ރައީސް ނަޝީދާއި ރައީސް ޔާމީން ގުޅިވަޑައިގަތުމަކީ ގަބޫލުނުކުރެވޭ އަދި ހިޔާލުވެސް ނުކުރެއްވޭ ކަމެއް ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
އިންޑިއާގެ ހަބަރު ފަތުރާ ވަސީލަތަކަށް ދެއްވި އިންޓަރވިއުއެއްގައި ޝާހިދުވަނީ ދިވެހިރާއްޖޭގެ ސިޔާސީ މަސްރަހުގައި ހިނގަމުންދާ ކަންކަމުގެ މައްޗަށް އަލިއަޅުއްވާލައްވާ ވާހަކަދައްކަވާފައެވެ.
އެގޮތުން އެމްޑިޕީގެ ޕްރައިމަރީގައި ރައީސް ޞާލިހަށް ކާމިޔާބީ ލިބި، ރައީސް ނަޝީދު ވަނީ އެމްޑީޕީގައި ހުރެ ފިކުރެއްގެ ދިރުންގެ ނަމުގައި ވަކި ފެކްޝަނެއް އުފައްދަވައިގެން މަސައްކަތްތަކެއް ފަށާފައެވެ. ނަތީޖާއެއްގެ ގޮތުން ރައީސް ނަޝީދާއިއެކު އެމްޑީޕީއިން އެ ޕާޓީގެ މަޖިލިސް ގުރޫޕުގައި ހިމެނިވަޑައިގަންނަވާ އިސް މެމްބަރުންތަކެއް ވަނީ އެމްޑީޕީ ދޫކުރައްވާފައެވެ. އެމަނިކުފާނާއިއެކު ޕާޓީ ދޫކުރައްވާ ވަޑައިގެންނެވި ފަރާތްތަކުންވަނީ ދަ ޑިމޮކްރެޓްސްގެ ނަމުގައި ޕާޓީއެއް އުފައްދާފައެވެ. އަދި އެބޭފުޅުން އުފެއްދެވި ޑިމޮކްރެޓްސް އާއި ރައީސް ޔާމީންގެ ޕީޕީއެމް އާއިއެކު މަސައްކަތްތަކެއް ކުރަމުންދާކަމަށް ޝާހިދުގެ ވާހަކައިގައި ފާހަގަކުރައްވާފައިވެއެވެ.
މިކަންތައްތަކަށް އަލިއަޅުއްވައި ޝާހިދު ވިދާޅުވީ، އެމްޑީޕީއިން ރައީސް ނަޝީދު ވަކިވެވަޑައިގަތުމަކީ އެ ޕާޓީގެ އެއްވެސް މެމްބަރަކު އުފާ ފާޅުކުރާކަމެއް ނޫންކަމަށް ވިދާޅުވެފައެވެ. އަދި ރައީސް ނަޝީދުގެ އިތުރުން ރާއްޖޭގެ ސިޔާސީ ލީޑަރުން ހައްޔަރުކޮށް ޖަލަށް ލީ ރައީސް ޔާމީންކަމަށާއި، އެހެންކަމުން ރައީސް ނަޝީދު ރައީސް ޔާމީނާއި ގުޅިވަޑައިގަތުމަކީ ގަބޫލުކުރައްވަންދަތި އަދި ހިޔާލަށްވެސް ގެނެވިފައިނުވާކަމެއްކަމަށް ޝާހިދު ވިދާޅުުވިއެވެ.
އޭނާ ވިދާޅުވީ، ސިޔާސީ މައިދާނުގައި ހަރަކާތްތެރިވާ އެތައް ބަޔަކު ރައީސް ޔާމީންގެ ދައުރުގައި އެ ހާލަތު ކުރިމަތިވެގެންދިޔަކަމަށެވެ.
މިނިސްޓަރު ވިދާޅުވީ، ރައީސް ޔާމީނަކީ އެމަނިކުފާނުގެ ވެރިކަމުގައި ގާނޫނުއަސާސީ އާއި ހިލާފުވެވަޑައިގަންނަވައި އުއްތަމަ ފަނޑިޔާރާއި ފަނޑިޔާރެއް ހައްޔަރު ކުރެއްވި ފަރާތެއްކަމަށެވެ. އޭނާ ވިދާޅުވީ، ރައީސް ޔާމީންއަކީ މަޖިލީހުގެ މެމްބަރުން އެ މުއައްސަސާއަށް ވަންނަން ދިއުމުން ހުރަސް އެޅުއްވި ފަރާތެއްކަމަށެވެ. ޢަދި ވިދާޅުވީ، އެމަނިކުފާނަކީ ދިވެހިރާއްޖޭގައި އެމްޑީޕީއިން އަށަގަންނުވާފައިވާ ޑިމޮކްރެސީގެ އަސާސްތައް ފުނޑުފުނޑުކޮށްލައްވަން އެތައް މަސައްކަތްތަކެއް ކުރައްވާފައިވާ ފަރާތެއްކަމަށެވެ.
އެހެންކަމުން ރައީސް ނަޝީދާއި ޑިމޮކްރެޓްސް ޕީޕީއެމްއާއި ގުޅުމަކީ ފަހުމް ކުރެއްވިފައިނުވާކަމެއްކަމަށެވެ. އެހެންނަމަވެސް އެ މަސައްކަތްތައް ހިނގަމުންދާކަމަށް ވިދާޅުވިއެވެ.
