުމަކީ ރައިސް ޔާމީން މިނިވަން ކުރުމަށް ގޮވާލާ އިދިކޮޅުން ބާއްވާ ހިނގާލުމެއްކަމަށް ވަނީ ބުނެފައެވެ.
ހިނގާލުން ކެންސަން ކުރިކަން ހާމަކޮށް ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލު ވިދާޅުވީ މޫސުން ގޯސްވުމުގެ ސަބަބުން ހިނގާލުން ދެން ބާއްވާނެ ތާރީހެއް ފަހުން އިއުލާން ކުރައްވާނެކަމަށެވެ. އިދިކޮޅު ހިނގާލުން މިއަދު ކެންސަލް ކުރި ނަމަވެސް މިރޭ އެޕާޓީގެ އޮފީހުގައި ޖަލްސާއެއް ބޭއްވުމަށް ދަނީ މަސައްކަތް ކުރަމުންނެވެ.
ބޯކޮށް ވާރޭވެހި މާލޭގެ މަގުތަކުގައި ފެންބޮޑުވުމުގެ ސަބަބުން، ފަޔަރ އެންޑް ރެސްކިޔު ސަރވިސްއިން ފެން ހިއްކުމުގެ މަސައްކަތްވަނީ ފަށާފައެވެ. އެގޮތުން މިހާރު އައިޖީއެމްއެޗް ސަރަހައްދުގައި ޕަންޕު ބޭނުންކޮށްގެން ފެން ހިއްކުމުގެ މަސައްކަތް ދަނީ ކުރަމުންނެވެ. ރާއްޖެއަށް މިދުވަސްވަރު ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރައެވެ.
މާލެއަށް ބޯކޮށް ވާރޭވެހިފައި މިވަނީ، ރާއްޖޭގެ ބައެއް ރަށްތަކަށް ބޯކޮށް ވާރެވޭނެކަމަށް މޫސުމާއި ބެހޭ ޤައުމީ އިދާރާއިން ލަފާކޮށްފައިވަނިކޮށެވެ. އެގޮތުން ކ.އަތޮޅުން ފެށިގެން މ.އަތޮޅު ހިމެނޭ ސަރަހައްދަށްވަނީ ޔެލޯ އެލަރޓްވެސް ނެރެފައެވެ. މޫސުމާ ބެހޭ ޤައުމީ އިދާރާއިން ވިދާޅުވީ މިސަރަހައްދަށް ގުގުރުމާއެކު ބޯކޮށް ވާރޭވެހޭނެކަމަށެވެ.
