އިދިކޮޅު ޕްރޮގްރެސިވް ކޯލިޝަނުން އެއްބަސްވާނަމަ، ކުރިއަށް އޮތް ރިޔާސީ އިންތިޚާބުގައި އިދިކޮޅު ފަރާތްތަކުން ގުޅިގެން އެއް ކެނޑިޑޭޓަކު ނެރެން އެއްބަސް ވެއްޖެއެވެ.
މިގޮތަށް އެއްބަސްވީ ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީ (ޖޭޕީ)ގެ ލީޑަރު ގާސިމް އިބްރާހިމް އާއި ރިޔާސީ ކެމްޕޭނެއް ކުރައްވަމުން ގެންދަވާ އެމްއެންޕީގެ ރައީސް މުހައްމަދު ނާޒިމް ނިސްބަތްވާ ތިން ޕާޓީން މިއަދު ބޭއްވި ބައްދަލުވުމުގައެވެ.
ކުނޫޒްގައި އޮތް މަޝްވަރާތަކަށްފަހު މީޑިއާއާއި ވާހަކަ ދައްކަވަމުން ގާސިމް ވިދާޅުވީ ތިން ޕާޓީއަށް އެއްބަސްވެވުނު ކަމަކީ އިދިކޮޅު ހުރިހާ ސިޔާސީ ޕާޓީއަކާ އެއްބަސްވެވޭ ކެންޑިޑޭޓަކު ހޯދަން ކުރަން ޖެހޭ މަސައްކަތްތައް ކުރުމަށެވެ. އަދި އެ ކަމުގައި އިިދިކޮޅު އެންމެ ބޮޑު ޕާޓީގެ ރުހުން ވެސް މުހިންމު ކަމަށް އޭނާ ވިދާޅުވިއެވެ.
އަޅުގަނޑުމެން އަދި ޕީޕީއެމާއި އެމްއާރުއެމް ވެސް ވާހަކަ ދައްކާނަން، މި ކަމަށް އެއްބަސްވެވޭތޯ، އަޅުގަނޑުމެން ތިން ޕާޓީން ބޭނުންވަނީ އެއް ކެންޑިޑޭޓަކު ނެރެން މި ރިޔާސީ އިންތިހާބަށް.
– ގާސިމް ވިދާޅުވިއެވެ.
ޤާސިމް ވިދާޅުވީ މިމަޝްވަރާތަކުގައި އެއްބަސްވެވުނީ އެއްބަސްވެވޭ ކެނޑިޑޭޓެއް ނެރުންކަމަށެވެ. މިކަމުގައި ޕީޕީއެމް އަދި އެމްއާރުއެމްއާއި އެކުގައިވެސް މަސައްކަތް ކުރާނެކަމަށެވެ. ނާޒިމްވެސް ވިދާޅުވީ އޭނާވެސް ހުރީ ދޫދީގެން ރިޔާސީ އިންތިޚާބުގައި އެއްކެނޑިޑޭޓަކު ނެރެން ތާއީދު ކުރާނެކަމަށެވެ.
ތިން ޕާޓީން މިގޮތަށް އެއްބަސްވި ނަމަވެސް އިދިކޮޅު މައި ޕާޓީ ޕީޕީއެމްއިން މިހާތަނަށް ބުނެފައިވަނީ އެޕާޓީން ރިޔާސީ އިންތިޚާބުގައި އެއްވެސް ޕާޓީއެއްގެ ފަހަތަށް ނާރާނެކަމަށެވެ. އަދި އެޕާޓީގެ ރިޔާސީ ކެނޑިޑޭޓަކީ 11 އަހަރުގެ ޖަލު ހުކުމެއް ތަންފީޒު ކުރަމުންދާ ރައީސް ޔާމީން ކަމަށެވެ.
