ވެރިކަމާއި ހަވާލުވުމަށްފަހު ރާއްޖޭގެ ރައްޔިތުންގެ ތެރެއިން ސަރުކާރަށް ކުލި ދައްކައިިގެން ބޯހިޔާވަހިކަން ކަށަވަރު ކުރަމުންދާ ފަރާތްތަކުން ދައުލަތަށް ދައްކާ ކުލިތައް މަޢާފްކޮށް ދެއްވާނެކަމަށް ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް ވިދާޅުވެއްޖެއެވެ.
ޒުވާނުންނަށް ހާއްސަކޮށްގެން "35-18″ ގެ ނަމުގައި ޖޭޕީން ރާޅުގަނޑު ސަރަހައްދުގައި ރޭ ބޭއްވި އިވެންޓަށް ގާސިމް ފޮނުއްވި ހާއްސަ ވީޑިއޯ މެސެޖެއްގައި ވިދާޅުވީ ސަރުކާރުން ބޯހިޔާވަހިކަމަށް ދީފައިވާ ފްލެޓްކަމަށްވިޔަސް، ގެކަމަށްވިޔަސް، ދައުލަތަށް ލާރި ދައްކާކަމަށް ވަންޏާ އެހުރިހާ ފައިސާއެއް މާފުކޮށްދޭނެ ކަމަށެވެ.
ޤާސިމް ވިދާޅުވީ އޭނާގެ ވެރިކަމުގައި ދިވެހި ރައްޔިތުންނަށް ބޯހިޔާ ވަހިކަން ފޯރިކޮށްދޭނީ ހިލޭކަމަށެވެ. މިހާރު އަގުނަގާ ފްލެޓްތަކުގެ ކުލި މަޢާފްކޮށް އެމަނިކުފާނުގެ ވެރިކަމުގައި އަޅާ ފްލެޓްތަކުން ރައްޔިތުން އަތުން ފައިސާ ނުނަގާނެކަމަށް ޤާސިމް ވިދާޅުވިއެވެ.
20،000 ހައުސިން ޔުނިޓް ވެގެންދާނީ ރާއްޖޭގެ އަތޮޅުތަކުގައިވެސް އަދި މާލޭގައިވިޔަސް މި ދެންނެވި އުސޫލުން ފައިސާ ނުނަގާ ގޮތަށް. އެއީ އެކަމަށް ގާބިލް، އެންމެ އެކަށީގެންވާ، ގެދޮރަށް ބޭނުންވެފައިވާ މީހުންނަށް އަޅުގަނޑުމެން އެކަން ފަހިކޮށްދޭނީ. އެއީ ވަކި ޕާޓީގައި ހުރި މީހަކަށް ބަލައިގެނެއް ނޫން. އެއީ ކޮންމެ ޕާޓީއެއްގައި ހުރި މީހެއްކަމުގައި ވިޔަސް ކޮށްމެ މަގާމެއްގައި ހުރި މީހެއް ކަމުގައި ވިޔަސް އެކަމުގައި އެންމެ ބޮޑަށް ބޭނުންވެފައިވާ މީހުންނަށް އަޅުގަނޑުމެން އެކަން ކޮށްދޭނީ.
– ޤާސިމް ވިދާޅުވިއެވެ.
ރޭގެ ޖަލްސާގައި ގާސިމް ދެއްވި މެސެޖުގައި ވިދާޅުވީ ޖޭޕީން ރިޔާސީ އިންތިހާބެއް ކާމިޔާބުކުރެއްވިއްޖެނަމަ، އުފެދޭ ވެރިކަމެއްގައި ވަޒީފާ އަދާކުރަންކެރޭ ހުރިހާ ބޭފުޅުންނަށްވެސް، ވަޒީފާ އަދާކުރުމުގެ ފުރުސަތު ލިބިގެންދާނެ ކަމަށެވެ. ޒުވާނުންނަށް ވަޒީފާ އަދާރުކުރެވޭނެ މަގު ތަނަވަސްކޮށްދީ، އެކަމުގެ ސްކިލްހުރި ބޭފުޅުންނަށް ފައިސާގެ އެހީތެރިކަން ލިބޭނެ މަގު ތަނަވަސްކޮށްދީ ޒުވާނުން ތަނަވަސް މީހުންނަށް ހެދުމަށްޓަކައި ކުރެވެންހުރި ހުރިހާ ކަމެއް ކޮށްދޭނެކަމަށް ޤާސިމް ވިދާޅުވިއެވެ.
